MATHI 14 - Kemethajüh (N) (Re-editing) Bible (BSI)

Johan Baptizwa Keshü

¹ Tsü tsüwi Galilee wi kekhang kesenwa Herod na Jisu cüki tsü zaya.

² Ma ma maghawa wi kiza, “Hawa ha ntsakhiwa Johan Baptizwa, ma keshü wina hang shaghadha. Tsalina ma amankesa kuliya kemehai kekhang hathu benle.”

³ Kepaghenanye Herod na kheni Johan ghanya nu ma bhen pi atssüzüjjen wi chia. Ma hati kesa hana ma cünyuwa Filip wubvü Herodia ghena.

⁴ Kepaghenanye Johan Baptizwa na Herod wi kiza, “No Herodia tsü keya ayen nmi.”

⁵ Herod na Johan pathiale sa lela ma Judah nyithu messi, kepaghenanye mathu na Johan pi atusenjüh-kechü kesü saden.

⁶ Herod kepvügha tsathang wi Herodia nga kesü na ghola anyithu maben tuwi nashü. Herod na ma nen ntsa saya

⁷ nu ma anga tsüwa wi khishichia, “Hi kishen nu khiben, no hi wi mangwa khie khe pi no cüaben.”

⁸ Ma jja na khikechi kenie wina nzawa na gho ma wi khie, “Khili Johan Baptizwa li wie pi akhu ha wi chicülo.”

⁹ Kadimiwa na ma hathana wa, isala ma ma kejjenthu tsüdi tuwi na ma jühkhuchi kesalina nzawa kenen tsü sa pi cülo khichia.

¹⁰ Tsalina ma atssüzüjjen wina Johan li wieya thsüa.

¹¹ Ali tsü pi akhu kesü wi chi pie gho nzawa cüa nu ma tsü pienu ma jja wi wha.

¹² Johan sansikeyathu na gho ma kamang pie wa vhüa; tsaseng wi mathu na wa tsü pi Jisu kiza.

Jisu na Anyi Hazar Manga Ghanja Kecü

¹³ Jisu na Johan cüki tsü zakeya wi ma ahun kesü wi duya nu apen tsü teshi nu ma ketan kecaghang pen kesü wi wa. Anyithu na tsü zakeya wi mathu nyutiwa teshi nu alentsen sen nu ma nie wa.

¹⁴ Jisu na ahun wina shhugho anyitenti muya nu mathu ghena ma leben güccüya, nu mathu kesakinaa sa pi mehai cü.

¹⁵ Minulen wi sansikeyathu na ma wi gho nu khi, “Khili minu wadha, nu hawa ha thola nkemi pen wi. Anyithu kesun pi bvü thsü nu mathu ya wala ha kevü anyu wi mathu ghena kedsakejjü sheiya thsülo.

¹⁶ Jisu na khineng, “Mathu ya nbvü thsü la mehai. Nthu na pala pahan pi mathu dsa thsülo.”

¹⁷ Mathu na luneng, “Ikhang na amesa be manga nu anga keni ketan benle.”

¹⁸ Jisu na khi, “Isathu tsüthu tsü sen nu hi wi gholo.”

¹⁹ Tsaseng wi ma anyithu yala aghang miwi donkiya thsülo khichi. Ma amesa be manga nu anga keni tsü khuya nu tang wi ghang nu Anyiza wi kesawegü khiechi. Ma amesa tsü pakhhiya nu pi sansikeyathu cü nu pi anyithu wi gishü thsü.

²⁰ Anyi tsüdila dsa pi anonkwen ntsa saya. Tsaseng wi sansikeyathu na kedsatu ashijü taghakeni saghuya.

²¹ Anyi ciwi kedsathu na hazar manga-u, tsüna nzathu nu ghanyithu nsichi.

Jisu na Atssü Miwi Lenketsen

²² Jisu na sansikeyathu yala ahun wi du nu ma tu wina aghajü khhakawa wa thsü, nu ma anyitenti tsü kesun pi bvü thsüa.

²³ Tsaseng wi ma ketan ayikha kesü miwi kila kekhie sa wa. Minulen wi Jisu ma ketan ciwi benla:

²⁴ nu tsü tsüwi atssüketi na ahun pienu aghajü non wi kelensie wi du benla, kepaghenanye ameghü na sho ntsa kesalina.

²⁵ Aghanen amighe kekihhe kecheng nu tugho jüwi tsü Jisu na atssü miwi na alentsen sen nu sansikeyathu wi gho.

²⁶ Mathu na ma atssü miwi alentsen keten kemu wi mathu qhethiketen nu messi pi magha nu khi, “Ha acenpvü kesü le!”

²⁷ Isala tsümeyi Jisu na mathu wi kiza, “Lebenzü yalo! Ha hi le, nmessi lalo!”

²⁸ Tsaseng wi Pitor na ma wi khi, “Apvüwa, tsüna ntsakhiwa no lethu, hi kiza nu atssü miwi na no wi gho thsülo.”

²⁹ Jisu na “Gholo” khinengchi. Tsalina Pitor na ahun wina shhugho atssü miwi na Jisu wi wa.

³⁰ Isala ma ameghü kekhang kemu wi ma messiya nu atssü non wi duale wa. Tsalina magha nu khi, “Apvüwa, hi hangsha cülo.”

³¹ Tsümeyi Jisu na ma kwen chang pi ma ghantenya nu khi, “No kenondi khatila zeng nu! Mangkesa na kesütu ten nu?”

³² Manyi gweghe ahun wi duya nu ciwi ameghü na nshola.

³³ Ahun wi keben sansikeyathu na Jisu kinyi nu khi, “Ntsakhiwa no Anyiza Tsawa le!”

Jisu na Gannesaret wi kesakinaa sa pi Mehaikecü

³⁴ Mathu na aghajü pvüdhi sen nu Gannesaret yyi wi ghoya,

³⁵ ciwi anyithu na Jisu chüya. Tsalina mathu na nyu kesun pi ayyi tsü kevü wi kesakinaathu tsüdi cichi thsü nu mathu ssinu Jisu wi gho.

³⁶ Mathu na Jisu wi kesakinaathu yala ma thsü katen ketanla kidhenya thsülo khie; nu tsü kidhenkeyathu tsüdila sa pi mehaiya.