MIKA 1 - Kemethajüh (N) (Re-editing) Bible (BSI)

¹ Jotham, Ahaz, nu Hezekiya hathu na Judah kadimiwa sa keben tsüwi Apvüwa na ketsijüh hapi Moresheth nyuti wina keghowa Mikah cü. Apvüwa na Samaria nu Jerusalem manyi ghena pala hathu tsüdi pi Mikah ccüca chi.

Samaria nu Jerusalem kiqaiki

² Ha kinalo, nthu mizzatentithu tsüdila; ha kinalo, nthu ayyi wi hang kebenthu tsüdila! Apvüwa Kekhang ntsawa na khipi nthu matang ben. kinayalo! Ma atssan wi ma kekinyijjen wina khiben.

³ Apvüwa na ma kemetha pen wina dugho den; ma dugho nu ayikhathu shoni miwi alentsen den.

⁴ Tsaseng wi ayikhathu na ma kekhu wi anie na anni miwi tssüghe keten ti saaben; yyishiphon wina atssü pi keshusha keben ti tsüthu na ayyiketijü miwi keshusha dugho ben.

⁵ Ha tsüdila saaden, kepaghenanye Israel nyithu na sami nu Anyiza matangla shun kesalina. Thowa na Israel kahhaghe khhi ha kepvü-u saben nu? Samaria, ghazen nyunutiwa tsüla! Thowa na Judah na atsikezhü kekinyi khhi tsü pvü nu? Jerusalem ketanlala!

⁶ Tsalina Apvüwa na khiben, “Hi Samaria sapi ayela kemetha wi dedi pi nbonki keben kesü sa, kemeshentsse tonthu pi kisheng pen kesü sa thsüaden . Hi anyunutiwa wi alon qanthu pi ayyiketijü wi keshushachi, nu anyunutiwa giketegü tsüpi amei wi keliaden.

⁷ Nu ciwi atsikezhüthu tsüdila pacha zigheaben, katsüha lela pi kekinyijjen wi keqheza menkedsathu kecü tsüdi anni pi yasa, nu atsiketon tsüdi yasa pi abhonbhon saaden. Samaria na ma ben kayi kewa kekuli ghena hathu saya, nu khili ma ghinyithu na tsüthu pvü nu khiewa khe kekinyijjen wi keqheza menkedsa sa wa tendha.”

⁸ Tsaseng wi Mikah na khi, “Ha ghena hi anongü nu qaiben. Hi ahathakina pi ccüca le kesalina hi iccükevü nu hi kemissü alentsen den. Hi whewhe ti magha nu awaketiwa kekhou ti saden.

⁹ Samaria yisüthu na maya nben, nu Judah na tsü makesü ketizensa tendha; keyasa na gho inyithu na hang keben Jerusalem khweti-jenka tsü cudha.”

Ghinyiwa na Jerusalem Tetsakigho

¹⁰ Ithu na nyu nkecha cüki pi Gath wi ithu ghinyithu nkizala; mathu ya nthu kiqai nmu thsüla. Beth Leafra nyithu, nthu hathakina ghena ayyinikhu wi kuweng pi ccüca lo!

¹¹ Nthu Shafir nyithu, kemissü nu kejügheyala kushiyyi wi walo. Zanaan wi kahangthu na mathu nyunuti wina shhugho le kesa kempvüza nmi. Khathansha wi nthu na Bethezel nyithu na anongü keben zaya khe, nthu na ciwi khwekeya nmidha le kesa chüyaben.

¹² Maroth nyithu na ccakeya mehiechala ben, kepaghenanye Apvüwa na kededi sengho Jerusalem tetsakidha.

¹³ Nthu Lakhish wi kahangthu, goruthu jügü sen wa gorugarithu wi hugilo. Nthu na Israel kesami tsü kenie ghena Jerusalem sapi sami thsüa.

¹⁴ Tsalina nthu Judah nyithu, bvü tendha le Moresheth Gath nyutiwa wi kizalo. Israel kadimithu na Akhzib nyutiwa wi kekiqa mangla mu nben.

¹⁵ Maresha nyithu, Apvüwa na nthu pi nthu ghinyi nthu nyutiwa nkaya ketenwa kwen wi chia tendha. Israel ccülikesathu na bvü wa Adullam lonshiku wi kuthi ben.

¹⁶ Judah nyithu, nthu na ghali keten tsangathu ghena anonkegü wi nthu li whilo. Akamang kemcüwathu ti nthu li methasi sa thsülo, kepaghenanye nthu wina nthu tsangathu ssisen kushiyyi wi wa tendha.