MARK 5 - Kemethajüh (N) (Re-editing) Bible (BSI)

Jisu na Anyi Nkemehai Ghamu Ssiketen sa pi mehaikecü

¹ Jisu nu ma sansikeyathu na Galilee Ghajü khhakawa Gerasa yyi wi ghoya.

² Jisu na ahun wina shhughoya meyi ciwi anyi kesü nkemehai ghamu ssi keten na ashüjjen jawi na gho ma metu.

³ Ma ashüjjen jawi hangden nu thola amighe ssüli lela pi ma bhenya nten.

⁴ Kepaghenanye matsü kejon wi lela amighe ssüli pi ma ccü ma kwen bhen lela ma assüli tsü pvüdhi nu ma ccü pi amighe cügheden. Ma zü ntsawa nu thola ma ghantenya nten.

⁵ Aghaja nu aghanan lela ma ashüjjen ja nu ayikhathu wi kegoe, nu keshüthangla magha nu ma ketanla alon pi ma kechen benden.

⁶ Ma alen kesie wina Jisu muya nu bvü gho kukedu ma kinyi.

⁷ Ma misikhhali magha nu khi, “Kemisintsa Anyiza Tsawa Jisu! No hi pi mangwa sa mvu ben nu? Hi nmeten lalo, hi Anyiza nyan wina no wi khieben.”

⁸ (Ma hati khi, kepaghenanye ha Jisu na “Nkemehai ghamu anyi ha miwi na shhugholo,” khi.)

⁹ Tsalina Jisu ma wi keü, “N-nyan thowa nu?” Anyi tsüwa na khineng, “Inyan na ‘Atenti’ -— kepaghenanye ikhang na kejon la!”

¹⁰ Ma Jisu wi ayyi tsüwa wina mathu kesun pi nbvü thsü lalo keshikene.

¹¹ Ciwi avü khang keti kesü na ayikha wi atsse yaden.

¹² Tsalina nkemehai ghamuthu na Jisu wi khie, “Ikhang kesun pi avü jawi wa thsülo, isathu, ikhang wala avü gwo wi dua na.”

¹³ Jisu na mathu ya tsüti sa thsüa, nu nkemehai ghamuthu na anyi tsüwa wina shhugho nu wa avüthu gwo wi dua. Akhang tsüwa wi avü hazar keni-u tsüdila kejügüli sen nu alonshi pang wi wha nu aghajü wi du meyanthi shan.

¹⁴ Anyi avü kehiethu na bvü sen wa anyuti nu alli tsüdi wi ajüh ha pi thangchia. Anyithu na mangwa saben nu kesa ghangle gho,

¹⁵ nu mathu na Jisu wi kegho wi anyi kheni atsaghang tenti ssi ketenwa tsü muya. Ma ciwi athsü mphi nu ma leben metsashhu donkiben, nu mathu na sashü na messiya.

¹⁶ Ha mukeyathu na wala anyi atsaghangthu ssi ketenwa nu avüthu miwi mangwa khati sa khe khi pi anyithu kiza.

¹⁷ Tsalina mathu na Jisu ya mathu yyi wina bvülo khie.

¹⁸ Jisu na ahun wi du keten wi anyi kheni atsaghang ssi ketenwa tsüna ma wi “Hi la no gweghe wa thsülo” khie.

¹⁹ Isala Jisu na ma ya tsüti nsa thsü nu ma wi kiza, “Njjen wi ntheghithu wi wha nenglo, nu Apvüwa na nghena mangwa sachi cü, nu ma khatila no nantizen chicü khe pi mathu kizalo.”

²⁰ Tsalina anyi tsüwa na Anyuti Tagha tsüdi wi wala Jisu na ma ghena mangwa sa chicü khe khi pi nyu kiza. Nu tsü cüki zakeyathu tsüdila amansa.

Jaira nga nu Nza Jisu Thsü Kedhen kechiwa

²¹ Jisu na aghajü pvüdhi sen khhakawa wi ki neng. Ciwi aghajü ghüsa wi anyitenti na ma vüben.

