MATHI 8 - Kemethajüh (N) (Re-editing) Bible (BSI)

Jisu na Anyi Kesü sa pi Mehaikecü

¹ Jisu na ayikha wina kedugho wi anyitenti na ma nieden.

² Ciwi agükedsakenaa nyi kesü na ma tuwi ghola akhhutsüdu nu ma wi khie, “Apvüwa, no kenen lethu, no hi sa pi mehai cülo.”

³ Jisu na ma kwen chang pi ma kidhen chi nu khi, “Hi saya mehai, mehai yalo!” Tsümeyi anyi tsüwa na ma kesakinaa wina mehaiya.

⁴ Tsaseng wi Jisu na ma wi khi, “Kinalo! Pi thola nkiza lalo, isala meshonqhe keqhaikediwa wi wa nu ma ya no ghang thsülo; isanu tsüdila no mehaiyadha le kesa chüya thsüle kesalina Mosa na khi kechi ti ahhanshawa tsü sachilo.”

Jisu Na Rom Kediwa Nssümagha sa pi Mehaikecü

⁵ Jisu na Kapernaum wi kewa wi Rom nyi kedi kesü na gho ma metu nu ma wi kekiqa khie,

⁶ nu ma wi khi, “Apvüwa, imaghawa na naa nu ajjen wi ben, cügüshü nu ketizen sa ntsa saben.”

⁷ Jisu na khi, “Hi wala ma sa pi mehai cüaden.”

⁸ Kediwa na khineng, “Apvüwa, nyele; hi no yala ijjen wi ngho thsü qole! Isala ajüh ketan khichi nu imaghawa ya mehaiya thsülo.

⁹ Hi la imiwi kedi kekhang cakhu wi keben nyi kesü nu ikekhu wi süpahithu na ben. Hi meshu kesü wi kizala, ‘walo’ thu ma waden; kepawa kizala, ‘gholo’ thu ma ghoden; nu imaghawa kizala ha ‘salo’ thu ma saden.”

¹⁰ Jisu na ajüh ha zakeya wi ma mansa nu anyi ma nie ketenthu wi kiza, “Hi nthu kizaden, hi Israel nyithu jawi lela kenondi hacu npi mu.

¹¹ Hi nthu kizaben, anyi kejon na nishuwa nu niduwa na ghola tang Kadiyyi kemishu wi Abraham, Isak, nu Jakob gweghe donkiben.

¹² Isala anyi Kadiyyi wi keben-u tsüthu tsü pi kejang wi khalachi nu ciwi mathu na qai nu ayha kemeküli benden.”

¹³ Tsaseng wi Jisu na kediwa wi kiza, “Njjen wi whalo, no kenondiwa tsü sa pi no cüben na.” Isanu tsü tsüwi kediwa maghawa tsüna mehaiya.

Jisu na Anyi Kejon sa pi Mehaikecü

¹⁴ Jisu na Pitor jjen wi wa nan ciwi Pitor nyie na muwhe nu awe wi keben muya.

¹⁵ Ma wala nzawa kwen pa chi nan ma nmuwhe la, nu ma shagha kugü pi ma cü.

¹⁶ Minulen wi anyithu na anyi atsaghang ssiketen kejon ssinu Jisu wi gho. Jisu na ajüh kesü khi pi nkemehai ghamuthu jügüshi nu kesakinaathu tsüdi sa pi mehai cü.

¹⁷ Ma ha sa kechi tsüna Isa atusenjüh-kechüwa na kekhi tsü ntsakhiwa sacenya thsüle kesalina, “Ma ketanla ithu kesakinaa tsü pvüya nu ithu khuma-khujü tsü sen bvüdha.”

Jisu Senkeniethu Kesa-u

¹⁸ Jisu na anyitenti ma vüsen keben kemu wi ma sansikeyathu wi aghajü khhakawa wale kiza.

¹⁹ Ayen pi kesansi nyi kesü na ma wi gho nu khi, “Kesansiwa, hi no khiewa waten khe no gweghe waten.”

²⁰ Jisu na ma luneng, “Whewhethu na mathu ku ben, nu awathu la mathu ghacen na ben, isala Anyi Tsawa tsü ma li pi kelikeya pen la nmi.”

²¹ Sansikeyanyi kepa wi kesü na khi, “Apvüwa, hi ya wala atuwa sa iba pi vhüya thsülo.”

²² Jisu na luneng, “Hi nie ghalo, nu keshüthu ya mathu ketanla mathu pi vhüya thsülo.”

Jisu Na Caghamo Khashakesa

²³ Jisu na ahun kesü wi duya nu ma sansikeyathu na ma gweghe wa.

²⁴ Zuli aghajü wi caghamo na khang ntsa sa shagha nu ahun na atssü non wi duaketen ti kemessi wi ben, isala Jisu na jen ben.

²⁵ Sansikeyathu na wa Jisu pamechü nu hati khi, “Apvüwa, ithu hangsha yalo, ithu shüa tendhale.”

²⁶ Jisu na luneng, “Nthu mangkesa na messi ben nu? Nthu kenondi khatila zeng nu?” Tsaseng wi ma shagha nu ameghü nu atssüketi khachi nan ciwi ccen sa.

²⁷ Anyi tsüdila amansa nu khi, “Anyi hawa ha khati kesa nu? Ameghü nu atssüketi lela ma jühya keten ha!”

Jisu Na Meshu Keni Atsaghang Ssiketen sa pi Mehaikecü

²⁸ Jisu na aghajü khhakawa Gadara yyi wi kegho wi meshu keni ashüjjen jawi na gho ma metu. Anyi ha keni na atsaghangthu ssiden nu nmehai ntsa kesalina anyi thola alen ciwi wa meya.

²⁹ Manyi magha ntsa nu khi, “Anyiza Tsawa, no ishinyi pi mangwa sa mvu ben nu? No matsü npi kecu wina ishinyi meten cüle ghoben kwe?”

³⁰ Avü khang keti kesü na tsü kete wi atsse chü dsaben.

³¹ Tsalina atsaghangthu na Jisu wi khie, “Keujüla no ikhang jügüshiaten lethu, ikhang kesun pi avü khang wi katsü du thsülo.”

³² Jisu na mathu wi “walo” kiza, tsalina mathu na shhugho nu wala avü khang jawi dua. Avü khang tsü maben la kejügüli sen nu alonshi pang wi whala aghajü wi du meyanthi shan.

³³ Anyi avü kehiethu na bvü sen nu anyuti wi wa tsü cüki nu anyi atsaghang ssiketenthu tsü khati sa khe maben khi pi nyu kiza.

³⁴ Tsalina anyuti wi anyi tsüdila Jisu metule wa, nu mathu na ma mukeya wi ma mathu yyi teshi nu bvülo khie.