MARK 14 - Kemethajüh (N) (Re-editing) Bible (BSI)

Acho sa pi Jisu Keshun

¹ Shukeya kho nu Azimi nkechi mesa pi kemishu kho tsüna gho keten ghanan keni keben wi keqhaikedi ntsathu nu Ayenkesansithu na kuthila Jisu ghanya nu pi shü thsüale kesalina alen bha.

² Mathu na khi, “Anyithu na nkivvü thsüle kesalina akho sa keben jüwi ithu na hati sayishü.”

Bethani wi Adeli pi Jisu Kenyen

³ Jisu na Bethani wi agükedsa-kinaawa Simon jjen wi ben. Jisu na dsajjü keben wi nza kesü na nard deli ma men kedhu ntsa pi alabaster hikhu pongti chisen dughola pakhhi nu meyisha pi ma li wi chicü.

⁴ Anyi ciwi kebenthu na mathu leben minuya nu khokho wi khi, “Mangkesa na adeli pi hati dedi ben nu?

⁵ Adeli ha pi akutimen meza kecheng miwi jeü ya nu apisa tsü pi ketha-u cüya mehai le!” Isanu mathu na nzawa tsü ssi kitagha.

⁶ Isala Jisu na khi, “Ma ya tsüti sa thsülo! Nthu mangkesa na ma kivvüben nu? Ma ighena pala kemehai jiketsü sachidha.

⁷ Nthu na keshüthang la ketha-u gweghe benden, nu nthu na khathansha wi mathu kiqachi mvu khe saya mehai. Isala nthu na keshüthangla hi gweghe ben nben.

⁸ Ma saya kemehai qei wina sachidha, ma npi wina hi pi kevhü ghena kidenya thsüle adeli pi igwo nyen cüdha.

⁹ Hi khili atsentsa nthu kizaden, ayyi khiewi Ajühkemehaiwa ha pi khiwa khe ma ighena kulikechi cüki ha pi khiben.”

Judah na Jisu Matsa Cüle Cenkeya

¹⁰ Tsaseng wi Iskariot Judah sansikeyathu Taghakeni jawi kesü tsüna Jisu ghan pi keqhaikedi ntsathu cüale bvüa.

¹¹ Mathu na Judah jüh kekhi tsü za pi anongheya nu apisa pi ma cüle khishichia. Tsalina Judah na Jisu ghan pi mathu cüale kesa matsü kemehai tsü ghang.

Jisu Ma Sansikeyathu gweghe Shhukeya Kho Tsse dsa

¹² Azimi nkechi mesa pi kemishu Kho tsathang atuwa wi Shhukeya kho tsse ghena khaghaneni zza kepathi ghanan wi sansikeyathu na Jisu wi gho ma keü, “No ikhang yala khiewa wa nghena Shhukeya kho tsse tsü kidenya thsü mvuben nu?”

¹³ Tsaseng wi Jisu na hati khi nu ma sansikeyathu meshu keni kesun pi wa thsü, “Nshinyi anyunutiwa wi tsü walo, ciwi anyi kesü atssü lakhü pvü keten nshinyi metuya ben na. Ma nie wa

¹⁴ ma ajjen khiewa du khe wala ajjen pvüwa wi keüla, ‘Kesansiwa na khiben, hi sansikeyathu gweghe Shhukeya kho tsse dsa keten benwa tsüna khiewa nu?’

¹⁵ Isathu, ma ajjenshha tangwa wi keshondhi keti kemehai kesü tsütson pi nshinyi ccüca ben na ciwi ikhang ghena kiden-kesha yalo.”

¹⁶ Sansikeya keni na anyunutiwa wi tsü wa nan Jisu na manyi kiza ketheng tsüti tsüdila muya, nu manyi Shhukeya kho tsse tsü kidenya.

¹⁷ Minulen wi Jisu na sansikeyathu Taghakeni ssinu gho.

¹⁸ Mathu na miz miwi dsajjü keben wi Jisu na khi, “Hi atsentsa nthu kizaden, nthu meshu kesü na hi matsa cüben — hi gweghe dsa kebenwa.”

¹⁹ Sansikeyathu na ahathana nu meshu kesüsü na ma wi keü, “No ntsakhiwa hi khi nben she?”

²⁰ Jisu na luneng, “Tsüna no Taghakeni jawi kesü hi gweghe akhu kesü wi amesa dsa kebenwa tsü.

²¹ Anyi Tsawa tsüna Ntsawajüh wi ma ghena khi ketheng ti shüaben, isala Anyi Tsawa matsa cü ketenwa tsü khatila qhethiketen saten nu! Anyi tsüwa ghena tsü pvügha nkeghowa la mehai kesa le!”

