MALAKHI 2 - Kemethajüh (N) (Re-editing) Bible (BSI)

¹ Kemisintsa Apvüwa na keqhaikedithu wi khiben, “Ayenkhukechi hawa ha nthu ghena:

² Nthu kekuli wi hi nkinyiküthu yishü. Keujüla nthu na hi mangwa khi khe nkina mvu lethu, hi kishen-keshi kesü sengho nthu miwi chicüaden . Hi kishen-keshi kesü pi nthu kesawegü mukeyathu miwi chicüaden. Hi kishen-keshi pi tsüthu miwi chidha, kepaghenanye nthu na meshen pi dhu nu iyenkhukechiwa tsü nkeya ghena.

³ Hi nthu tsangathu meten cüden nu nthu na asahang pi ahhansha kesathu keku tsüpi nthu mmi nyen cü, nu nthu khusen wa akeku jawi chiaben .

⁴ Tsaseng wi nthu na hi ayenkhukechi ha pi nthu cüle kesa chüyaben, isanu hi Levi shicübvügha keqhaikedithu sinu cenkethenjüh sa kethengwa tsü pakhhi nben.

⁵ “Hi cenkethenjüh witsü hi mathu wi kahang nu hang kemehai khishi theng, nu hi ha pi mathu cüdha, isanu mathu ya hi kinyikü thsüle kesalina. Kheni tsüwi mathu na hi kinyikü nu messi gho.

⁶ Mathu na kesazziwa nyela kemeshonwa pi sansi. Mathu na hi ssinu ajühkeyali nu hang; mathu na kemeshonwa kesa ketan nyela nyu kepa wila kejon kiqa pi nkemehai nsa thsüla.

⁷ Anyiza cüki atsentsawa tsüpi kesansi tsüna keqhaikedithu kekuli. Anyithu na mathu wi wa hi kemeshen tsü chükeya-u, kepaghenanye mathu na Kemisintsa Apvüwa nyilothu.

⁸ “Isala no keqhaikedithu na khili alen kemeshonwa wina bvüdha. Nthu kesansijüh na anyi kejon sapi sazzi thsüdha. Nthu na hi nthu ssinu cenkethenjüh tsü pakhhidha.

⁹ Tsalina hi tsü kuti wi Israel nyithu sapi nthu nkhichi thsüladen, kepaghenanye nthu na hi kemeshen tsü n-nie, nu nthu na inyithu kesansi wi anyi tsüdi pi makesü nkesa ghena.”

Anyithu na Anyiza wi Lebentsentsa nkesa

¹⁰ Ithu tsüdila aba kesütan nye kwe? Anyiza makesü na ithu nsachi kwe? Isalethu mangkesa na ithu khokho wi khishikechithu tsü bheghe, nu Anyiza na ithu bamyithu ssinu cenkethenjüh tsü nkhichi saben nu?

¹¹ Judah nyithu na Anyiza wi mathu jühkhishi kechi tsü pakhhi nu Jerusalem nu diyyiwa tsüdi wi nankiqanan kekuli kesü sadha. Mathu na Apvüwa na nenketen Kekinyijjenwa tsü nakhidha. Npvüzathu na nza asang cenpvüthu kinyi ketenthu tsü yayadha.

¹² Apvüwa yala Israel zilashü jawi na anyi hati kesawa tsü khupi kesawa sa, nu ma ya khiela ithu mizzatenti na sengho Kemisintsa Apvüwa kekinyi witsü nsaghu neng thsü lalo.

¹³ Nthu na kepa wi hati la saden. Nthu na kekinyithu sengho Apvüwa kecü tsü ma meyala kesa ghena nthu na kohon nu qai pi nthu nyontssü pi ma kekinyipen tsü zügü.

¹⁴ Nthu na ma mangkesa na tsü meyala khe keü. Tsüna nthu na kepvüza tsü wi nthu wubvü keya wi kekhishijüh tsü pakhhi kesa ghena le kesa ma chüben. Nzawa na no kegweghewa, no Anyiza tuwi ma wi ajüh tsentsa sa benle khishi theng lela no tsü pakhhidha.

¹⁵ Anyiza na nshinyi pi agwo kesü nu aghamu kesütan sa thsü ntheng kwe?

¹⁶ Apvüwa Israel Nyizawa na khiben, “Hi keyishali kesa tsü nanmeghüden. Khathansha wi nthu meshu kesü na ma wubvü miwi kedaggü hati sa khe hi tsü nanmeghüden. Nthu wubvü miwi ajühtsentsa sale khishiketheng tsü npakhhila metsilo.”

Ajühkekaghaten tsathangwa na Tetsakidha

¹⁷ Nthu na ajühkhi pi Apvüwa likesaghang sa wadha. Isala nthu na keüden, “Ithu na khatinu ma sapi alisaghang thsü ben nu?” Hati kekhi wina le, “Kemisintsa Apvüwa na nkemehai kekulithu tsüdila pi mehaile meshenden; ntsakhiwa ma tsüthu nenden.” Nyelela hati keüden, “Atsentsawa Anyiza sa ketenwa tsüna khiewa ben nu?”