LEVIYEN 11 - Kemethajüh (N) (Re-editing) Bible (BSI)

Dsaya kemehai Aghangsathu

¹ Apvüwa na ayen hathu pi Mosa nu Aaron manyi cü,

² ha Israel nyithu ghena. Nthu na ayyi wi aghangsa katsüha lela dsaya mehai,

³ isala tsüna ma ccümezen gizighe nu ma tsse dekeshi pi dsa ketenthu,

^4-6 isala nthu na sunsiesa, amekhie, nyelela lishüsa dsa yishü. Hathu ha nmetha; tsüthu na atsse dekeshi pi dsaden, isala tsüthu ccümezen n-gizighe.

⁷ Avü sa ndsala. Hawa ha nmetha; tsüthu ccümezen gizighe, isala atsse dekeshi pi dsa nten.

⁸ Hathu sa ndsala nyelela mathu keshü kamang lela nkidhenla, tsüthu na nmetha.

⁹ Nthu na anga ma gisha nu ma kü keben katsüha lela dsaya mehai,

¹⁰ isala atssü wi kahangthu katsüha lela ma gisha nu ma kü nkemi tsü dsa yishü.

¹¹ Hathu ha nmetha; nthu na tsüthu sa ndsala nyelela tsüthu keshü kamang lela nkidhenla.

¹² Nthu na atssü wi kahangthu katsüha lela ma gisha nu ma kü nkemithu tsü dsa yishü.

^13-19 Nthu na awa hathu ha dsa yishü: amumu, accüpvü, cencüggü, abipvü, kamang kemcüwa, aduwe, awa ketiwa, atssüwa, apang-kesiewa, accükesiewa, adukukepvüwa, awenwa, ntsughu, nyelela adulu.

²⁰ Pala ghei ma gisha kepvü tsüdila nmetha,

²¹ isala penwa ketenthu tsü metha.

²² Nthu na ashiqa, abetho, nyelela aqaponthu dsaya mehai.

²³ Isala kepa wi kizzakiki ma gisha kepvü nu ghapvü keten tsüdila nmetha.

^24-28 Anyi thowa na asahang hathu keshü kamang pa khe ma minulen wi kecu nmethala benben: asahang ccümezzen nkegizighethu nu atsse dekeshi pi tsa nketenthu, nu asahang ma ccü mejü pvü nu amezzen-ketsu kebenthu tsüdila. Thowa na hathu keshü kamang tsü pvü khe ma thsümeni ghasü nsathu yishü, isala ma minulen wi kecu nmethala benben.

^29-30 Ayifü, amejü, athape, nu amuzathu ha nmetha.

³¹ Thowa na tsüthu tsü pa nyelela tsüthu keshü kamang pa khe ma minulen wi kecu nmethala benben.

³² Keujüla tsüthu keshü kamang na katsüha miwi qanca lela tsüna nmethala ben. Tsüna atsanqai katsüha achan, athsümeni, asahyu, nyelela leshithsü, kesenji katsüha sa lela. Tsüpi atssü non wi tensha isala minulen wi kecu tsüna nmethala benben.

³³ Keujüla tsüthu keshü kamang na ayyipfü miwi qancadu lethu ma non wi kebenthu tsüdila nmethaladha, nu apfü tsü pakhhi nsathu yishü.

³⁴ Atsse katsüha dsaya kemehai saben lela apfü hati kesa wi atssü pi ma miwi keshuchi lethu nmethalaben, nu jjüya kemehai tssü apfü hati kesa wi kebenwa tsüna nmetha.

³⁵ Katsüha lela keshü kamang tsü kidhen lethu tsüna nmetha ladha; anisha pi atsse kesapen kezhü nyelela annibhon sa lela tsü pacha nsathu yishü.

³⁶ Katsüha na tsüthu keshü kamang kidhenya lethu tsüna nmetha laben, isala atssükhang nu atssü ketheng pen tsü metha ben.

³⁷ Keujüla tsüthu na pala cüghe pi yangle kebenthu miwi qanca lela tsüna metha benben.

³⁸ Isala pala cüghe tsüpi atssü ten kepen wi tsüthu na ma miwi qancadu lethu tsüna nmetha ladha.

³⁹ Anyi kesüle kesü lela dsaketen sahang keshü kamang tsü kidhen lethu ma minulen wi kecu nmethala benben.

⁴⁰ Keujüla anyi kesü asahang sa hale ha lela dsa lethu ma thsümeni ghasü nsathu yishü, isala ma minulen wi kecu nmethala benben. Anyi kesüle kesü lela keshü kamang pvü lethu ma thsümeni ghasü nsathu yishü, isala ma minulen wi kecu nmethala benben.

⁴¹ Nthu na pala ghei kizzakiki ayyi miwi ghapvü keten tsü dsa yishü;

⁴² tsüna ma pvü pi ayyi kizza nu wa, ma ccü mejü nyelela ma ccü kejon ben nu alentsen ketenthu sa lela.

⁴³ Hathu ha kedsa ghena nthu ketanla nthu sapi nmethala nsala.

⁴⁴ Hi nthu Nyiza Apvüwa, nu hi metha kesa ghena nthu la nmethathu yishü.

⁴⁵ Hi Apvüwa, nthu Nyiza sale kesalina hi Ejipt wina nthu ssi shhugho le. Hi metha kesalina nthu la nmethathu yishü.

⁴⁶ Hawa ha ayenwa, asahang nu awa, atssü non wi hang ketenthu, nu ayyi miwi hang ketenthu tsüdi ghena.

⁴⁷ Nthu na kiden-kesha nu keccüna wi kemetha nu nkemetha, asahangthu kedsawa nu nkedsawa chü kepapa nsathu yishü.