MATHI 22 - Kemethajüh (N) (Re-editing) Bible (BSI)

Keshanyi pi Ajühkaghape

¹ Jisu na anyithu keccüneng wi kheneng ajühkaghapethu khi.

² “Tang Kadiyyi hana hati kesale. Ciwi kadimi kesü na ma tsawa keshanyi ghena kemishu kesü kidenya.

³ Ma ma maghathu kesun pi akejjenthu na kemishu wi ghalo qhewa thsü lela mathu na ngho mvu.

⁴ Tsalina ma akejjenthu ghena ajüh hati khi nu amagha kepathu wi kesun nengchi: ‘Khili kemishu ghena kidenyadha; imesü süpon nu amesü zza kekunonthu pathi pi pala tsüdila kidenyadha. Keshanyi kemishu wi tsü ghalo!’

⁵ Isala qhe kechi akejjenthu na tsü nkinala mathu papa kekuli sa washan: kesü na ma lli wi wa, kepa na ma kekuli sa wa,

⁶ kepathu na amaghathu tsü ghan pi kiccü nu mathu pathia.

⁷ Kadimiwa na ma leben-minu ntsa sa nu ma süpahithu kesun chi pi anyi tsüthu pathia nu mathu nyunutiwa mecangchi thsüa.

⁸ Tsaseng wi ma amaghathu cichi nu khi, ‘Hi keshanyi kemishu tsü kidenyadha, isala hi anyi qhe kechithu na tsü nsen qo ladha.

⁹ Khili alentonti wi wa nu nthu na mukeya anyi tsüdi ci sen kemishu wi gholo.’

¹⁰ Tsalina amaghathu na alentonti wi wa mathu mukeya anyi kemehai nu nkemehai tsüdila saghu ssi gho nu anyi na kemishu jjenwa tsü pongya.

¹¹ “Kadimiwa na akejjenthu ghang wa nan ciwi anyi kesü na keshanyi thsümeni pvü nketen muya.

¹² Kadimiwa na ma wi keü, ‘No khatinu keshanyi thsümeni npvüla hewi dughoya nu?’ Isala anyi tsüwa na mangla nkhila.

¹³ Tsaseng wi kadimiwa na amaghathu wi kiza, ‘Ma ccü ma kwen bhenya nu pi akhemi kejang wi khala chilo.’ ”

¹⁴ Nu Jisu na khi, “Anyi kejonla cichi, isala keu ketan kessiya.”

Khajana pi Kechi Cüki Kekeü

¹⁵ Farisithu na bvüa nu pala pi Jisu keü nu ma ghanyale kesa acho kesü kidenya.

¹⁶ Mathu na mathu sansikeyathu pahan nu Herod nyi pahan kesun pi Jisu wi chi nu khi, “Kesansiwa, ikhang na no atsentsawa khiten le kesa chüben. No anyi nankepapa nsala Anyiza len tsentsawa tsü pi nyu sansi den, kepaghenanye no anyi kizza kedi hesha nten.

¹⁷ No kemeshen tsü khati khe pi ikhang kizalo. Khajana pi Rom Kadimi kecü-u ayen benla nmi nu?”

¹⁸ Isala Jisu na mathu nkemehai kemeshen tsü chüya nu mathu wi kiza, “Nthu nkenyeghekesathu! Nthu mangkesa na acho sa pi hi ghanle saten nu?

¹⁹ Khajana pi kecü ghena rükatssü kesü sengho hi ghang thsülo!” Mathu na apisatsen kesü sengho ma cü,

²⁰ nu ma mathu wi keü, “Ha miwi thowa tsi nu thowa nyan zhütheng nu?”

²¹ Mathu na “Rom Kadimiwa le” khineng chi. Tsalina Jisu na mathu wi kiza, “Isalethu, mangwa na Kadimiwa ji khe pi Kadimiwa cülo, nu mangwa na Anyiza ji khe pi Anyiza cülo.”

