LEVIYEN 27 - Kemethajüh (N) (Re-editing) Bible (BSI)

Aju pi Apvüwa kecü Yenthu

¹ Apvüwa na pi Mosa cü,

² ayen hathu ha Israel nyithu ghena. Ajühkhuchi ketheng kenie wina anyi kesü pi Apvüwa cüdha lethu, apisa hati pi dhineng nu anyi tsüwa teshichiaben,

^3-7 tsüna tsü tsüwi apisa men kenie wina: — npvüza cahli, amapi ngwe na wa achentugho kecu: rükatsü 50 — nza cahli: rükatssü 30 — npvüza pvüza, amapi manga na wa ngwe kecu: rükatssü 20 — nza ghala: rükatssü 10 — npvüza pvüzanyi: amapi manga cakhu: rükatssü 5 — nza lanyi: rükatssü 3 — npvüza amapi achentugho miwi: rükatssü 15 — nza amapi achentugho miwi: rükatssü 10

⁸ Anyi ma jühkhuchi kethengwa na ketha-u ntsa sa nu asen men hapi cü meya lethu, ma anyi tsüwa ssinu keqhaikediwa wi gho nu keqhaikediwa na asenkhisha pi anyi tsüwa pi cüya kemehai kenie wi khidhiaben.

⁹ Ajühkhukechi tsüna asahang kesü pi Apvüwa keya qo kekinyi sale kesa ghena lethu, aju pi Apvüwa kecü tsüdila metha,

¹⁰ nu anyi ajühkhukechiwa na asahang kepa pi tsü mithon nsala. Ma tsüti sa lethu asahang keni qho Apvüwa ji saben.

¹¹ Isala ajühkhukechi tsüna asahang nkemetha kesü pi Apvüwa kekinyi sa lela ya nkebenwa ghena lethu, anyiwa na asahang tsü sen nu keqhaikediwa wi waben.

¹² Keqhaikediwa na tsü kemehai keteshi kenie wina asen khidhi ben, nu ma men tsüna asakhenwadha.

¹³ Anyi tsüwa na ma tsü shü nengya mvu lethu, ma tsü men nu tsümiwi gishü meza wi ngwe pi wwa pi ncüthu yishü.

¹⁴ Anyi pahan na ma jjen satemetha pi Apvüwa cü lethu, keqhaikediwa na tsü kemehai keteshi kenie wina ma men khidhiben, nu ma men tsüna asakhenwadha.

¹⁵ Anyi ma jjen satemetha pi Apvüwa cü kesawa na tsü shü nengya mvu lethu, ma tsü men nu tsümiwi gishü meza wi ngwe pi wwa pi ncüthu yishü.

¹⁶ Keujüla anyi kesü na ma yyi pahan satemetha pi Apvüwa cü lethu, keqhaikediwa na amacü khaju pi chiben khe tsü kenie wina ma men khidhiben, asu mahha kesü kechi wi rükatssü tagha saben.

¹⁷ Ma pi Kecüneng Mapi cen meyi ayyiwa tsü satemetha chi lethu, ma men tsü maben saben.

¹⁸ Isala ma tsü seng wi ccüna satemetha chi lethu, keqhaikediwa na wa pi Kecüneng Mapi cule kesa khaju ben khe tsü kenie wina ma men zansha nu khiben.

¹⁹ Anyi ma lli satemetha pi cü kesawa na ma tsü shü nengya mvu lethu, ma tsü men nu tsümiwi gishü meza wi ngwe pi wwa pi ncüthu yishü.

²⁰ Ma Apvüwa wi tsü shü tegüya nsala pi anyi kepa wi jeü lethu, ma tsü shü neng keyau nmiladha.

²¹ Pi Kecüneng Mapi vvüthiwa nten alli tsüna anuphanla Apvüwa ji saben, tsüna keqhaikedithu ji sadha.

²² Anyi kesü na ma alli shü ketheng tsü satemetha pi Apvüwa cü lethu,

²³ keqhaikediwa na wa pi Kecüneng Mapi cule kesa amapi khaju na ben khe tsü kenie wi ma men khiben, nu anyi tsüna tsü ghanan na ma men tsüpi cü nsathu yishü; apisa tsüna Apvüwa ji sadha.

²⁴ Pi Kecüneng Mapi wi alli tsüpi ma pvüwa ntsawa shicüthu cü neng shaben.

²⁵ Pala men tsüdila tsü tsüwi apisa men kenie wina khidhiben.

²⁶ Asahang zza tssütsewa tsüna Apvüwa ji sadha, tsalina thola tsüpi ma kenen wina kekinyi sala satemetha pi Apvüwa cükeya nmi. Amesü zza, khaghaneni zza, nyelela aneni zza tsüna Apvüwa ji,

²⁷ isala asahang nkemetha zza tssütsewa tsüna tsü tsüwi apisa men kenie nu tsümiwi gishü meza wi ngwe pi wwa pi shei nengya mehai. Shei nengya nsa lethu pi anyi pahan wi tsü tsüwi apisa men kenie wina jeüya mehai.

²⁸ Anyi thola satemetha pi Apvüwa cü kesa anyi, asahang, ayyi lela sheiya nyelela pi jeükeya nmi. Tsüna anuphanla Apvüwa ji sadha.

²⁹ Anyi kesü sa lela satemethatha chi kesawa tsü shei nengkeya nmi; ma pi shü thsü nsathu yishü.

³⁰ Ayyi wi mukeya tsüdi asu sale kedsau sa lela gishü tagha wi kesü tsüna Apvüwa ji.

³¹ Anyi kesü na ma katsüha lela shei nengya mvu lethu tsü tsüwi apisa men kenie nu tsümiwi gishü meza wi ngwe pi wwa pi nsheithu yishü.

³² Asahang tsüdila tagha wi kesü tsüna Apvüwa ji. Asahangthu si nu tagha wi kesü tsüna Apvüwa ji.

³³ Asahang pvüwa na ma ketanla tsü kecükepengya nben, isalethu ma asahang abvüccenwa kessi pi chiaben, nu ma kepa pi tsü mithon la sakeya nmi. Keujüla ma asahang kepa pi kesü mithon sa lethu, asahang keni qho Apvüwa ji saben, nu tsü shei nengkeya nmi.

³⁴ Ajühkhukechi hathu ha Israel nyithu ghena Apvüwa na Sinai Yikha wi pi Mosa kecü.