KEMETSAJÜH 6 - Kemethajüh (N) (Re-editing) Bible (BSI)

Kitsankayi kechi

¹ No anyi pahan na nyu menkepvü tsü dhi cüle njüh khishichidha kwe, itsa?

² No ketanla njühthu wina no ghanya, nu njüh khishi ketheng wi no yaya kwe?

³ Isalethu, itsa, no anyi tsüwa kekhang kekhu wi bendha, isala hati nu ciwi shhuya mehai: wan ma wi wa nu no teshi chilo kesa ma wi keshükene ya.

⁴ No jenwa nyelela nganwa nsala.

⁵ Awa kesü na aca kesü wina shhuya nyelela amishü kesü na asakejügüwa tuwi bvü keya ti sa yalo.

⁶ Kenontssü nyi ya atsawethu kahang yen wina kesansi chü meya thsüthu yishü.

⁷ Mathu na kessiwa, kediwa, nyelela kekhang kesenwa nmi,

⁸ isala mathu na mazu wi mathu tsse tsü saghu pi pathsü ghena kiden-kesha yaden.

⁹ Anyi kenontssüwa na matsü khathu awe wi khhali ben ten nu? Ma khathansha wi shagha ten nu?

¹⁰ “Hi melute jenya tan, hi ikwen kemisükiliya nu keu mnanya tan; ” ma isakhiden.

¹¹ Isala ma jen keben wi kahhatu na aghitsanqai pvü keten teng kedsawa ti gho ma vüyaden.

¹² Mangla nkenye, gheshighena nyithu na bvü keqoela milikemesa khiden.

¹³ Mathu na no mechu le agwokuli nu anyon mazü den,

¹⁴ mathu leben nkemeshon wi acho nkemehai meshen, kahe wi lela kekivvü pfüsi chiden.

¹⁵ Ha ghena, kededi na mathu nkitsan chila kihheden, nu mathu patena pi ayisü saaben.

^16-19 Apvüwa na nanmeghü nu ghangpvü ben nkeyacha alen tagü ben: Kekapvü, kemechu mili, kesazzi nkemi nyi pathi keten, gheshighena cho meshen keten leben, nkemehai sale kaghaji keten ccü, milikemesa sheikepi, nu anyi apvüshangthu jawi kekivvü pakethu ketenwa.

Keqheza Matangla kitsan kechi

²⁰ Itsa, nba na mangwa pi no kiza khe tsü salo, nu khiela njja na no sansi kechi jüh tsü mali nsala.

²¹ Manyi jüh tsüpi keshüthangla no ssinu nleben wi chipvü ya.

²² Manyi kesansijüh tsüna no kijünyi kewa wi nlen tsütson, aghaja wi no khwe, nu aghanan wi no sansi cüden.

²³ Manyi kicükegwe tsüna kethang kewegü; manyi satekemeshon tsüna no khati nhangthu yishü khe no sansi cüden.

²⁴ Tsüna no pi nza nkemehaithu nu nyu wubvüthu kemechu jüh witsü temeja cüden.

²⁵ Mathu tsikemehai tsü ya no mechu thsü nsala; mathu keqheza nyon kekü tsü ya no die yathsü nsala.

²⁶ Anyi kesü na amesa kesü men pi keqheza menkedsa nza kesü melliya mehai, isala keqheza tsüna ma keben tsüdi yasaben.

²⁷ No anni pi ndeshi wi chipvü nu nthsümeni nmecangla ya mehai kwe?

²⁸ No anni mihi kisa miwi alentsen nu nccü nmecangla ya mehai kwe?

²⁹ Nyu wubvü ssikejen tsüna kemessi tsüti kesa, thowa na hati sa khe ketizen saaden.

³⁰ Kaghanfüwa ma kaghama wi atsse kaghanfü tsü anyithu na ma n-nyuwala sa nden;

³¹ isala keujüla ma ghanya lethu tsü miwi kishen tagü khuchi nsathu yishü — ma keben tsüdi teshi nsathu yishü.

³² Isala qheza ketenwa tsü mangla nchü. Ma ketanla ma yasaben.

³³ Ma n-nyuwaküla kihhe pi nu anuphan ma ya kejüghe yathsü den.

³⁴ Awubawa na anonmeyen keben tsü wi aghekepvüki mangla nmi; ma ajukhikeya tsüna asakhen chü nten.

³⁵ Amen pi kecü tsü ma ya nben; ajuthu mangla pi ma lebenketsu satecca ya nben.