KEMETSAJÜH 27 - Kemethajüh (N) (Re-editing) Bible (BSI)

¹ Khiela dhitsüwa ghena nkapvüla. Dhitsü wi mangwa saaten khe no nchü.

² Anyi kepa ya no seng thsülo — nkechü nyithu lela; khiela no ketanla tsü nsala.

³ Kejüphon tsüna agükeccü khuchiya kemehai tsüpi ghapechi lethu alon nu hachan kekiyan tsüna mangla nye.

⁴ Aleben ketsu tsüna aghe nkemehai nu keyasa, isala tsü pi anyonkisa ghapechi lethu mangla nye.

⁵ Ghangtan nu anyi kesü satemeshon kechiwa tsüna ma ya no ma khichi nten le kemeshen tsü miwi mehai.

⁶ Apvüshang lethu ma no patena cü lela mehai. Isala khathansha wi nghinyiwa na no lapengya khe kiden-kesha yalo.

⁷ Khathansha wi npvü nmaben khe no anikholi dsa mvu nten, isala khathansha wi no ghamaya khe atsse kekha lela nyankate dsa yaden.

⁸ Anyi ma jjen ghü ketenwa tsüna awa na ma ghacen ghü keten ti kesa.

⁹ Hankedemvu nu dile hankemehai tsüna no sapi n-nonghe kayi cüden, isala agükeccü na nleben kecca yasa cüden.

¹⁰ Npvüshangthu nyelela nba pvüshangthu tsü nmalila. Keujüla no agükeccü wi ben lethu ncünyuwa wi no kekiqa nkhiela; ajenphon nkete wi kebenwa tsüna ncünyuwa kesü na temeja wi kebenwa miwi no kiqaya mehai.

¹¹ Metsa yalo, itsa, isathu hi inonghe den; hi hi then ketenwa ghena keluneng kesü ben den.

¹² Mejumejü keten nyi na agükeccü tsü mu nu ghü yaden, isala meshen nan nketenwa na meshonqhe wa nu nkhe wi ma sen meshen neng den.

¹³ Anyi kesü na jüphon pi nkechünyiwa na nyu menpvü keben tsü ma pvüya mehai le khishi kechi ma tsanqai la pi dhiale kesa nkhishithu yishü.

¹⁴ Keujüla anyi kesü ghanen mitu misikhhali ma pvüshangwa shalom sachi lethu tsüpi kishenkecü ti saden.

¹⁵ Awubvü jükhajüghawa tsüna atsankegho ghanan wi atssü na jüca keten ti kesa.

¹⁶ No khati nu ma ya ccen ben wa thsüya mehai nu? No kutila ameghü tsü khen cüle nyelela deli pi nkwen pongti ghan nandhala nye nu?

¹⁷ Anyithu na khokho wi palachü yaden, amighe pi amighe yiyha saya keten ti.

¹⁸ Khhaghabvü ton tsü mehaitsü noncca yalo, isathu no ma bi la dsa yaden. Amagha thowa na ma pvüwa nyan kemehai sa khe ma nyuwakü yaden.

¹⁹ Atssü wi no ketanla n-mmi muya keten tsüti no ketanla nleben wi no chü yaden.

²⁰ Anyi kenmvuthu tsüna keshü yyi ti kesa, ciwi keshüthangla apen ben.

²¹ Anni tsüpi suna nu rükatssü tsü mecang nanden; anyi nyankemehai tsü la ghan nanya mehai.

²² Keujüla no kejüphonwa kihhe pi shütu-hangtu lela, no khiela ma kejüphonwa tsü kihheshiya nben.

²³ No kiden-kesha ntsa nu no khaghaneni nu amesüthu tsü ghangya kemehai chu tsü ghang yalo,

²⁴ kepaghenanye keben-keyeng tsüna anuphan ji nye. Mizzatentithu la anuphan ben nten.

²⁵ No accani hhaya nu tsü sengwa shüsha na shigütu keben wi ayyishiphon thu wi aghangthu hhayaden.

²⁶ No khaghanenithu ssen tsüpi athsümenithu saya mehai nu n-nenithu pahan jeü kechi pi ayyi shü yaden.

²⁷ Aneni kepathu tsenitssü pi no nu ntheghithu nu nmaghalethu la cüden.