Luk Zhükechi Jühtheü Kemehaiwa 22 - Kemethajüh (N) (Re-editing) Bible (BSI)

Jisu Ghanyale Achokesa

¹ Shhukeya Kho azimi nkechi mesa pi Kemishu Kho tsüwa na tetsakia.

² Keqhaikedi ntsathu nu Ayenkesansithu na anyithu messi kesalina mathu alen bha nu kuthila Jisu pi shü thsüale sa.

Judah na Jisu Matsa Cüale Kecen

³ Tsaseng wi Satan na Judah Iskariot, sansikeyathu Taghakeni jawi kesü tsü leben wi dua.

⁴ Tsalina Judah na shhula ma khati nu Jisu matsa pi mathu kwen wi chiya nu kesa keqhaikedi ntsathu nu Kekinyijjen ghikehie kedithu ssinu keccünengli.

⁵ Mathu na anongheya nu apisa pi ma cü.

⁶ Judah la tsü anlo sa nu anyithu nchü thsüla Jisu ghan pi mathu kwen wi chiale kesa matsü kemehai ghang wa.

Jisu na Shhukeya Kho tsse dsale Kekiden

⁷ Shhukeya Kho ghena azimi pi nkechi mesa pi Kemishu Kho wi khaghaneni zza kepathi tsathang na gho cua.

⁸ Jisu na hati khi nu Johan nu Pitor manyi kesun pi wa thsü, “Ithu gweghe Shhukeya Kho tsse dsale kesalina wala kidenyalo.”

⁹ Manyi na ma keü, “No ishinyi ya wa khiewa kidenya thsü mvuben nu?”

¹⁰ Ma luneng, “Nshinyi na anyunutiwa wi du lethu, anyi kesü na atssü khüti pvü keten metu yaben. Ma niesen nu ma ajjen khiewa wa khe ciwi dulo,

¹¹ nu ajjen tsü pvüwa wi khilo, ‘Kesansiwa na no keü ben, hi sansikeyathu ssinu Shhukeya Kho tsse dsa keten tsüna ajjen-keshondhi khie wi nu?’

¹² Isalethu ma ajjenshha tangwa keshondhi keti kesü pi nshinyi ccüca benna ciwi pala tsüdi kidenyalo.”

¹³ Manyi wa nan Jisu na manyi kekiza tsüdila muya, nu manyi Shhukeya Kho tsse tsü kidenya.

Apvüwa Ssinu Kemishu

¹⁴ Matsü na kegho wi Jisu na apostelthu ssinu miz wi donkiya.

¹⁵ Ma mathu wi khi, “Hi ketizen npi kesa wi nthu ssinu Shhukeya Kho tsse ha dsa mvu ntsa sale!

¹⁶ Kepaghenanye hi nthu kizaden, Anyiza Kadiyyi wi ha ma jjügi npi kesacen chu hi khiela ha dsa nbendha.”

¹⁷ Tsaseng wi Jisu na ahyi pieya nu Anyiza keseng kekhie sachi nu khi, “Ha pieya nu pi nthu jawi gishü yalo.

¹⁸ Hi nthu kizaden, Anyiza Kadiyyi na npi kegho chu hi khili nten na kisengtssü ha njjüdha.”

¹⁹ Tsaseng wi amesa be kesü khuya nu Anyiza keseng kekhie sachi nu pakhhiya nu pi mathu cü nu khi, “Hawa ha igwo, nthu ghena khukechiwa tsü. Hi meshen benle kesalina hawa ha satenlo.”

²⁰ Tsüti dsakeya seng wi ma ahyi pi mathu cü nu khi, “Ahyi hawa ha Anyiza na ijjü wina cenkethenjüh ketheüwa sa kechi nthu ghena keji kechiwa tsü.”

²¹ “Isala, ghangchilo! Hi matsa ketenwa tsüna he wi miz wi hi gweghe ben le!

²² Anyiza na khi ketheng ti Anyi Tsawa na shüaben, isala anyi ma matsa ketenwa ghena tsü khatila qhethiketen saten nu!”

²³ Tsaseng wi mathu na mathu jawi thowa na hawa ha sa ten nu kekeüli wa.

Kediwa sa keten ghena Keccücanli

²⁴ Sansikeyathu jawi thowa na kedi ntsawa sa ten nu kesa keccücanli shagha.

