KEMETSAJÜH 7 - Kemethajüh (N) (Re-editing) Bible (BSI)

¹ Hi mangwale khi khe meshen yalo, itsa, nu khiela hi mangwa salo no kiza khe nmalila.

² Hi mangwale khi khe salo, isathu no hang yaden. No n-nyon khwe keten ti kiden-kesha nu hi kesansi nie yalo.

³ Hi kesansi pi matsü tsüdi wi no gwegheya; tsüpi nleben wi zhükiya.

⁴ Kemetsa pi ntssüggüwa ti sa, nu chüshikeya tsüpi npvüshang ntsawa ti saya.

⁵ Manyi na no pi kepa wubvüthu nu kemechu jühthu sen keten nzathu wina temeja cüden,

Kahang yencüki nkemehai Nzawa

⁶ Kuti hi ijjenkubhi wina akhemi wi ghangben,

⁷ nu hi nkesanan npvüza pvünyi kejon mu, tsü jawi hi kejüphon kesü mu.

⁸ Ma lentsen sen len ccügwen wi nza kesü hang keten pen kete witsü wa. Ma ma jjen kete wi pvüdhi waden,

⁹ tsüna minulen kejang sengwi.

¹⁰ Nu nzawa na ma metuya; ma keqheza menkedsa ti ma thsümeni sapvü nu acho kidenben.

¹¹ Ma keshüthangla aleben-jjan nu kejüghe nmila alentonti wi,

¹² nyelela accügwen wi, matsü pahan witsü asenkesapen wi hhaiden.

¹³ Ma ma kwen changpi kepvünyiwa lapengya, ma kimang, ma ghangti nu khi,

¹⁴ “Hi nansü kekinyi sa nu ahhanshakesa asa na ben.

¹⁵ Tsalina hi akhemi wi no bha shhugho. Hi no muya mvu ten nan no hewi tendha!

¹⁶ Hi Ejipt wi matsi keben linenthsü pi iwe dha theng.

¹⁷ Hi mirr, aloe, nu sinnamon hankedemvu pi chitheng.

¹⁸ Gholo! Aghaja thangthang ishinyi kenenli ben na. Ishinyi khokho miwi anonghethi saana.

¹⁹ Iwuba na ajjen wi nmi. Ma kelensie wi kijünyi wadha.

²⁰ Ma apisa kejon sen bvüdha nu hapta keni jüwi gho neng nben.”

²¹ Isanu nzawa na ma jüh kenyan pi ma mechuya, nu npvüzawa na ma jüh kemehai cho dua.

²² Zuli amesü süpon ssinu pathi wa keten ti, amishü na kephenki sen nu aca wi du keten ti ma nzawa nie bvüa,

²³ ciwi alakusü na ma leben kecun pvü ben. Ma awa na keghanthsü non wi du keten ti kesa— ma kahang na kemessi wi ben le kesa tsü ma nchüla.

²⁴ Tsalina khili ijüh kina yalo. Hi mangwa khi khe kina kaketsü saya.

²⁵ Nza tsüti kesa tsü ya nleben zanya thsü nsala; ma sen niela keqoedeja nwala.

²⁶ Ma anyi kejon yasa nu si nkeyakhi pathidha.

²⁷ Keujüla no ma jjen wi wa lethu no keshü yyi len wi tendha. Tsüna keshü len kemiluwa.