Luk Zhükechi Jühtheü Kemehaiwa 4 - Kemethajüh (N) (Re-editing) Bible (BSI)

Jisu Kemechu

¹ Jisu na Kemetha Ghamu pi ma pong pvü Jordan Ghaku wina kegho wi Aghamu na ma ssinu ayyikeshü wi wa,

² ciwi atsaghang na ghanan jügha nu ghaja jügha ma mechu. Ma tsü tsüwi mangla ndsa la kesalina ma tsü cenkeya wi ghamaya.

³ Atsaghang na ma wi khi, “Keujüla no Anyiza Tsawa lethu, alon hathu kiza nu amesa ceng thsülo.”

⁴ Isala Jisu na luneng, “Ntsawajüh na khiben, ‘Anyi na amesa ketan sen nu hangya nten.’ ”

⁵ Tsaseng wi atsaghang na ma ssinu apen kemisi wi ki nu ayyi wi kadiyyi tsüdi pi ma ccüca,

⁶ nu ma wi khi, “Hi hathu miwi kekhang senya kemehai nu tsüthu nyankethang la pi no cüaben, kepaghenanye ha tsüdi pi hi cüdha, nu hi tsü pi hi kenenwa cüya mehai.

⁷ Tsalina keujüla no kukedu hi kinyi lethu ha tsüdila nji saben.”

⁸ Jisu na luneng, “Ntsawajüh na khiben, ‘Apvüwa n-Nyiza kinyilo nu ma kekuli ketan salo!’ ”

⁹ Tsaseng wi atsaghang na ma ssinu Jerusalem wi wa nu Kekinyijjen mili wi ki nu ma kiza, “Keujüla no Anyiza Tsawa lethu, no ketanla he wina qanca dulo.

¹⁰ Kepaghenanye Ntsawajüh wi khiben, ‘Anyiza na ma nyilothu kesun pi no nonccaya thsüaben.’

¹¹ Hati la khiben, ‘Nccü pi alon miwi ncütenaa thsüle kesalina mathu kwen pi no pieyaben.’ ”

¹² Isala Jisu na khineng, “Ntsawajüh na khiben, ‘No Apvüwa n-Nyiza nmechu lalo.’ ”

¹³ Atsaghang na alentagha wi Jisu kemechu cenya theng nu matsü keujü ma teshi nu bvüa.

Jisu na Galilee wi Ma Kekuli Kesashhu

¹⁴ Tsaseng wi Jisu na Galilee wi gho neng, nu Kemetha Ghamu na ma ssiden. Ma cüki khi wa ayyi tsüdi kepong sa.

¹⁵ Ma Sinagogthu wi nyu sansi nu tsüdila ma seng.

Nazareth wi Jisu Meya Mvula

¹⁶ Tsaseng wi Jisu na ma hang keshagha nyu Nazareth wi wa khenighani ti Sabbath tsathang wi Sinagog wi wa nu shagha Ntsawajüh si.

¹⁷ Isa atusenjüh-kechüwa lesüshen pi ma cü nu ma tsü shiwa nan hati zhü ketheng muya:

¹⁸ “Apvüwa Ghamu na imiwi ben, kepaghenanye ma hi ya ajühkemehaiwa pi ketha-u sansilo hi kessiya. Ma hi kesun pi atssüzüthu teshi chicü, anyon nkemuthu muya thsü, Ketizen kesathu lisha chicüden kesa pi thangchilo,

¹⁹ nu Apvüwa na gho ma nyithu hangshaya keten mapi la pi thangchilo kesalina.”

²⁰ Jisu na lesüshen tsü shanbhon pi anyi ciwi kebenthu cü nu donki wa. Anyi Sinagog wi kebenthu tsüdila ma ghang,

²¹ nu ma mathu wi khi, “Nansü nthu na za keben Ntsawajüh hana ntsakhiwa sacen bendha.”

²² Ma ajüh tsikemehai kekhi ghena mathu tsüdila ma seng nu amansa. Mathu na khi, “Ma Josef tsawa tsü nye kwe?”

²³ Ma mathu wi khi, “Hi chütiben, nthu na ajühbvü kekhi ti ha pi hi kiza metsi, ‘Dawa kechüwa no ketanla no sa pi mehai yalo.’ Nthu na hi Kapernaum wi kulikechi cüki zakeya tsüti he wi inyu nyutiwa wi la sachilo hi kizaben.

