MATHI 1 - Kemethajüh (N) (Re-editing) Bible (BSI)

Jisu Khrista Bamyithu

¹ Hawa ha Abraham shicübvüghawa David shicü kesü, Jisu Khrista bamyithu nyan kezhü:

^2-6a Abraham na wala Kadimi David kecu bamyithu na ha: Abraham, Isak, Jakob, Judah nu ma cünyuthu; Perez nu Zera (manyi jja na Tamar), Hezron, Ram, Amminadab, Nashon, Salmon, Boaz (ma jja na Rahab), Obed (ma jja na Ruth), Jesse nu Kadimi David.

^6b-11 David tsü wina wala Israel nyithu ghan pi Babilon wi kushinyi sa wa kesa kecu bamyithu na ha: David, Solomon (ma jja na Uriya wubvü kesawa tsü), Rehoboam, Abijah, Asa, Jehoshafat, Jehoram, Uzziya, Jotham, Ahaz, Hezekiya, Manasseh, Amon, Josiya, nu Jehoiakhin nu ma cünyuthu.

^12-16 Babilon wi kushinyi kesa seng wina wala Jisu kepvügha kecu bamyithu na ha: Jehoiakhin, Shealtiel, Zerubbabel, Abiud, Eliakim, Azor, Zadok, Akhim, Eliud, Eleazar, Mathan, Jakob, nu Josef, ma Jisu pi Messiya le kekhiwa jja Maria tsü ya.

¹⁷ Tsalina Abraham na wala David kecu abvüye taghamejü ben, David na wala Babilon wi kushinyi kesa kecu abvüye taghamejü ben, nu wala Khrista kepvügha kecu abvüye taghamejü na ben.

Jisu Khrista Kepvügha

¹⁸ Hatinu Jisu Khrista pvüghaya. Ma jja Maria tsüna Josef na ma yale keü ketheng, isala manyi wubanyi npi sakewa wi Maria na Kemetha Ghamu wina atsa-npvü ya.

¹⁹ Josef na ketsatan nyi kesü, nu ma Maria yala kejüghe meya thsü mvu kesalina kuthila ajühcen ketheng tsü pakhiale sa.

²⁰ Isala ma tsüti meshen keben wi Apvüwa nyilo kesü na aman wina ma wi gho khi, “Josef, David shicübvüghawa, no Maria pi nwubvü sale kesa ghena nmessi lalo, kepaghenanye ma Kemetha Ghamu wina atsa-npvü tenle!

²¹ Ma atsa kesü pvüghaya ben, no ma nyan pi Jisu ciyalo — kepaghenanye ma kesami wina ma nyithu hangsha yaben.”

²² Ha tsüdila Apvüwa na atusenjüh-kechüwa wina khi ketheng tsü atsentsa cenya thsüle kesalina sa,

²³ “Ghala pvünyimetha kesü na atsa-npvü nu atsa kesü pvügha yaben, nu ma nyan pi Immanuel (ma jjügi ‘Anyiza na ithu ssiden’) ciben.”.

²⁴ Tsalina Josef na shagha nu Apvüwa nyilowa na ma kekiza ti ma Maria yaya.

²⁵ Isala Maria na atsa npi pvüghakeya chu ma Maria gweghe mehai nsa. Nu Josef na atsawa nyan pi Jisu ciya.