Luk Zhükechi Jühtheü Kemehaiwa 10 - Kemethajüh (N) (Re-editing) Bible (BSI)

Jisu Na Achentagü Nu Keni Kesunshikechi

¹ Haseng wi Apvüwa na anyi achentagü nu keni kessiya nu meshu kenini kesun pi ma tuwi na ma wale keben anyutithu nu apen tsüdi wi chi.

² Ma mathu wi khi, “Ciwi alli kewwi-u na keti la ben, isala kekuli nyi na kezeng-u ketan. Tsalina alli pvüwa wi kekhie sa nu ma ya kekuli nyi ji kayi kesun pi ma lli wwi thsülo.

³ Walo! Hi nthu pi khaghaneni zzathu na adennithu jawi keten ti kesun chiben.

⁴ Apisa hikhu, ajula, accüguwenthu mangla npvüla; nu alenca wi thola ccüneng deja nben lalo.

⁵ Nthu na wa ajjen khiewa du khe hati khilo, ‘Kecca ya ajjen ha wi ben keyawa salo.’

⁶ Keujüla ciwi kecca kenen nyi na ben lethu, nthu kecca khukechiwa tsüna ma miwi ben wa ben, nyelethu nthu kecca shalom tsü khuneng yalo.

⁷ Ajjen tsüwa wi ben nu mathu na mangwa pi nthu cü khe dsa nu jjülo, kepaghenanye kekuliwa na ma kutimen muya qole. Nthu na ajjen kahe wi kegoe nben la.

⁸ Nthu na anyuti kesü wi wa nu nyu na nthu ssiya lethu, mangwa pi nthu cü khe dsalo,

⁹ anyuti ciwi kesakinaa sa pi mehai cü, nu anyithu wi hati kizalo, ‘Anyiza Kadiyyi na nthu tetsaki ghodhale.’

¹⁰ Isala anyuti kesü wi wa nu nyu na nthu ssi meya mvu lethu, alentonti wi shhu nu hati khilo,

¹¹ ‘Nthu nyutiwa wi ayyinikhu na ikhang ccü wi kekaki lela kekhasha pi nthu shun ben. Isala Anyiza Kadiyyi na nthu tetsaki ghodhale kesa chüyalo!’

¹² Hi nthu kizaden, Ajühkekaghaten tsathang wi Anyiza na anyuti hawa miwi Sodom nantizenchi cüaben!

Nkenondi Nyutithu

¹³ “Khorazin, nghena khatila qhethiketen saten nu! Bethsaida, nghena la khatila qhethiketen saten nu! Keujüla nshinyi miwi amankesa kulikechi tsü pi Tur nu Sidon miwi kulichi lethu, ciwi anyithu na kheni na mathu kesami wi khapeghe yadhale kesa alishithsü mphi nu donki nu amihi pi mathu miwi chipvü kesa nan!

¹⁴ Ajühkekaghaten tsathang wi Anyiza na nshinyi miwi Tur nu Sidon nyi keniwa nantizenchi cüaben.

¹⁵ No, Kapernaum! No ketanla no pieki pi tang wi chiya mvuben kwe? No zansha pi annighajü wi cüchi cüben!”

¹⁶ Jisu na ma sansikeyathu wi khi, “Thowa na nthu jühkina ten khe ijüh la kinaden; thowa na nthu meya mvula khe hi la meya mvula saden; nu thowa na hi meya mvu la sa khe hi kesun kechiwa la meya mvula saden.”

Achentagü Nu Keni Na Kheneng kegho

¹⁷ Anyi achentagü nu keni na anonkeghe sala gho neng nu hati khi, “Apvüwa, ikhang na n-nyan wina khichi nan atsaghangthu lela ikhang jühkina le!”

¹⁸ Jisu na mathu luneng, “Hi Satan na tang wina atsancwe ti qancadu keten mule.

¹⁹ Kinayalo! Hi kekhang pi nthu cüdha, tsalina nthu na amaghang nu ajjüssithu miwi kegoeya nu ghinyiwa kekhang miwi khang yaden, nu mangla nthu patenaya nben.

²⁰ Isala nkemehai ghamuthu na nthu jüh kekina ghena nthu nonghe nben la; isala nthu nyan pi tang wi zhüya kesa ghena anonghe yalo.”

Jisu Nonkeghe

²¹ Tsü tsüwi Jisu na Kemetha Ghamu wi anonkeghe pi ma pong pvüya nu khi, “IBa, atssan nu ayyi wi Apvüwa, hi no sengle; kepaghenanye no pala hathu pi kemetsa nu kechüthu tuwi kuthi theng nu pi nkechüthu ccücachi kesalina. Anle, iBa, hawa ha no kenen ghena sachi le!

