KEMETSAJÜH 8 - Kemethajüh (N) (Re-editing) Bible (BSI)

Kemetsa Keseng

¹ Kinalo! Kemetsa na jishaben. Chüshikeya na ma sapi nyu ya zaya thsüben.

² Ma alen kete wi yyishiphon shonithu, nu lonpighe lenthu wi nganben.

³ Ma anyunuti kedulen wi kaghapeng jenkathu kete wi ben nu ciben:

⁴ “Hi nthu wi khie ben le, anyithu; hi ayyi wi anyi tsüdi ci.

⁵ No npi zügüya kwe? Zügü chüyalo. No kejüphon kwe? Meshen chüyalo.

⁶ Ijüh kemehai ntsathu ha kina chilo; hi no kekiza tsüdila meshon.

⁷ Hi mangwa no kiza khe tsüna atsentsawa; hi milikemesa tsü nanmeghü ntsa saden.

⁸ Hi kekhi tsüdi atsentsa; milikemesa nyelela tsütson zzi kesa mangla nmi.

⁹ Anyi chüshikeyawa ghena ha tsüdi methasi; mehaitsü chüya kesathu tuwi tsü ha tsüdila mechanshu.

¹⁰ Rükatssü mithon wi hi kicükegwewa tsü kessiya; suna kemehai ntsawa miwi palakechüwa kessi yalo.

¹¹ ‘Hi kemetsa, hi alon menkedhu miwi mehai; no nmvu keten tsanqai mangla pi hi ghapeya nben.

¹² Hi kemetsa nu hi chüshikeya ben; hi palakechü nu meju-mejü kinan ben.

¹³ Apvüwa kinyikü tsüna nkemehaiwa nankemeghü. Hi kekapvü nu kinankele, nkemehai lenthu, nu atsentsa nkenye jühthu tsü nanmeghü den.

¹⁴ Hi achothu kiden nu tsüthu kulishi den. Hi chüshikeya ben nu hi zü.

¹⁵ Hi kadimithu kiqa pi kadi sen thsü, nu kekhang kesenthu ya ayen kemehaithu chüya thsüden.

¹⁶ Ayyi wi kekhang kesenthu tsüdi hi kekiqa sen nu kadi saden, kedithu nu kemehaithu la.

¹⁷ Hi hi ghali ketenthu ghaliden; thowa hi bhaten khe hi muyaden.

¹⁸ Hi keben nu kekinyikü, mehai kayikeya nu haicenkeya pi cüden.

¹⁹ No hi wi mangwa muya khe tsüna suna kemehai ntsawa miwi mehaiki; rükatssü kemetha ntsa miwi la mehaiki.

²⁰ Hi ketsatan lenwa wi tonden; hi kemeshon len nieden,

²¹ keben-keyeng pi hi ghali ketenthu cü, keben pi mathu jjen pong cüden.

²² “Tsüdi jawi atuwa sa Apvüwa na hi sahang chi, kheni ma kekulithu jawi atuwa.

²³ Adechhü ntsa wina atuwa sa hi sachi, ayyi npi kesachi wi.

²⁴ Atssükedonethu tu wina hi pvüghadha, atssükebvüpenthu npi keben wina.

²⁵ Ayikhathu tu wina hi pvüghadha, yyishiphon thu pi mathu pen wi npi kechi wina,

²⁶ Anyiza na ayyi nu ma llithu nyelela ayyi akwen kaghan kesüla npi sa keya wi.

²⁷ Ma atssan sa kechi wi hi ciwi ben, akulu pi atssükedone miwi ghüdhi kechi wi,

²⁸ ma akulukeshü pi atssan wi chi, ma atssükedone kebvüpen shachi

²⁹ nu atssükedone ya ma khi kechi tsü miwi nshhugho lalo kesa ahza khukechi wi. Ma ayyi gikedegü kechi wi hi ciwi ben.

³⁰ Hi akwensen kemehaiwa kesü ti ma gwegheden, hi atsathang wila ma nonkeghe bvüwa sa, keshüthangla ma ketenpen wi anonghe—

³¹ ayyiwa ssinu anonghe nu anyithu nenden.

³² ‘Kepvünyithu, khili ijüh kinalo. Hi kekhi ti salo, isathu nthu nonghe yaben.

³³ Mangwa pi nthu sansi cü khe kina yalo. Metsaya; tsü nkhichi nsala.

³⁴ Anyi ijüh kina ketenwa anonghe yaden— ma ghanan kaghapen ijenka wi ben, nu ijjen kedulen wi hieden.

³⁵ Anyi hi bha ketenwa na kahang muyaden, nu Apvüwa na ma miwi ma kenen ben yaden.

³⁶ Anyi hi bha nkeyawa na ma ketanla ma patena ben; thowa na hi nanmeghüten khe keshü nenden.’