²⁵ Jisu na mathu wi khi, “Ayyi ha wi kadimithu na mathu nyithu miwi kekhang ben, nu kekhang kesenthu pi ‘Anyi pvüshangthu’ ciden.

²⁶ Isala nthu ghena tsü hati nyele, isani nthu jawi kedi ntsawa na ghanyi ntsawa ti, nu aliwa na amaghawa nsathu yishü.

²⁷ Donki nu dsajjü kebenwa la kugü pi ma cü kebenwa, manyi thowa di nu? Donki kebenwa le. Isala hi kugü pi cü kebenwa tsüti sa nu nthu jawi ben.

²⁸ “Nthu na hi ketizen kesa tsüdi wi hi gweghe ben;

²⁹ nu iBa na kekhang senya kemehai pi hi kecü tsüti hi la pi nthu cüden.

³⁰ Nthu na hi Kadiyyi wi hi gweghe dsa nu jjüben, nu nthu na kadipen wi donki nu Israel mizza Taghakeni miwi kekhang senben.

Jisu na Pitor Ma Nchüle Khiaketen Kekhi

³¹ “Simon, Simon! Kinalo! Satan na allikeca kesü na asu kemeshhü ti, kemehai nu nkemehai pi kepapa sale kesalina nthu tsüdi ghan nanle khieyadha.

³² Isala Simon, no kenondi nmi lathu keyishü ghena hi nghena khie. Nu no hi wi kheneng gho lethu, no npvüshangthu leben satezü cülo.”

³³ Pitor na luneng, “Apvüwa, hi no gweghe atssüzü sa wa nu no gweghe shüya mehai le!”

³⁴ Jisu na khi, “Pitor, hi no kizaden, no shita wi kecheng tughu no hi nchüle npi kekhi chu awegü na khou nben.”

Apisa Hikhu, Ajula, nu Njünnu

³⁵ Tsaseng wi Jisu na ma sansikeyathu keü, “Hi nthu na apisa hikhu, ajula, nyelela accüguwen nsenla kesunshi kechi wi nthu na pala pahan zeng kwe? Mathu na khineng, “Nyele, mangla nsale.”

³⁶ Jisu khi, “Isala khilitsü thowa na apisa hikhu nyelela ajula ben khe khuyalo, nu thowa na njünnu nmi khe ma gwomejuwa jeü pi kesü sheiya nsathu yishü.

³⁷ Hi nthu kizaden, Ntsawajüh wi hati ighena khi ketheng tsü sacen nsathu yishü, ‘Ma pi kesami nyithu jawi sichi ghudha,’ kepaghenanye ighena zhü kethengwa tsü sacen nsathu yishü.”

³⁸ Sansikeyathu na khi, “Apvüwa, ghangchilo! He wi njünnu keni ben le!” Ma khineng, “Tsüna mehaidha.”

Jisu na Oliv Yikha wi Kekhie

³⁹ Jisu na khenighani sa keten ti anyunutiwa tsü teshi nu Oliv Yikha wi wa; nu sansikeyathu la ma gweghe wa.

⁴⁰ Nu ma wala apen cukeya seng wi mathu wi kiza, “Nthu na kemechu wi ndule kesalina kekhie saki benlo.”

⁴¹ Tsaseng wi ma mathu teshi nu alon pi kethenchi-u wi wa ma khutsüdu nu kekhie sa.

⁴² Ma hati khi, “Iba, keujüla no kenen lethu hi wina ahyi ha khuyalo, isala hi kenen nyela no kenen ti sayalo.”

⁴³ Tangnyilo kesü tang wina gho ma satezü cü.

⁴⁴ Ma ketizen sa ntsa kekhie sa, nu tsü miwi la sa neng, nu ma keshijü na ajjü ti llesen nu ayyi wi qanca wa.

⁴⁵ Ma kekhie seng wi shagha nu sansikeyathu wi wha nan mathu na ahathanathi jen keben muya.

⁴⁶ Ma mathu wi kiza, “Nthu mangkesa na jenben nu? Nthu na kemechu wi ndule kesalina kekhie saki benlo.”

