LEVIYEN 19 - Kemethajüh (N) (Re-editing) Bible (BSI)

Ketsatan Nu Kemetha Yenthu

¹ Apvüwa na Mosa kiza nu

² Israel nyithu wi khi thsü, “Methasi benlo, kepaghenanye hi nthu Nyiza Apvüwa hi methaben.

³ Hi kekhi ti nthu kesüsü nthu ba nu nthu jja nyuwakü nu Sabbath yen tsü nielo. Hi nthu Pvüwa Anyiza.

⁴ “Hi teshi nu wa atsikezhü nkinyila; amighe pi atsaghangthu zhü nu tsüthu tsü nkinyila. Hi Apvüwa nthu Nyiza.”

⁵ Nthu khathansha wi asahang pathi pi kecca ghena kekinyi sa khe, hi ayen pi nthu kecüthu tsü nielo isathu hi kekinyi tsü yaben.

⁶ Asahang kepathi ghanan nyelela dhitsüwa wi ma sa tsü dsalo. Kecheng ghanan wi la asa tsü ben lethu pi mecanglo,

⁷ kepaghenanye tsüna keccüna wi nmetha ladha, anyi kesüla tsü dsa lethu hi ma kekinyiwa tsü ya nben.

⁸ Thowa na tsü dsa khe ma satemetha pi hi cü kesawa tsüpi ghameme kesa ghena sazziben, nu ma pi inyi kesüle nsa laben.

⁹ “Nthu khathansha wi nthu lli wwi khe alli khutsukhuna wi asu tsü nwwila, nu nthu kheneng wa amaseng tsü nbhala.

¹⁰ Kheneng nlli wi wa kemeshentsse maseng nyelela ma bi ayyi wi keqancathu tsü nbhala; tsüthu teshi pi ketha-uthu nu asangthu cülo. Hi Apvüwa nthu Nyiza.

¹¹ “N-ghanfüla, nyu nmechula, nu mili-nmesala.

¹² Nthu na saya nben lethu inyan wina ajüh nkhuchila; tsüna inyan kekinyen sengho ben. Hi Apvüwa nthu Nyiza.

¹³ “Meshu kesü miwi la ma nanketizen ghe sala nthu kekiyi nbhala nyelela ma nteng dsala. Nthu na ssinu melli kaghawa kutimen ghaja kesüla pi ncüla theng nsala.

¹⁴ Akhuna kedecu nyi nkishencüla nyelela pala pi anyon nkemuwa tuwi chi nu ma ccü nmeshü thsüla. Hi kinyikülo; hi Apvüwa nthu Nyiza.

¹⁵ “Ajühkekaghakhi wi atsentsa nu kemeshon wina khidhilo; ketha-uwa nkhichi nu kebenwa messi nsa lalo.

¹⁶ Meshu kesü ghü la nsala; anyi kesü ma kahang ghena ajühkaghakhi keben wi nsheikepi jüh ma kiqaya ben lethu khichilo. Hi Apvüwa.

¹⁷ “Nleben wi thola meshensa nbenla, isala ma ssi keccünengli nu südheya, isathu nthu ma ghena kesami sa nben.

¹⁸ Anyi tho miwila ajukhi meyala nyelela ma nanmeghüki nbenla, isala nthu ketanla nthu ketizen ti njenphonwa la tizenya. Hi Apvüwa.

¹⁹ “Iyenthu tsü nie yalo. Nsahangthu pi alen kepapa njigü thsüla. Amacü alen kepapa keni meyighu pi alli wi nchila. Athsü kesü wi anan len kepapa keni de nmephila.

²⁰ “Keujüla maghale kesü nyu meshibvüwa sa nu ma men pi ma ncüla teshichi, nu anyi kepa wi ma ssimehai lethu manyi qho kemeten pi cüben, isala pi shü thsü nben, nzawa ma nyu maghale kesü ghena.

²¹ Npvüzawa na khaghaneni süpon sen nu ma kedhineng kekinyi ghena hi ketenpen Nithsüjjen kedulen wi gho,

²² nu keqhaikediwa na tsüpi anyi tsüwa kesami khupiale kesalina satekemetha keccüna sa chithu Anyiza na ma kesami teshi cüben.

²³ “Khathansha wi nthu na Kanaan yyi wi gho nu kedsauton pi yangya khe, kedsau bi tsü atuwa amapi kecheng jüwi keccüna wi nmethale sayalo. Tsü tsüwi nthu na tsü ndsala.

²⁴ Mejü mapi wi kedsau bi tsüdi pi hi Apvüwa, keseng wina satekemetha kekinyi kesü keccüna sa chiben.

²⁵ Nthu na manga mapi wi ccüna ma bi tsü dsaya mehai. Nthu na ha tsüdi sa lethu nthu chanton ma bi kejon bün cüben. Hi Apvüwa nthu Nyiza.

²⁶ “Ajjü na asa wi keben tsü ndsala. Kedema kekuli mangla nsala.

²⁷ Nthu na alatan ssen ca nyelela apang kenye ce nsala.

²⁸ Nthu hyu miwi pala zhüki pvü nyelela keshü ghena anongü nu nthu sa handhi pvü tsüti nsala. Hi Apvüwa.

²⁹ “N-ngathu pi kekinyijjen wi keqheza menkedsa nza sa nu anyankinyen nsa thsüla; nthu tsüti sa lethu nthu na atsaghang kepathu wi wa nu hang nkemetha na ayyi pong shaben.

³⁰ Sabbath yen nieya, nu hi kekinyipen tsü nyuwakülo. Hi Apvüwa.

³¹ “Anyi keshü ghamuthu ccüneng ketenthu wi kesansi bha nwala. Nthu tsüti sa lethu nthu na keccüna wi nmetha laben. Hi Apvüwa nthu Nyiza.

³² “Kenyuwakü pi anyi keqhaithu cü nu mathu jühkina tenlo. Kinyikü nu ijühkinalo. Hi Apvüwa.

³³ “Nthu yyi wi hang keben asangthu tsü metenmesha nsala.

³⁴ Mathu pi nthu Israel nyi ti sayalo, nu nthu ketanla nthu ketizen ti mathu tizenyalo. Nthu la kuti jüwi Ejipt wi asang sa nu kahang tsü chüyalo. Hi Apvüwa nthu Nyiza.

³⁵ “Milikemesa sen nu ketikesie kedegü, kiyan-kembhi, nyelela keji-kezeng whu kesa wi nkecen wi thola nmechula.

³⁶ Kewhuchan tsentsa, kewhu tsentsa, nu kedegü tsentsa salo. Hi Apvüwa nthu Nyiza, nu hi Ejipt wi nthu khushi cü.

³⁷ Iyen khukechi tsüdila nie yalo. Hi Apvüwa.”