LEVIYEN 17 - Kemethajüh (N) (Re-editing) Bible (BSI)

Kemetha Jjüwa tsü

¹ Apvüwa na Mosa kiza nu

² ayen hathu hapi Aaron nu ma tsathu nu Israel nyithu tsüdi cü thsü.

^3-4 Israel nyi kesüle kesü lela Apvüwa ketenpen Nithsüjjen kedulen wi nkenyetsü kahe wi amesü nyelela khaghaneni nyelela aneni pathi pi Apvüwa kinyi lethu ma Ayenwa tsü pakhhidha. Ma ajjü keji thsüdha tsalina ma pi Anyiza nyi kesüle nsadha.

⁵ Ayenkhukechi ha ma jjügi Israel nyithu na khilitsü mathu ayela wi asahangthu pathi keten tsü sen nu Apvüwa tuwi ghotendha. Mathu na tsüthu sengho Nithsüjjen kedulen wi keqhaikediwa cü nu ma tsüthu pathi pi kecca ghena kekinyi saden.

⁶ Keqhaikediwa na tsü jjü tsüpi Nithsüjjen kedulen wi kekinyipen kevü wi keghü chi nu ma kethu tsüpi mecang pi Apvüwa na ma han kenenwa tsü saben.

⁷ Israel nyithu na Apvüwa wi jühtsentsa nsala mathu alli wi asahangthu pathi nu ahhansha sapi aneni tsaghangthu kecü tsü nsa lalo. Israel nyithu na matsü ghaketen tsüdi wila ayen ha nieben.

⁸ Israel nyithu sale asang mathu jawi hang ketenthu sa lela thowa na mecang pi kekinyi nyelela ahhansha katsüha sapi

⁹ Nithsüjjen kedulen wi nkenye kahe wi Apvüwa cü lakhe ma pi Anyiza nyi kesüle nsa laden.

¹⁰ Keujüla Israel nyi sale asang mathu jawi hang keten sa lela thowa na ajjü na asa wi keben tsü dsa khe Apvüwa na ma shun nu anyi tsüpi ma nyi kesüle nsa laden.

¹¹ Pala kahang tsüdi wila kahangli na ajjü wi ben, tsalina Apvüwa na anyithu kesami sen bvüale kesa ajjü tsüdi pi kekinyipen wi keshu chilo khichi. Ajjü, hana kahangli, kesamithu sen bvüden.

¹² Tsalina Apvüwa na Israel nyithu wi mathule nyelela asang mathu jawi hang keten sa lela ajjü na asa wi keben tsü ndsa lalo kiza.

¹³ Keujüla Israel nyi sale asang mathu jawi hang keten sa lela thowa na keccüna wi nkemetha aghangsa nyelela awa ghanya khe ma tsü jjü pi ayyi wi keji thsü nu acenya pi kejjübhon nsathu yishü.

¹⁴ Pala kahang tsüdi wila kahangli na ajjü wi ben, tsalina Apvüwa na Israel nyithu wi mathu ajjü na asa wi keben tsü ndsa lalo nu thowa na tsüti sa khe ma pi ma nyi kesüle nsadhale kizadha.

¹⁵ Anyi kesü, Israel nyi nyelela asang sa lela thowa na asahang ma ketanla keshü nyelela aghangsa na keyasa sa tsü dsa khe ma thsümeni ghasü, atssükizü, nu minulen wi kecu ma keccüna wi kemetha tsüwa hie nbenlathu yishü.

¹⁶ Keujüla ma tsüti nsa lethu ma tsüghena ketizen saben.