Jisu Ghankeya

⁴⁷ Jisu na ajühkhitu keben wi Judah, sansikeyathu Taghakeni jawi kesü tsüna aliwa sala anyitenti ssinu ghoa. Ma Jisu kete wi wha nu ma kimang chi.

⁴⁸ Isala Jisu na khi, “Judah, no Anyi Tsawa kimang nu ma matsa cüaten kwe?”

⁴⁹ Sansikeyathu Jisu gweghe ketenthu na khati saben khe mukeya wi mathu keü, “Apvüwa, njünnu pi mathu süla khati nu?”

⁵⁰ Isanu mathu meshu kesü na njünnu pi Keqhaikedi Kemisiwa maghawa khuna ajewa handhia.

⁵¹ Isala Jisu na khineng, “Teshi yilo, mehaidha!” Ma anyi tsüwa khuna pachi nu sa pi mehai cüa.

⁵² Tsaseng wi Jisu na ajühkhi pi ma ghanle keghothu keqhaikedi ntsathu, Kekinyijjen ghikehie kedithu, nu keshenpfüthu wi kiza, “Nthu na hi pi kaghanfü nyi kesü ti sa nu njünnu nu achanghonthu sen nu hi ghanle ghoben kwe?

⁵³ Hi atsathangla nthu gweghe Kekinyijjen wi ben lela nthu na hi ghan meya. Isala matsü hawa ha nthu ji nu kejang kekhangwa tsü sadha.”

Pitor na Jisu Nchüle Kekhi

⁵⁴ Mathu na Jisu ghanya nu ma ssi nu Keqhaikedi Kemisiwa jjen wi wa; nu Pitor na temeja wi ma nieden.

⁵⁵ Accühha non wi anni satheng nu Pitor la wa ciwi donki kebenthu gwegheya.

⁵⁶ Maghale kesü na ma anni kete wi donki keben muya nu gho ma ghangti nu khi, “Anyi ha la Jisu nieten le!”

⁵⁷ Isala Pitor na nyele nu khi, “Nzawa, hi ma thowa khe nchüle!”

⁵⁸ Matsü keu seng wi anyi kesü Pitor muya nu khi, “No la mathu jawi meshu kesü le!” Isala Pitor na luneng, “Hi nyele!”

⁵⁹ Nu amighe kekihhe kesü-u seng wi anyi kepa wi kesü la gho hati khi khvu sa, “Anyi hawa ha la ma nieten kesa chütiben, kepaghenanye ma la Galilee nyi kesü le!”

⁶⁰ Isala Pitor na luneng, “No mangwa le khiben khe hi nchü le!” Ma tsü khiben meshü awegü na wan khou shagha.

⁶¹ Apvüwa na khapeghe ghala Pitor ghangchi, nu Pitor na Apvüwa na mangwale ma kiza khe tsü meshenya, tsüna: “No shita awegü npi kekhou tuwi kecheng tughu no hi nchüle khiaben .”

⁶² Pitor na akhemi wi shhula qai ntsa wa.

Jisu Nankeqhe nu Kekiccü

⁶³ Anyi Jisu ghihie kebenthu na ma nankeqhe nu ma kiccüwa.

⁶⁴ Mathu na ma nyon qhanbhon nu ma wi keü, “Thowa na no shunben khe khi nanlo!”

⁶⁵ Mathu na kepa wi la pala kejon khi pi ma metsimeni.

Jisu na Ajühkaghaten Tuwi kewa

⁶⁶ Atsathang keshagha wi keshenpfüthu, keqhaikedi ntsathu, nu Ayenkesansithu na kemetuli, nu Jisu ssinu mathu tuwi gho.

⁶⁷ Mathu na ma wi keü, “Ikhang kizalo; no Messiya kwe?” Ma luneng, “Keujüla hi nthu kiza lethu, nthu na hi nondi nben,

⁶⁸ nu keujüla hi nthu wi pala kesü keü lethu, nthu na khiya nben.

⁶⁹ Isala khili nten na Anyi Tsawa na Kemisintsa Anyiza kwen ajewa wi donkiwa tendha.”

⁷⁰ Mathu tsüdila keü, “No Anyiza Tsawa kwe?” Ma luneng, “Nthu na hi tsüle khi.”

⁷¹ Mathu na khi, “Ikhang ha miwi chüza nsenla mehaidha le! Ikhang ketanla ma mangwale khi khe zayadha!”