LEVIYEN 23 - Kemethajüh (N) (Re-editing) Bible (BSI)

Keccüna Khothu

¹ Apvüwa na pi Mosa kecü,

² Israel nyithu na saghu nu kekinyi wi kemetha khothu kesa yen hathu ha.

³ Ghanan tugho jüwi nthu kekuli saya, isala tagü ghananwa tsü chüyalo, tsüna Sabbath, kemnan tsathang kesü. Tsü ghanan wi kekuli nsala, isala nthu saghu nu kinyilo. Sabbath tsüna Apvüwa ji, nthu na kahe wi hang tenle khi lela.

⁴ Matsü wina akho hathu pi thangchilo.

Shhukeya Kho nu Azimi Nkechi Mesa pi Kemishu

⁵ Shhukeya kho, asha atuwa wi taghamejü ghanan aghani du meyi na tsü sashhu nu Apvüwa kinyiküben.

⁶ Taghamanga ghanan wi azimi nkechi mesa pi kemishu kho tsü sashhu ben nu ghanan tagü nthu na azimi kechi mesa ndsala.

⁷ Atsathang atuwa wi nthu na saghu nu kekinyi sa nu nthu na atsathang kekuliwa tsü mangla sa nben.

⁸ Ghanan tagü nthu na atsse pi Apvüwa kekinyi tsü sa. Tagü ghanan wi la kheneng saghu nu kekinyi sa nu nthu na atsathang kekuliwa tsü mangla sa nben.

^9-10 Khathansha wi nthu Apvüwa na ayyi pi nthu cüle keben witsü ghoya nu nthu lli wwiya khe, handhi tegüwa tsü sen nu keqhaikediwa wi gholo.

¹¹ Nthu yaya thsüle kesalina ma tsüpi kekinyi kemehai kesü sapi Apvüwa cüben. Keqhaikediwa na Sabbath dhitsüwa wi tsü saben.

¹² Nthu na asu pi kekinyi ghanan wi tsü khaghaneni zza amapi kesü ji asüpon kesü nyu ghojünkeya mangla nkemi la pi ahhansha sala mecang pi kekinyi saben.

¹³ Nthu na tsüpi oliv deli saghu ketheng awheng kilogram keni tsü gweghe atsse pi kekinyi saben. Apvüwa na kekinyi ha kemecang han nenten. Nthu na kisengtssü la liter kesü pi tsü gweghe kekinyi sa chiben.

¹⁴ Nthu na kekinyi ha sen nu Anyiza wi npi kegho chu asu ketheü tsü kemeji, kennun, nyelela pi amesa la gü ndsala. Ayen hawa ha nthu shicüthu na matsü ghaketen tsüdi wila nieben.

Matheükedhi Kho

¹⁵ Sabbath tsathang wi nthu na asu handhi tegüwa sengho Apvüwa kecü dhitsüwa na si wa hapta tagü saya.

¹⁶ Sabbath tagüwa sa nu dhitsüwa deni ghanan wi tsü asu ketheü pi Apvüwa kekinyi salo.

¹⁷ Atheghi kesüsü amesa be kenini sengho aju kemehai ntsa sapi Apvüwa cü. Amesa kesüsü na awheng kilogram keni pi azimi pi chi nu güya, nu pi asu wwi keten kekinyi atuwa sapi Apvüwa wi chiben.

¹⁸ Azitenti na amesa tsü gweghe khaghaneni zza amapi kesü ji tagü, amesü süpon kesü, aneni keni, tsüthu kesüla nyu ghojünkeya mangla nkemi khuchiben. Mathu na tsüpi asu pi kekinyi nu kisengtssü pi kekinyi gweghe mecang pi kekinyi sapi Apvüwa wi chiben. Apvüwa na ha kekinyi han nenden.

¹⁹ Aneni süpon kesü pi kesami ghena kekinyi sachi nu khaghaneni zza amapi kesü ji keni pi kecca ghena kekinyi sachiben.

²⁰ Keqhaikediwa na khaghaneni zza keni nu amesa gweghe pi aju kemehai ntsa sala keqhaikedithu ghena pi Apvüwa cüben. Kekinyi hathu ha metha.

