KEMETSAJÜH 31 - Kemethajüh (N) (Re-editing) Bible (BSI)

Kadimi kesü Kesansi

¹ Hathu hana aleben tsentsa jühthu kadimiwa Lemuel jja na pi ma kekiza:

² “No itsa hi kaghaliwa, hi kekhie luneng kechi. Hi mangwa le no kiza nu?

³ No kezü tsüdi pi keqheza wi nu apisa tsüdi pi nzathu ghena meyasala; tsüthu na kadimithu yasadha.

⁴ Kinalo, Lemuel. Kadimithu na kisengtssü tsü jjü nyelela kisengtssü kekhang tsü nmvu yishü.

⁵ Khathansha wi mathu na tsü jjüya khe mathu na ayenthu mali nu anyithu na nsenthu yishü keben kemeshon tsü n-ghang chiladen.

⁶ Kisengtssü tsüna anyi shü wa ketenthu ghena nu tsüna aleben ketizensa kebenthu ghena.

⁷ Mathu ya jjüya thsü nu mathu hhaketu nu anonkeghe nkemi tsü mali thsülo.

⁸ “Anyi mathu ketanla mathu ghena khi nkeyathu ghena khichilo. Kekiqa nkemithu kemeshon tsüdi khweyalo.

⁹ Mathu ghena khichi nu pendhenyi ketsatan kesü sa yalo. Ketha-u nu kehhatuthu kemeshon tsü khwe yalo.”

Kuliya kemehai wubvü

¹⁰ Awubvü kesa qo kesü muya le kesa tsü khatila dhu nu! Ma alon menkedhu miwi la ma men dhu ntsa le!

¹¹ Ma wuba na ma kenondi pi ma miwi chi, nu ma khiela ketha-u sa nben.

¹² Ma hang keben chu ma wuba ghena kemehai kuli nu khiela ma nkenen sa nten.

¹³ Ma assenthsü nu linenthsü kede ghena dhamang ben den.

¹⁴ Ma asenkesa hunjjen kekuli ti lenkesie wina kedsakejjü sen nu ma jjen wi ghoden,

¹⁵ Ma atsan npi thangla shagha nu ma theghi ghena kedsakejjü kiden nu ma maghalethu na mangwa nsathu yishü khe pi kiza den.

¹⁶ Ma ayyi ghang nu tsü shüya, nu ma apisa mellikeya tsüpi ciwi kemeshentsse lli ca den.

¹⁷ Ma apinonketsü nyi, zü nu kwencü ntsa.

¹⁸ Ma ma kekuli men tsüdi chü ben, nu aghaja wi minu lela kuli den.

¹⁹ Ma ma ketanla ma khhakhe tsü mou nu ma ketanla ma thsümeni de den.

²⁰ Ma ketha-u nu kahhatuthu tuwi mohho ntsa sa den.

²¹ Ma aghola ca lela leben güccü nden, kepaghenanye ma ma theghi ghena keyengthsü ben.

²² Ma awe keshithsü tsü de nu linenthsü nmiepheü kemehaithu tsü mphi den.

²³ Nyu na mehaitsü ma wuba tsü chü, nu ma anyi kemechan jawi kesü.

²⁴ Ma athsü de nu ageshi keqhanthu tsü sapi asenkesathu wi jeü den.

²⁵ Ma zü nu nyu ma küden nu gha keten ghena nmessi.

²⁶ Ma keccaketssü kemetsa jüh khi den.

²⁷ Ma keshüthangla dhamang nu ma theghi ghena nsenthu keyishü tsü ghang den.

²⁸ Ma tsangathu na ma nen nu ma wuba na ma seng den.

²⁹ Ma wuba na khi, “Awubvü kemehai kejonla ben, isala no mathu tsüdi miwi kemehai ntsawa.”

³⁰ Ammi kemehai tsüna kemechu nu atsikemehai tsüna nmiladen, isala nza Apvüwa kinyikü ketenwa tsü seng qo le.

³¹ Ma kekuli tsüthu ghena keseng pi ma cülo. Ma anyi tsüdi kekü yaqo.