²⁴ Jisu na khi, “Hi nthu kizaden, atusenjüh-kechü kesü tsüna khiela ma hang keshagha nyuti wi ma ssiya nten.

²⁵ Ijüh kinachilo: ntsakhiwa kheni Elijah tsüwi amapi kecheng nu gishü pahan atsan ngho la kesalina ayyi maben wi azeng sa, nu Israel nyithu jawi denyile kejonla ben;

²⁶ isala Elijah kesun pi Israel kesü jjen wi la nchila pi Sidon yyi wi Zarefath wi hang keten denyile kesü jjen wi chi cü.

²⁷ Nu atusenjüh-kechüwa Elisha tsüwi agükedsakenaa nyi kejonla Israel wi hangben; isala mathu kesütanla mehai meya isani Siriya nyiwa Namaan ketan mehaiya.”

²⁸ Anyi Sinagog wi kebenthu na ha zaya nu mathu lebenminu.

²⁹ Mathu na shagha anyuti wina Jisu zanshia, nu mathu na ma ssinu ayikha shoni wi anyuti sa ketheng wi tsü ki. Mathu na ma pi alonshi pang wi khala chiale sa,

³⁰ isala ma shagha anyitenti jawi na ndaqhe bvüa.

Anyi kesü Nkemehai Ghamu Ssiketen

³¹ Tsaseng wi Jisu na Galilee wi Kapernaum nyuti wi wa nu Sabbath tsathang wi ma anyithu sansi.

³² Mathu tsüdila ma nyu kesansi tsü kina pi amansa, kepaghenanye ma kekhang sen nu ajühkhi.

³³ Sinagog wi anyi kesü nkemehai ghamu ma miwi kebenwa na maghala jisha nu khi,

³⁴ “Ah! Nazareth nyiwa Jisu, no ikhang miwi mangwa sa mvu ben nu? No he wi ikhang yasale ghoben kwe? Hi no thowa khe chüben, no Anyiza nyilo kemethawa!”

³⁵ Jisu ma satekü nu khi, “Ccen benlo, ma wina shhugholo!” Isanan atsaghang tsüna mathu tuwi na anyi tsüwa pvükhakuli pi ayyi wi cüchi nu ma miwi mangla nsala shhugho.

³⁶ Anyithu na amansa nu khokho wi khi, “Ma jühthu ha khati ladha nu! Anyi hawa ha ajüh kekhang keben nu kekhang pi nkemehai ghamuthu kiza nan mathu na ma jühkina nu shhughodha le!”

³⁷ Isanu Jisu cüki tsüna ayyi tsüwa wi apen tsüdi wi kepong sa.

Jisu na Anyi Kejon sa pi Mehaikecü

³⁸ Jisu na Sinagog teshi nu Simon jjen wi wa. Ciwi Simon nyie na sashü na muwheben, nu mathu na ma cüki khi pi ma kizachi.

³⁹ Ma wala ma we katen wi nganya nu kemuwhewa tsü ma teshilo khichi. Ma nmuwhela nu wan shagha kugü pi mathu cü.

⁴⁰ Aghani du keten wi apvüshang kebenthu tsüdila kesakinaa kepapa kepvüthu ssinu Jisu wi gho; ma ma kwen chang pi mathu tsüdi miwi chi nu mathu sa pi mehai cü.

⁴¹ Atsaghangthu la anyi kejon wina maghala “No Anyiza Tsawa le!” khi nu shhughoa. Atsaghangthu na ma Messiya le kesa chü keben ghena Jisu na mathu satekü nu mathu ya ajüh nkhi thsüla.

Jisu na Sinagog wi Nyu Kesansi

⁴² Atsathang shagha meyi Jisu na anyuti teshi nu kecaghang pen kesü wi wa. Anyithu na ma bha wa ma mukeya wi mathu na ma nbvü thsüle sa.

⁴³ Isala ma mathu wi kiza, “Hi Anyiza Kadiyyi Jühtheü Kemehaiwa ha pi anyuti kepathu la nkizathu yishüben, kepaghenanye tsü salo kesa ghena Anyiza na hi kesunchi.”

⁴⁴ Tsalina ma diyyiwa maben wi wala Sinagogthu wi nyu sansi.