MATHI 20 - Kemethajüh (N) (Re-editing) Bible (BSI)

Kemeshentsse Lli wi Kekulithu

¹ “Tang Kadiyyi na hati kesale. Ciwi anyi kesü na ghanen mitu na anyi pahan ssinu ma kemeshentsse lli wi wale bhawa.

² Ma ghanan kesü kutimen pi mathu cüle cen nu mathu kesun pi ma lli wi kuli wa thsüa.

³ Ma amighe kekihhe tugu wi asenkesapen wi wa nan ciwi anyi pahan mangla nkulila ngan keben muya,

⁴ tsalina ma mathu wi kiza, ‘Nthu la wala illi wi kulilo, hi akutimen centi pi nthu cüben na.’

⁵ Tsalina mathu la wa. Tsaseng wi ma kheneng amighe kekihhe tagha keni nu tsaseng wi kecheng kekihhe wi la tsü makesü sa.

⁶ Amighe manga kihhe keten pang wi la ma kheneng asenkesapen wi wa nan ciwi anyi pahan ngan keben muya nu ma mathu wi keü, ‘Mangkesa na nthu na ghanan thangthang mangla nkulila hewi ngan ben nu?

⁷ Mathu na luneng, “Anyi thola ithu ya melli ghalo ncile.” Ma mathu wi kiza, “Isalethu, nthu la wa illi wi kulilo.”

⁸ “Minulen wi alli pvüwa na ma keben kenonccawa cichi nu khi, ‘Kekulithu tsü cichi nu mathu kutimen pi gishü cülo, tsü pi asakhen kewathu wi atuwa sala gishü sen wa atuwa kewathu cülo.’

⁹ Anyi amighe manga kekihhe wi ccüna kuli kewathu tsüdila ghanan kesü kutimen kesüsü pi cü.

¹⁰ Tsalina gishü ghola anyi atuwa kewathu kecu wi mathu na kejon muya benle meshen; isala mathu la ghanan kesü kutimen kesüsü ketan pi cü.

¹¹ Mathu apisa tsü khuya nu wa ma pvüwa wi kicennali shhu

¹² nu khi, ‘Anyi amighe manga kekihhe wina kaghathu hana amighe kekihhe kesü jü ketan kuli, isala ikhang tsü ghanan thangthang ghani kisa wi kuli nan no ithu kutimen makesü sa cüben.’

¹³ Isala alli pvüwa na mathu kesü wi khineng, ‘Ipvüshangwa, kinalo! Hi nthu nmechule, kepaghenanye nthu na ghanan kesü kutimen tsü yale cen nu kuli wale.

¹⁴ Khili nkutimen khuya nu ajjen wi whalo. Hi pi nthu kecü ju pi anyi asakhen wi kaghawa ha la cü mvu benle.

¹⁵ Hi ipisa pi hi kemeshen kesau nye kwe? Nyelela hi anon-nkhula pi nyu kecü ghena nthu anonpvü ben kwe?’ ”

¹⁶ Nu Jisu na khi, “Tsalina asakhen sa kebenthu na atu saben, nu atu sa kebenthu na asakhen saben.”

Jisu na kecheng tughuwa Ma Keshü Cüki Kekhi

¹⁷ Jisu na Jerusalem wi wa keten alenca wi ma sansikeyathu Taghakeni ssi wa makepa sa nu mathu wi kiza,

¹⁸ “Kinalo, ikhang na Jerusalem wi wa tendha, ciwi nyu na Anyi Tsawa ghan pi keqhaikedi ntsathu nu Ayenkesansithu kwen wi chiaben. Mathu na ma meshensa pi shü thsülo sa,

¹⁹ nu ma pi Anyiza nkechüthu kwen wi chiaben. Mathu na ma nankeqhe, ma kihhe, nu ma pi kross miwi jen shaben; isala ma ghanan kecheng seng wi hangneng shaghaben.”

Ajja Kesü Keshikenen

²⁰ Tsaseng wi Zebedee wubvü na ma tsa keni ssigho Jisu tuwi akhhutsü nu ma kenenwa tsü sa cülo khie.

²¹ Jisu na ma wi keü, “Hi nghena mangwa sa thsü mvu ben nu?” Nzawa na khineng, “Itsa keni yala no Kadimi sa kegho wi kesü ya nkwen ajewa nu kesü ya tavüwa benya thsü benle khishi chilo.”

²² Jisu na atsa keni wi khineng, “Nshinyi na mangwa khie ben khe ma jjügi nchü. Nshinyi na hi ketizenkesa hyi jjü ketenwa tsü jjüya mehai ma?” Manyi na “Ishinyi tsü jjüya mehaile” khineng chi.

²³ Jisu na manyi kiza, “Nshinyi na hi kejjü hyi tsü jjüya mehai, isala hi ikwen ajewa nu tavüwa benya thsüle kesa kekissiu nmi. Tsüthu tsüna iBa na thothu ghena kiden theng khe tsüthu jile.”

²⁴ Sansikeyathu ma tagha na ha zakeya wi ma cünyu miwi mathu leben minuya.

²⁵ Tsalina Jisu na mathu tsüdi cighuchi nu khi, “Anyi Anyiza nkechüthu miwi kekhang kesenthu na mathu miwi apvüwa sa, nu accülikesathu na mathu miwi kekhang keben tsü nthu na chüben.

²⁶ Isala nthu jawi tsü tsüti sa nben. Nthu jawi thowa na kediwa sa mvu khe ma nthu tsüdi maghawa nsathu yishü;

²⁷ nu nthu jawi thowa na atuwa sa mvu khe ma nthu tsüdi nssümaghawa nsathu yishü.

²⁸ Anyi Tsawa na nyu ma kekuli sa thsüle kesawa nyela ma nyu kekuli sa, nu ma kahang khuchi pi anyi kejon hangshayale kesa ghena kegho tsüti.”

Jisu na Anyon Nkemu Keni sa pi Mehaikecü

²⁹ Jisu nu ma sansikeyathu na Jerikho teshi nu wa keten wi anyitenti keti na mathu nieden.

³⁰ Anyon nkemu meshu keni na alen wi donki nu Jisu na ciwi wa keten hhai zakeya wi manyi na magha nu khi, “David tsawa! Apvüwa, ishinyi nantizen chi cülo!”

³¹ Anyitenti na manyi satekü nu manyi ccen ben walo kiza. Isala manyi na tsü miwi misikhhali magha nu khi, “David tsawa! Apvüwa, ishinyi nantizen chi cülo!”

³² Jisu na ngan nu manyi cichi. Ma manyi wi keü, “Hi nshinyi ghena mangwa sachi thsü mvu ben nu?”

³³ Manyi khineng, “Apvüwa, no ya ishinyi nyon sa pi pala muya thsü mvu benle!”

³⁴ Jisu na manyi nantizenya nu manyi nyon pachi; tsümeyi manyi nyon na pala muya, nu manyi na ma nie wa.