²² Jaira, Sinagog wi kedi kesü na gho Jisu mukeya wi ma nkhwendu,

²³ nu Jisu wi keshikene nu khi, “Inga ghanyi tsüna keshü pang sa wadha. No ncha la, ghola nkwen chang pi ma miwi chinu ma ya mehaiya nu hangya thsülo.”

²⁴ Jisu na anyi tsüwa gweghe waden. Anyitenti keti na ma niewa keten ghena nyu na ma khebhon sen nu waden.

²⁵ Ciwi nza kesü ma gwo wi amapi taghakeni ajjü keji nu ketizen sa ntsa sa,

²⁶ nu ma keben tsüdi dedi pi dawakechüthu yala ma noncca thsü lela mehai keyawa nye nmehai pfüpfüla wa kesa nyi na ben.

²⁷ Ma Jisu cüki zaya nu anyitenti jawi asengwa na shhugho Jisu thsü katen kidhenchi,

²⁸ nu ma ketanla khi, “Keujüla hi ma thsü ketan lela kidhenya lethu, hi mehaiyaben.”

²⁹ Ma wala Jisu thsü kidhenya meyi ma gwo wi ajjü kekiji khen; nu ma ketanla ma gwo wi ma kinaa tsü mehaiyadha kesa chüya.

³⁰ Tsümeyi Jisu na ma gwo wi kekhang shhudha kesa chüya kesalina ma khapeghe wa anyitenti wi keü, “Thowa na hi kidhenchi nu?”

³¹ Ma sansikeyathu na luneng, “Ghangchilo, anyitenti na no vü nu no khephon ben lethu, no khati nu, ‘Thowa na hi kidhenchi nu?’ isa keü ten nu?”

³² Isala Jisu na thowa na tsüti sa khe chüyale ghang kevüli wa.

³³ Nzawa na ma mehaikeya chüya nu gho ma messila kedheggü sen nu Jisu ccü wi nkhwendu nu ma wi atsentsa tsüdi pi kiza.

³⁴ Jisu na nzawa wi khi, “Inga, no kenondi na no sa pi mehai cüdha na; nlebencca whalo, nu no kinaa wi mehai cencuyalo.”

³⁵ Jisu na ha khitu keben wi Jaira jjen wina nyilothu pahan na gho ma wi kiza, “N-nga shüdhale. Mangkesa na Kesansiwa likesaghang saben nu?”

³⁶ Jisu na mathu jühkekhi tsü nkinala Jaira wi khi, “Nmessi lalo, nondi benyalo.”

³⁷ Isanu ma anyi thola ma gweghe nwa thsüla Pitor, James nu ma cünyuwa Johan ma kecheng ketan ssinu wa.

³⁸ Mathu na wala Jaira jjen cukeya wi Jisu na anyithu na ahathana nu magha ntsa qai keben muya.

³⁹ Ma nduku wi du nu mathu kiza, “Nthu mangkesa na ahathana nu maghala qaiben nu? Ghanyiwa ha nshü, isala ma jen ben le!”

⁴⁰ Mathu na ma nankeqhe wa, tsalina ma mathu tsüdi pi akhemi wi shhu thsüa, nu ma ghanyiwa bajja nu ma sansikeyathu kecheng tsü ketan ssiya nu ghanyiwa pi jen thsü ketheng pen wi du.

⁴¹ Jisu na lanyiwa kwen tsü zan nu ma wi khi, “Talitha koum,” ma jjügi “Tizüle, hi no kizaben, shaghalo.”

⁴² Tsümeyi ma shagha nu alentsenwa. (Kepaghenanye ma amapi taghakeni sadha.) Hati kesa wi mathu na amansa ntsa sa.

⁴³ Isala Jisu na ha pi thola nkiza lalo kesa mathu kiza ntsa sachi, nu “Pala pahan pi ma dsa thsülo” khi.