KEMETSAJÜH 9 - Kemethajüh (N) (Re-editing) Bible (BSI)

Kemetsa nu Kejüphon

¹ Kemetsa na ma jjen sayadha nu tsü ghena adonbvü tagü saya.

² Ma kemishu ghena asahang pathi chi, hankedemvu pi kedsautssü wi saghu, nu miz kiden-keshaya.

³ Anyuti kemisi ntsa pen wina jisha thsü le ma maghalethu kesunchi.

⁴ “Dugholo, melalithu!” Nu ma kejüphonwa wi kiza,

⁵ “Gholo, itsse tsü nu hi kedsautssü pi kethoughu ketheng tsü jjülo.

⁶ Melalithu ssi ngweghela nu hanglo. Palakechü lenwa tsü nielo.”

⁷ Keujüla no kedithang nyiwa satemeshon lethu no kimennikeya ketan. Keujüla no nkemehai nyi kesü kha lethu no patena keya ketan.

⁸ Khiela kedithangwa satemeshon le nsala; ma tsü ghena no nanmeghü den. Isala keujüla no kemetsa nyiwa satemeshon lethu ma no küden.

⁹ No kemetsa nyiwa wi kekiza jüh tsü ma sapi metsa kayi cüden. No mang pi anyi ketsatanwa kiza khe tsüna ma palakechü wwa neng cüden.

¹⁰ Metsaya le kesalina no atuwa sala Apvüwa jüh kenyuwa nbenthu yishü. Keujüla no Kemethawa chü lethu no chüshikeya ben.

¹¹ Kemetsa na amapi pi no kahang wwa cüden.

¹² Keujüla no kemetsa ben lethu kiyi yaden, nu keujüla no tsü meya mvula lethu ketizensa den.

¹³ Kejüphon tsüna nkemejüghe, melali, maghamighe keten nzawa ti kesa

¹⁴ Ma ma jenka nyelela anyuti wi apen kemisi ntsa wi donki,

¹⁵ nu mathu kekuli ghena dhamang nu pvüdhi wa keten anyithu tsü ci.

¹⁶ “Dugholo melalithu!” Ma anyi kejüphonwa wi kiza,

¹⁷ “Ghanfükeya tssü tsüna minnunki nu ghanfükeya mesa tsüwa na nyankate.

¹⁸ Ma cho dukeathu na thowa na ma jjen wi wa khe shüden kesa nchü, thowa na ma jjen wi du khe keshüthu yyi kedhu wi dudha kesa nchü.”