Apvüwa Ssinu Kemishu

²² Mathu na dsajjü keben wi Jisu na amesa be kesü khuya nu keseng kekhie sachi, tsü pakhhiya, nu tsü pi ma sansikeyathu cü. Ma khi, “Ha pi dsayalo, hawa ha igwo.”

²³ Tsaseng wi ma ahyi kesü la khuya, Anyiza wi keseng kekhie sachi, nu tsü pi mathu cü; nu mathu tsüdila tsü jjüya.

²⁴ Jisu na khi, “Hawa ha ijjü, anyi kejon ghena keji kechiwa tsü, ijjü wi Anyiza cenkethenjüh sa keyawa tsü.

²⁵ Hi atsentsa nthu kizaden, hi Anyiza Kadiyyi wi kisengtssü ketheüwa ha kejjü tsathang npi kecu chu hi kisengtssü ha jjü neng nbendha.”

²⁶ Tsaseng wi mathu akhwi kesü satheng nu Oliv Yikha wi wa.

Pitor na Jisu Nchüle Khiaketen Kekhi

²⁷ Jisu na mathu wi khi, “Nthu tsüdila hi teshi nu bvüaben, kepaghenanye Ntsawajüh kekhi na, ‘Hi anenikehiewa pathi nu khaghaneni tsüdila bvüzigheaben.’

²⁸ Isala hi hangneng-keshagha seng wi nthu tuwi na Galilee wi waben.”

²⁹ Pitor na ma wi khi, “Mathu tsüdi no teshi lela hi tsü no teshi nben le.”

³⁰ Jisu na Pitor wi kiza neng, “Hi atsentsa no kizaden, shita awegü keni tughu npi kekhou wi no kecheng tughu hi nchüle khiaben.”

³¹ Pitor na mataghang khineng, “Hi khiela tsüti khi nben, hi no gweghe lela shüaben.” Sansikeyathu kepa la tsüdi tsü makesü khia.

Jisu na Gethsemane Wi Kekhie

³² Mathu na apen kesü Gethsemane wi tsü ghoya, nu Jisu na ma sansikeyathu wi khi, “Hi wa kekhie sa keben jü he wi donki ben lalo.”

³³ Ma Pitor, James, nu Johan ma kecheng ssinu ma gweghe wa. Leben ketizen kesa nu agüccü ntsa kesa na ma miwi ghoa,

³⁴ nu ma mathu wi khi, “Ileben gükeccü di ntsawa sa pi hi shüa keten ti sawadha. He wi ben nu hi hie ben lalo.”

³⁵ Ma tsü miwi keu whala ayyi wi qancadu nu saya mehaithu ketizen kesa tsüwa tsü pi ma ghü thsülo kesa kekhie sa.

³⁶ Ma khie, “Aba! IBa, no saya mehai lethu hi wi ketizen kesa hyiwa ha khuya cülo, isala hi kenen nye le, no kenen ti sayalo.”

³⁷ Ma kheneng gho nan sansikeyathu ma kecheng na jen keben muya. Ma Pitor Simon wi kiza, “Simon, no jenben kwe? No amighe kekihhe kesü jü ketanla hi hie meya kwe?”

³⁸ Nu ma mathu wi khi, “Nthu kemechu wi ndule kesalina kiden-kesha nu kekhie saki benlo. Aghamu wi sa mvuthi ben, isala asajjü wi tsü nchaladha.”

³⁹ Ma kheneng whala kishi kekhi ti khi nu kekhie sa.

⁴⁰ Tsaseng wi ma kheneng gho nan sansikeyathu na jen keben muya; mathu na anyon nküchala benla. Nu mathu na mangla khi pi ma keluneng yen nchüla.

⁴¹ Ma kecheng tughuwa kheneng kegho wi ma mathu wi kiza, “Nthu khili kecu cca jenben kwe? Cendha! Matsü na ghodha le! Ghangchilo, Anyi Tsawa tsü khili ghan pi kesami nyithu kwen wi chia tendha.

⁴² Shaghalo, ikhang wha na. Ghangchilo, anyi hi matsa cü ketenwa tsüna he wi tendha!”

Jisu Ghankeya

⁴³ Jisu na ajühkhitu keben wi sansikeyathu Taghakeni jawi kesü Judah tsüna gho. Ma anyitenti kesü na njünnu nu achanghonthu sen keten keqhaikedi ntsa, Ayenkesansi, nu keshenpfüthu wina kesun kechi ssinu gho.

⁴⁴ Judah na azensu kesü sa pi mathu cü nu khitheng; “Hi wa anyi kesü kimang chithu tsüna nthu ghanya mvu kebenwa tsüna, ma ghan sen nu bvülo.”

⁴⁵ Judah na ghola cuya meyi ma Jisu wi wha nu khi, “Kesansiwa,” isanu ma kimangchi.

⁴⁶ Tsalina mathu na Jisu ghan pi bhenya.

