Luk Zhükechi Jühtheü Kemehaiwa 14 - Kemethajüh (N) (Re-editing) Bible (BSI)

Jisu Na Kesakinaa Nyi Kesü sa pi Mehaikecü

¹ Sabbath tsathang kesü wi Jisu na Farisithu jawi kedi kesü jjen wi dsajjüle wa, nu anyithu na Jisu ghang ben.

² Ciwi anyi kesü atssü tsakenpvü na Jisu wi gho,

³ Jisu na Farisithu nu Ayenkesansithu wi keü, “Sabbath tsathang wi nyu sa pi mehai kecü ayen benla nmi nu?”

⁴ Isala mathu na mangla nkhi la. Jisu na anyi tsüwa sa pi mehai cü nu kesun pi bvü thsüa.

⁵ Tsaseng wi Jisu na mathu wi khi, “Keujüla nthu meshu kesü na atsa nyelela amesü süpon kesü ben nu Sabbath tsathang wi atssükhang wi khulidu lethu, Sabbath tsathang wi nthu na wan wala tsü zanshiya nben kwe?”

⁶ Isala mathu na ha ghena mangla khi pi ma luneng meyala.

Mezamegüshu Nu Kijünyi ssikeya

⁷ Jisu na kijünyi thu na apen kemehai ntsa kessi keben kemu wi ma ajühkaghape ha pi mathu tsüdila kiza;

⁸ “Nyu na keshanyi kemishu wi no qhechi lethu, wala apen kemehai ntsa witsü ndonki lalo. Kepaghenanye ma nmiwi kedikiwa la qhechi thengla ben.

⁹ Isathu apvüwa nshinyi qho qhekechiwa na gho no wi ‘Ma yala apen ha wi donki thsülo,’ khithu, ciwi no apen kemehaiwa wina ssanwa wi cüle kesa jügheben.

¹⁰ Tsalina nyu no qhechi lethu, wala apen ssanwa ntsawa wi donkiyalo, isathu npvüwa na ghola no wi ‘Ipvüshangwa, shhughola apen kemehai ntsawa wi benyalo,’ isa khiben. Isathu no akejjenthu tsüdi tuwi keseng pvüyaben.

¹¹ Kepaghenanye anyi kesü le kesü lela ma ketanla ma sa pi dithang ketenwa zansha cüben, nu thowa na ma ketanla ma satemeni ten khe zanki cüben.”

¹² Tsaseng wi Jisu na ajjen pvüwa wi kiza, “No aghanen nyelela shitawa nün kedsa wi nyu qhechi lethu, npvüshangthu, nshilithu, njenphon kebanthu, nqhechi lalo, kepaghenanye mathu la no qhechi nu nji tsü dhineng cüben.

¹³ No kemishu kesü sa lethu, ketha-u, akwen nu accü nkemehaithu, nu anyon nkemuthu qhechilo,

¹⁴ isathu no kemihhi muyaben, kepaghenanye mathu na no dhinengya nben. Anyiza na anyi kemehaithu keshü wi hangneng-keshagha ghanan wi no dhineng cüben.”

Kemishu Keti Kesü Pi Ajühkaghape

¹⁵ Ciwi meshu kesü na miz kete wi donki keben ajüh ha zaya nu Jisu wi khi, “Anyiza Kadiyyi kemishu wi donkiya ketenthu na khatila mihhi nu!”

¹⁶ Jisu na ma wi khi, “Ciwi anyi kesü na kemishu keti sa nu anyi kejonla qhechi.

¹⁷ Kemishu tsü kecu wi ma ma maghawa kesun pi akejjenthu wi kiza thsü, ‘Ghalo, pala tsüdila kiden yadha le!’

¹⁸ Isala mathu tsüdila ketizen khie wa. Anyi atuwa na amaghawa wi kiza, ‘Hi alli kesü shei theng, tsalina tsü ghang nwathu yishü benle, hi tizen chicülo.’

¹⁹ Kesüwa la khi, ‘Hi amesü süpon tagha shei theng nu tsüthu ghang waden, hi tizen chicülo.’

²⁰ Kepawa na khi, ‘Hi hajü iwubvü yatheng, tsalina hi ghaya nten.’

²¹ Amaghawa na kheneng whala ha tsüdi khi pi ma pvüwa kiza. Apvüwa na ma lebenminu ntsa saya nu ma maghawa wi kiza, ‘Wan wala alentonti nu anyuti wi ketha-u, anyon nkemu, nu akwen nu accü nkemehaithu tsüdi ssinu gho nenglo.’

²² Tsaseng wi amaghawa na khi, ‘Kediwa, no kekhi tsüti sadhale, nu he la apen na ben le!’

²³ Tsalina apvüwa na amaghawa wi khi, ‘Wala alentonti wi nu anyuti wi anyithu ci sengho ijjen pongya thsülo.

²⁴ Kepaghenanye hi nthu kizaden, anyi hi kishi qhechi kethengthu kesütanla itsse tsü dsa nben!’ ”

Sansikeyawa Na Kesa-u

²⁵ Kuti anyitenti keti kesü na Jisu gweghe wa keten wi ma khapeghe wa mathu wi kiza,

²⁶ “Anyi kesü le kesü lela ma hi wi ghala ma ba nu ma jja, ma wubvü nu ma tsangathu, ma cünyu nu ma tssüggüthu, nu ma ketanla ma ketizen miwi hi tizen nkeya tsü ma hi sansikeya nyi nsa qo.

²⁷ Thowa na ma ketanla ma kross pvünu isen nie n-gha khe ma hi sansikeya nyi saya nben.

²⁸ Keujüla nthu meshu kesü na aducü zhü mvu ben lethu, ma atuwa sa donki nu khaju pi tsü saben khe hesha nanlo. Ma apisa tsü sacenkeya benla nmi khe n-ghang chithu yishü.

²⁹ Keujüla ma tsüti nsa lethu, ma aducü giketegü seng wi tsü sacen meyala lethu tsü kemuthu tsüdila ma nankeqhe,

³⁰ nu hati khiben, ‘Anyi hawa ha kekuli sa shagha, isala sacen meyaladha.’

³¹ Keujüla kadimi kesü na anyi hazar tagha ssi wa kadimi kepawa anyi hazar ngwe ssi gho ketenwa tsü ssisa lethu, ma atuwa sa donki nu ma kadimi kepawa tsü chaya benla nye khe südhe meyathu yishü.

³² Keujüla ma tsüti nsa lethu, kadimi kepawa na alen kesie wi keten na ma nyilothu kesun chi nu manyi jüwi gweghe kemehai sale keü thsüben.”

³³ Jisu na khi, “Tsü makesü nthu thola nthu keben-keyeng tsüdi teshi nkesa tsü hi sansikeya nyi saya nben.

Amcü Ma men Nkemi

³⁴ “Amcü na mehai, isala keujüla ma kesheng bhatagha lethu, mangwa sa nu tsü sheng thsüya mehai nu?

³⁵ Tsüna ayyi nu kepa ghena la mangla nmehai; tsü pi khalaben. Kinayalo, keujüla nthu na akhuna pvüten lethu!”