²² “IBa na pala tsüdi pi hi cüdha. Anyi kesütan la Abawa nkenye tsü Atsawa tsüna thowa khe chüya nten, nu anyi kesütan la Atsawa nkenye nu Atsawa na pi ma ccüca nkechi tsü Abawa tsüna thowa khe chüya nten.”

²³ Tsaseng wi Jisu na khapeghe wa ma sansikeyathu ketan kiza, “Nthu na mu kebenthu ha kemuthu na khatila mihhidha nu!

²⁴ Hi nthu kizaden, atusenjüh-kechüthu nu kadimithu kejon na nthu mu keben ha muya mvu sa lela mu meya, nu nthu za keben ha zaya mvu sa lela za meya le!”

Samaria Nyi Kemehaiwa Pi Ajühkaghape

²⁵ Tsaseng wi Ayenkesansi kesü na Jisu ghan-nan le gho nu khi, “Kesansiwa, hi anuphan kahang muyale kesalina khati nsathu yishü nu?”

²⁶ Jisu na ma luneng, “Ntsawajüh na khatile khiben nu? No tsüthu pi khatile khimethaten nu?”

²⁷ Ma khineng, “ ‘No nleben tsüdi, no kahang tsüdi, no kezü tsüdi, nu no kemeshen tsüdi sen nu Apvüwa n-Nyiza ntizenthu yishü’; nu ‘No ketanla no ketizen ti njenphon tizenyalo.’

²⁸ Jisu na khineng, “No khiti yadha, no wala tsüti satenlo, isathu no hangyaben.”

²⁹ Isala Ayenkesansiwa na ma ketanla ma pi meshon benle sa mvu kesalina ma Jisu wi keü, “Thowa na ijenphonwa nu?”

³⁰ Jisu na khineng, “Ciwi anyi kesü Jerusalem wina Jerikho wi cü keten nyu ji tengdsa ketenthu na gho ma ghantenya nu ma tsanqaithu khuya nu ma kiccü pi shütu-hangtu teshi nu bvüa.

³¹ Tsü tsü wi keqhaikedi kesü na alen ciwi wa, isala ma anyi tsü muya nan alen kepawa wina tsü ghü sen nu bvüa.

³² Tsüti Levi nyi kesü la alen ciwi gho nu wa anyi tsüwa ghang chinan theng nu kepawa wina ghü sen nu bvüa.

³³ Isala Samaria nyi kesü na ciwi kijünyi wa keten gho anyi tsü muya, nu ma anyi tsü mu pi ma lebengüccü.

³⁴ Ma anyi tsüwa wi whala adeli nu kisengtssü pi ma yisü wi chicü nu athsü pi qhan cü. Isanu ma anyi tsü pi ma gada miwi chipvü wala kijünyi jjen kesü wi ma noncca cü.

³⁵ Dhitsüwa wi ma rükatssü akutimen keni khushi pi ajjen tsü kehiewa cü nu ma kiza, ‘Ma noncca benlalo, nu no ma ghena mangwa khaju dedi khe hi kegho neng wi pi no ccü neng shaben na.’ ”

³⁶ Jisu na keü, “No kemeshen tsü, ha ma kecheng jawi thowa na anyi nyu ji ketengdsathu na kiccü kecüwa tsü jenphon ti kuli chicü nu?”

³⁷ Ayenkesansiwa na luneng, “Anyi ma nantizenchi kecüwa tsü le!” Jisu na luneng, “Isathu no la whanu tsüti satenlo.”

Jisu Na Martha Nu Maria Manyi Hhainankewa

³⁸ Jisu nu ma sansikeyathu na kijünyi wa keten anyu kesü wi ghoya nu ciwi nza kesü ma nyan Martha tsüna mathu ssiya.

³⁹ Ma pvünonwa ma nyan Maria kesa na ben, ma Apvüwa ccü wi donki nu ma kesansijüh kinaben.

⁴⁰ Martha na kekuli tsüdi sa pi ma lidhamang ben, tsalina ma gho nu khi, “Apvüwa, ipvünonwa na kekuli maben dhasha pi hi ketan kuli thsü keben ha no meshenchi nben kwe?”

⁴¹ Apvüwa na ma luneng, “Martha, Martha! No pala kejon ghena ketizen sa nu lebengüccü ben,

⁴² isala kesütan nsenthu yishü. Maria na kemeshonwa kessiyadha, nu ma wina tsü khusen bvüya nbendha.”