LEVIYEN 24 - Kemethajüh (N) (Re-editing) Bible (BSI)

Ahulathu Kenoncca

¹ Apvüwa na Mosa kiza nu

² Israel nyithu wi Nithsüjjen wi ahula tsü canki nu keshüthangla qheben thsüle kesalina oliv deli kemehai ntsawa sengholo khi thsü.

³ Ghaja kaghapenla Aaron na tsü canki nu qhe wa ghanenwa cu thsüben, tsüna Kemetha ntsawa Pen non wi Cenkethenjüh Khitson tuwi keshonthsü na ameiwa Apvüwa ketenpen witsü. Matsü ghaketen tsüdi wi ayen ha nieben.

⁴ Aaron na suna kemetha pi kesa ahula kedonpen wi ahulathu noncca nu tsüthu ya keshüthangla Apvüwa ketenpen wi qhe nben thsüthu yishü.

Amesa Pi Anyiza Kecü

⁵ Awheng kilogram taghakeni khuya nu pi amesa abe taghakeni güya.

⁶ Amesa tsüpi Apvüwa ketenpen wi suna pi meju ketheng miz miwi tughogho pi alen keni saya.

⁷ Atsse pi Apvüwa wi kekinyi sa kechi zensu wina hankedemvu kemetha pahan pi amesa pi dan ketheng miwi zügüchi.

⁸ Matsü ghaketen tsüdi wi Sabbath tsathang kaghapengla amesa tsüpi Apvüwa tuwi nchithu yishü. Hawa ha anuphan wila Israel nyi kekuli.

⁹ Amesa tsüna Aaron nu ma shicüthu shei, mathu na kemetha pen wi tsü dsaben, kepaghenanye hawa ha atsse pi keqhaikedithu ghena Apvüwa wi kekinyi sa kechi kemetha ntsawa.

Ketsatan Nu Kemeshon Wina Kemeten Pi Kecü Tsütsonca

^10-11 Ciwi npvüza kesü na ben, ma ba na Ejipt nyi nu ma jja na Israel nyi Dan mizza wi Dibri nga Shelomith. Anyi hawa ha kemnanpen wi Israel nyi kesü ssikitagha. Kitagha keben wi ma Apvüwa kishencü, tsalina mathu na ma ssinu Mosa wi wa,

¹² ma ghan pi theng nu Apvüwa na ma ghena mangwale mathu kizaten khe hie.

¹³ Apvüwa na Mosa kiza,

¹⁴ “Anyi tsüwa ssinu kemnanpen na ameiwa wi shhulo. Ma kishencü keben za keyathu tsüdi ma sazzidha le khishi nu akwen chang pi ma miwi chi nu azitenti maben alon pi ma kecenthiaben.

¹⁵ Tsaseng wi Israel nyithu wi anyi thowa na Anyiza kishencü khe ma tsüghena ketizensa ben

¹⁶ nu pi shü thsüaben kizalo. Israel nyi sale asang na Israel nyi jawi hang keben sa lela thowa na Apvüwa theng khe azitenti mabenla alon pi ma kecenthiaben.

¹⁷ “Anyi thowa na nyu pathi khe ma pi shü thsüaben,

¹⁸ nu thowa na nyu ji asahang pathi khe tsü kuti pi cü nsathu yishü. Kahang kesü mithon kahang kesü, tsü yen kenie wina.

¹⁹ “Keujüla anyi kesü nyu mesa-mena lethu, ma mangwa sachi khe ma miwi la tsü sachiaben.

²⁰ Ma nyu gü kesü pashü lethu, ma gü la kesü pashü cüben; ma nyu nyon kesü yasa lethu, ma nyon la kesü yasa cüben; ma nyu yha kesü shunsha lethu, ma yha la kesü shunsha cüben. Ma nyu miwi mangkhati mesa-mena cü khe ma miwi la tsüti sa cüben.

²¹ Anyi thowa na asahang kesü pathi khe tsü kutimen pi cü, isala thowa na anyi kesü pathi khe ma pi shü thsüaben.

²² Ayen hawa ha Israel nyithu sale asang nthu jawi hang kebenthu sa lela tsüdi miwi ben, kepaghenanye hi Apvüwa nthu Nyiza.”

²³ Mosa na ha khipi Israel nyithu kekiza wi mathu na anyi tsüwa ssi shhula kemnanpen na ameiwa alon pi kecenthia. Hati nu Israel nyithu na Apvüwa na Mosa kekiza ti sa.