²¹ Tsü ghanan wi nthu na atsathang kekuliwa tsü mangla nsala, isala saghu nu kekinyi salo. Nthu shicüthu na matsü ghaketen tsüdi wi kahe wi hang ten lela ayen ha nieben.

²² Nthu na khathansha wi nthu lli wwi khe alli khutsukhuna wi asu tsü nwwila, nu nthu kheneng wa amaseng tsü nbhala; tsüthu tsüpi ketha-uthu nu asangthu cülo. Apvüwa tsüna nthu Nyiza.

Amapi Ketheü Kho

^23-24 Asha tagüwa wi atsathang atuwa wi kemnan tsathang kesü sa nu tutuwa khou chi lethu saghuya nu kekinyi salo.

²⁵ Atsse pi kekinyi sapi Apvüwa cü nu nthu na atsathang kekuliwa tsü mangla nsala.

Ahhanshakesa Kho

^26-27 Asha tagüwa tagha ghanan wi anyithu kesami sen bvüale kesalina amapi wi keccüna kesü salo, tsü ghanan wi mangla ndsala; saghuya nu kinyi, nu atsse pi kekinyi sapi Apvüwa cülo.

²⁸ Tsü ghanan wi kekuli nsala, kepaghenanye tsüna anyithu kesami sen bvüale kesalina keccüna kesa tsathang.

²⁹ Anyi thowa na tsü ghanan wi pala dsa khe ma pi Anyiza nyi kesüle nsa laben.

³⁰ Nu tsü ghanan wi thowa na kekuli sa khe Apvüwa na ma pi shü thsüaben.

³¹ Nthu shicüthu na kahe wi hang lela ayen ha nieben.

³² Asha tsüwa wi tugu ghanan aghani du meyi na wa tagha ghanan aghani kedu kecu kemnan tsathang kemehai ha sa nu tsü tsüwi mangla dsa nben.

Kelishu Kho

^33-34 Asha taghawa taghamanga ghanan wi Kelishu Kho ha sashhu nu tsüna ghanan tagü saben.

³⁵ Atsathang atuwa wi saghuya nu kekinyi sa nu nthu atsathang kekuliwa tsü mangla nsala.

³⁶ Ghanan tagü jüwi tsü atsathangla nthu na atsse pi kekinyi tsü saben. Tazen ghanan wila saghuya nu kinyi nu atsse pi kekinyi sachi. Tsüna kekinyi tsathang tsalina nthu atsathang kekuliwa tsü nsala.

³⁷ (Hathu hana keccüna khothu nthu na gweghe saghuya nu Apvüwa kinyikü wi kekinyi sa nu atsathang wila nsathu keyishü wi atsse pi kekinyi, mecang pi kekinyi, asu pi kekinyi, ahhansha kesa, nu kisengtssü pi kekinyi saben.

³⁸ Nthu na keshüthangla nthu ju khukechi, Sabbath tsathang, nthu jühkhukechi kesacen kekinyi, nu nthu kenen wina kekinyi sapi Apvüwa kecüthu miwi akho hathu ha saben.)

³⁹ Khathansha wi nthu na alli wwi khe asha tagüwa wi taghamanga ghanan wi akho ha sashhu nu tsüna ghanan tagü saben. Atsathang atuwa tsüna kemnan tsathang kemehai ntsa saben.

⁴⁰ Tsü ghanan wi nthu na kedsauton wi ma bi kemehai ntsa, palm chan cüna, nu achanton pogho kesa wi ma cüna keti khuya, nu Apvüwa nthu Nyiza kekinyikü wi keccüna kho ha sashhulo.

⁴¹ Ghanan tagü tsü salo. Nshicüthu na matsü ghaketen tsüdi wi ayen hawa ha nieben.

⁴² Israel nyithu tsüdila ghanan tagü apon wi hangben,

⁴³ isa nu nthu shicüthu yala Apvüwa na Ejipt wina Israel nyithu ssishhu keten wi ma mathu ya apon wi hang thsüle kesa chüya thsüle kesalina. Ma Apvüwa nthu Nyiza.

⁴⁴ Tsalina hati nu Mosa na Apvüwa kekinyikü wina keccüna akho kesa yenthu pi Israel nyithu cü.