⁴⁷ Isala ciwi ngan kebenthu meshu kesü na njünnu hanshi pi Keqhaikedi Kemisi maghawa khuna handhia.

⁴⁸ Isanu Jisu na mathu wi khi, “Nthu na hi pi kaghanfü nyi kesü ti sa nu njünnu nu achanghonthu sen nu hi ghanyale ghoben kwe?

⁴⁹ Hi atsathangla Kekinyijjen wi nthu sansi lela nthu na hi ghan meya. Isala Ntsawajüh tsüna sacen metsi le.”

⁵⁰ Tsaseng wi sansikeyathu tsüdila ma teshi nu bvüa.

⁵¹ Kepvüza nyi kesü linenthsü ketan mphi ketenwa tsüna Jisu nieden. Mathu na ma ghanyale sa,

⁵² isala ma ma thsü teshi theng nu kemessü bvüa.

Jisu na Ajühkekaghaten Tuwi kewa

⁵³ Tsaseng wi Jisu ssinu Keqhaikedi Kemisiwa jjen wi keqhaikedi ntsathu, Ayenkesansithu, nu keshenpfüthu na saghu keben wi tsü wa.

⁵⁴ Pitor na temeja wina ma nie sen Keqhaikedi Kemisiwa jjen ccühha wi du. Ciwi ma aghikehiethu gweghe donki nu anni kihang ben.

⁵⁵ Keqhaikedi ntsathu nu ciwi kemehu mabenla Jisu pi shü thsüale kesalina mathu na ma kesami bha lela kesü la mu meya.

⁵⁶ Anyi kejonla milikemesa khi pi Jisu shun lela mathu jüh makesü sa meyala.

⁵⁷ Pahan na shagha hati milikemesa khi pi Jisu shun,

⁵⁸ “Ma hati kekhi ikhang zale, ‘Hi anyi na kesa Kekinyijjenwa ha yasa pi nu ghanan kecheng jü wi anyi na nkesawa tsü sacü benle.’ ”

⁵⁹ Mathu na tsüti khi lela mathu jüh makesü sa meya.

⁶⁰ Keqhaikedi Kemisiwa na mathu tsüdi tuwi na shagha nu Jisu keü, “Mathu na no kekimenni jüh hati pi no shun keben ha no luneng nten kwe?”

⁶¹ Isala Jisu na ccen ben wa nu ajüh kesüla nkhi. Keqhaikedi Kemisiwa na kheneng ma wi keü, “No Messiya, Kemisi ntsa Anyiza Tsawa tsü kwe?”

⁶² Jisu na luneng, “Hi tsüle; nu nthu tsüdila Anyi Tsawa na kekhang ntsawa kwen ajewa donki nu tang wi akulukeshü miwi na gho keten muyaben!”

⁶³ Keqhaikedi kemisiwa na ma thsü mezüqhe nu khi, “Ithu na ha miwi chüza nsenla mehaidha!

⁶⁴ Nthu na ma Anyiza kethenjüh kekhi zayadha. Nthu kemeshen tsü khati nu?” Mathu tsüdila ma meshensa, nu ma pi keshü thsü-ule sa.

⁶⁵ Mathu pahan na Jisu meshuki, ma nyon qhanbhon nu ma kihhe nu “Thowa na no kihhe ben khe khi nanlo,” isa khi. Nu aghikehiethu na ma cen cü nu ma ssiya.

Pitor na Jisu Nchüle Kekhi

⁶⁶ Pitor na accühha non wi keben wi Keqhaikedi Kemisiwa maghale ghala kesü na gho.

⁶⁷ Ma Pitor na anni kihang keben mukeya wi ma ghangti nu khi, “No la Nazareth nyiwa Jisu tsü gweghe keten nyi le.”

⁶⁸ Isala ma nyele khi nu luneng, “Hi nchü ... no mangwa khiben khe hi nchü.” Isanu ma akhemi wi shhua, tsümeyi awegü na khou shagha.

⁶⁹ Ghala maghalewa na ma muya nu ciwi ngan kebenthu wi “Ma la mathu jawi meshu kesü,” isa khi.

⁷⁰ Isala Pitor na ma nchüle khineng. Matsü keu seng wi ciwi ngan kebenthu na kheneng Pitor wi khineng, “No la Galilee nyi ghena no mathu jawi meshu kesü sabenla metsi le!”

⁷¹ Isala Pitor na khi, “Hi kishen nu atsentsa khiben, nyelethu Anyiza na hi meten cüben le! Hi nthu na khi kebenwa anyi ha nchü le!”

⁷² Tsümeyi awegü na keni tughu khou shagha, nu Pitor na Jisu khati le ma kiza khe tsü meshenya, “Awegü keni tughu npi kekhou wi no kecheng tughu hi nchüle khiaben.” Ma ayyi wi qancadu magha nu qai wa.