KEMETSAJÜH 26 - Kemethajüh (N) (Re-editing) Bible (BSI)

¹ Kejüphonwa tsü keseng-u nye, tsüwa tsüna mazu wi aghola nyelela mazü wi atsankegho ti kesa.

² Kishen-keshi tsüna no patena meyacha keujüla no tsü keya qo nsa lethu. Tsüthu tsüna awa pighe nu khiela ka nketen ti kesa.

³ No goru kihhe, amighe pi gada pang khün, nu no kejüphonwa kekihhe-u.

⁴ Keujüla no kejüphon kekeü tsü luneng lethu no la anyi kekeüwa kejüphon ti kesa.

⁵ Kejüphon keluneng pi kejüphon kekeü tsü cülo, isathu thowa na tsü keüchi khe ma ma meshen keben ti acho npvü le kesa chü yaden.

⁶ Keujüla no kejüphonwa ya ajühkhi thsü lethu no ketanla nccü tendhila nchü; no agükeccü khie bendha.

⁷ Anyi ma ccü nkemehaiwa na ma ccü senya keten ti kejüphonwa tsüna kemetsa jüh sen tenlaya mehai.

⁸ Anyi thowa na jüphon khe tsü keseng tsüna alon pi alila wi bhenki le keben ti kesa.

⁹ Kejüphonwa na kemetsa- jühkhi keben tsüna no ya adikina nyi kesü ma kwen wi aghazü khhi le keben tsü meshenya thsüden.

¹⁰ Nyu melli ketenwa na kejüphon kesüle kesü lela kegho wa tsü ssiya keten tsüna anyi tsüdi kemeshen patena bendha

¹¹ Kejüphon kesü na kejüphon kekuli keni tughu sa keben tsüna affü na ma keduwe dsa neng keten ti kesa.

¹² Kejüphon jüphon ntsawa tsüna anyi kesü na nmetsa lela metsa le meshen ketenwa miwi mehai le.

¹³ Mangkesa na kenontssü nyiwa ajjen wina shhu nten nu? Ma mangwa messiben nu? Ssensitemithu la?

¹⁴ Ajjenkhen zankevüli keten tsüti kenontssüwa ma we wi kuweng ben den.

¹⁵ Anyi pahan na anün pi mathu pang wi chile kesa la nontssü den.

¹⁶ Anyi kenontssüwa na ma meshu tagü mathu kemeshen jjügi mehaitsü khushiya kemehaithu miwi meghe-metsaki le meshen den.

¹⁷ Ma kutili nkenye wi kiccücanli jüh kekhi tsüna alentonti wi wala affü khuna misi keben ti kesa.

^18-19 Anyi thowa na anyi kesü mechu theng nu ma keponsa saten le khi khe tsüna anyi kedeja nyi kesü na shüya kemehai tsanqai sen nu kiponlila meghe keben ti kesa.

²⁰ Achan nmithu anni na nyen den; ajühjügha nmithu kekitagha nmiladen.

²¹ Amihi tsüna annicü tsü yala qheben thsüden, achan na anni ya qheben thsüden, nu agükeccü khuchi ketenthu tsüna kiccücanli tsü ya benki ben thsüden.

²² Ajühjügha kekhi tsüna minnun ntsawa! Ithu khatila tsü mejichi yamvu nu!

²³ Aleben tsentsa nkenye jüh kekhi wi no ntsakhiwa mangwa meshenben khe pi kuthi keten tsüna rükatssü kemehai pi ayyipfü menkele nonwi chi ketheng ti kesa.

²⁴ Nkenyeghe kesawa na ma nankemeghü tsüpi ajühkenyan nonwi kuthiden.

²⁵ Tsüthu tsüna mehaitsü zaya benla metsi, isala ma n-nondila, kepaghenanye ma leben wi nankemeghü na pong ben.

²⁶ Ma nyu nankemeghü tsü kuthiya mehai, isala anyi tsüdi ma pala nkemehai kuli keten tsü muben.

²⁷ Anyithu thowa na aca pi nyu die khe mathu ketanla mathu yayaden. Anyithu thowa na ayyi kenen ketegüchi khe ma pacha yaden.

²⁸ No milikemesa jühthu pi anyi kesü patena cü mvu ketenwa tsü nankemeghü-u. Ajüh tsentsa nkenye tsüna mangla sengho nten isala keyasa.