LEVIYEN 20 - Kemethajüh (N) (Re-editing) Bible (BSI)

Ajüh-nkeya Kutimen

¹ Apvüwa na Mosa kiza nu

² Israel nyithu wi khi thsü, “Nthu nyelela asang nthu jawi hang ketenthu kesüle kesü lela thowa na ma tsangathu pi atsaghang Molek kekinyi wi sen thsü khe azitenti mabenla alon pi ma kecenthiaben.

³ Thowa na ma tsanga kesü pi Molek cü nu hi kemetha Nithsüjjen sapi nmetha thsüla nu inyan kemethawa nyankenyen khe hi ma shun nu ma pi inyi kesüle nsa laben.

⁴ Keujüla azitenti mabenla ma mangwa sa khe nkechü ghe sa nu ma pi nshü thsüla lethu,

⁵ hi anyi tsüwa nu ma theghi maben nu ma gweghe hi wi jühtsentsa nsala Molek kinyi wa kesathu tsüdi shunben. Hi mathu pi inyile nsa laben.

⁶ “Keujüla anyi kesü na keshü ghamuthu ccüneng ketenthu wi kesansi bha wa lethu, hi ma shun nu ma pi inyi kesüle nsa laben.

⁷ Nthu na methasi benlo, kepaghenanye hi Apvüwa nthu Nyiza.

⁸ Iyenthu tsü nie yalo, kepaghenanye hi Apvüwa nthu sapi metha thsüle.”

⁹ Apvüwa na ayen hathu ha khuchi. Anyi thowa na ma ba nyelela ma jja kishencü khe ma pi shü thsüaben; ma keshü khhiwa tsüna ma ketanla ma ghena.

¹⁰ Keujüla npvüza kesü na ma Israel nyi wubvü ssimehai lethu, ma nu nzawa manyi qho pi shü thsüaben.

¹¹ Npvüza kesü na ma ba wubvü kesü ssimehai nu ma ba nyankenyen lethu, ma nu nzawa manyi qho pi shü thsüaben. Manyi keshü khhiwa tsüna manyi ketanla manyi ghena.

¹² Npvüza kesü na ma cünyiewa ssimehai lethu, manyi qho pi shü thsüaben. Manyi kesazzi nu keshü khhiwa tsüna manyi ketanla manyi ghena.

¹³ Npvüza kesü na npvüza kepawa ssimehai lethu manyi na nankiqanan kekuli sadha, nu manyi qho pi shü thsüaben. Manyi keshü khhiwa tsüna manyi ketanla manyi ghena.

¹⁴ Npvüza kesü na bvütsanyi qho yaya lethu, ma kecheng qho pi mecangthiaben, kepaghenanye mathu anyankekinyen kekuli sa kesalina; nthu jawi hati ha nsala.

¹⁵ Npvüza kesü na asahang ssimehai lethu, ma nu asahang tsü la pi shü thsüaben.

¹⁶ Nza kesü na asahang ya ma ssimehai thsü lethu, ma nu asahang tsü la pi shü thsüaben. Manyi keshü khhiwa tsüna manyi ketanla manyi ghena.

¹⁷ Npvüza kesü na ma tssüggüwa, ma ba nga nyelela ma jja nga sa lela ssiben wa lethu, nyu tuwi manyi pi kejüghe yathsü nu anyithu jawi na manyi jügüshiaben. Ma ma tsüggüwa ssimehai kesalina ketizen nsathu yishü.

¹⁸ Npvüza kesü na nza kesü asha kaghapeng nzayen sa keben wi ma ssimehai lethu, azitenti jawi na manyi qho jügüshilo, kepaghenanye manyi keccüna wi nkemetha yenthu tsü sadha.

¹⁹ Npvüza kesü ma nyie, ma jja pvünonwa nyelela ma ba tssüggüwa, ssimehai lethu, manyi qho nankiqanan kekuli kesa ghena ketizen saben.

²⁰ Npvüza kesü na ma bizawa wubvü ssimehai lethu, ma ma bizawa nyankenyendha, nu manyi na kesami tsü pvüben; nu manyi na atsanga la nmila shüaben.

²¹ Npvüza kesü na ma cünyuwa wubvü ssiben wa lethu, manyi na atsanga nmila shüaben. Ma keccüna wi nkemetha kulidha nu ma cünyuwa nyankenyündha.

²² Apvüwa na khi, “Iyen khukechithu tsüdila nie yalo, isathu hi nthu ssi wa chile keben Kanaan yyiwa witsü nthu meshusha nben.

²³ Anyi ayyi ciwi kahangthu yen tsü n-niela; hi Apvüwa nkechüthu ha jügüshiaben isa nu nthu na ayyi ciwi duya thsüaden. Mathu kekuli nkemehai tsüdi tsüna hi sapi anonhi thsüdha.

²⁴ Isala hi ayyi kenyan nu kemehai hapi nthu ji sa thsüle ijüh khuchidha, nu hi tsüpi nthu cüden. Hi Apvüwa nthu Nyiza, nu hi mizatenti kepathu jawi na nthu khushiyadha.

²⁵ Tsalina nthu na asahang nu awathu keccüna wi kemetha nu nkemethathu mechanshu chükepapa sa nbenthu yishü. Hi nmethale khi kethengthu asahang nu awa nkemethathu tsü dsa nu nthu sapi nmetha thsüla nsala.

²⁶ Nthu na metha nu iji ketan saben den, kepaghenanye hi Apvüwa nu hi metha. Nthu na iji ketan sa thsüle kesalina hi mizatenti kepathu jawi na nthu khushiyadha.

²⁷ “Npvüzale nza lela thowa na keshü ghamuthu ccüneng ten khe alon pi kecenthiaben; thowa na hati sa khe ma keshü khhiwa tsüna ma ketanla ma ghena.”