²² Mathu na ha zakeya wi mathu mansa nu ma teshi nu bvüa.

Keshü wi Hangneng-keshagha Cüki Kekeü

²³ Tsü ghanan Sadukithu pahan na Jisu wi gho nu anyi keshü wina hangneng-shagha nbenle khi, nu mathu na ma wi keü,

²⁴ “Kesansiwa, Mosa kekhi na keujüla anyi kesü ma atsanga nmila shü lethu, keshüwa shicü benya thsüle kesalina ma cünyuwa yala denyilewa tsü yaya thsü nsathu yishü.

²⁵ Kheni kuti wi cünyu nyi tagü na ben. Keqhaiwa na ma wubvü yaya nu atsanga nmila shü, tsalina denyilewa tsü teshi pi ma cünyuwa cüa.

²⁶ Ma cünyu keniwa, kechengwa, nu wa tagüwa kecu tsüdi tsü makesü sale.

²⁷ Asakhenwa wi nzawa la shü.

²⁸ Hangneng-keshagha tsathang wi nzawa tsüna thowa wubvü saben nu? Kepaghenanye ma tagü tsüdila nzawa tsü ssiben kesalina.”

²⁹ Jisu na mathu luneng, “Nthu na khatila sazzi ben nu! Tsüna nthu na Ntsawajüh nyelela Anyiza kekhang tsü nkechü ghena le.

³⁰ Kepaghenanye anyithu na keshü wina hangneng- keshagha seng wi mathu na tangnyilothu ti sa nu keshanyi sa nbendha.

³¹ Keshü wina hangneng-shaghaben kesa: Anyiza na nthu kekiza tsü nthu na si meya kwe? Ma kekhi na,

³² ‘Hi Abraham Nyiza, Isak Nyiza, nu Jakob Nyiza.’ Ma kahang khe keshü Nyiza nye le!”

³³ Anyitenti na ha zakeya wi ma kesansijüh ghena mathu amansa.

Ayenkhukechi Ketiwa

³⁴ Jisu na Sadukithu sa pi ccen sa thsü kesa Farisithu na tsü zakeya wi mathu ghola saghuya,

³⁵ nu mathu jawi kesü, Ayenkesansiwa na ma ghanyale kesalina acho sa nu pala pi ma keü.

³⁶ “Kesansiwa, ayenkhukechi jawi khawa na aghuti ntsawa nu?”

³⁷ Jisu na luneng, “‘Nleben tsüdi, no kahang tsüdi, nu no kemeshen tsüdi pi Apvüwa n-Nyiza tizenyalo.’

³⁸ Hawa ha ayenkhukechi keti ntsawa nu aghutiwa.

³⁹ Ayenkhukechi aghuti keniwa na hati kesa, ‘No ketanla no ketizen ti njenphon tizenya.’

⁴⁰ Mosa Yenwa nu atusenjüh-kechüthu kesansijüh tsüdila ayenkhukechi ha keni miwi ben.”

Messiya Cüki Kekeü

⁴¹ Farisithu pahan na saghu keben wi Jisu na mathu wi keü,

⁴² “Nthu na Messiya cüki tsü khatile meshen ben nu? Ma thowa shicü nu?” Mathu na luneng, “Ma David shicü.”

⁴³ Jisu na keü, “Isathu, mangkesa na Aghamu na David kiza nu ma pi ‘Apvüwa’ tsüti ci thsü nu? David kekhi,

⁴⁴ ‘Apvüwa na iPvüwa wi khi: Hi nghinyithu pi nccü cakhu wi npi kechi chu ikwen ajewa donki benlalo.’

⁴⁵ Keujüla David na ma pi ‘Apvüwa’ isa ci lethu, khati nu Messiya na David shicü saya mehai nu?”

⁴⁶ Anyi thola Jisu jüh tsü luneng meyala, nu tsü ghanan nten na thola ma wi pala keü messia.