KEMETSAJÜH 25 - Kemethajüh (N) (Re-editing) Bible (BSI)

Solomon Jühbvüthu

¹ Hana Solomon jühbvüthu, Judah kadimiwa Hezekiya nyithu na kadipen wi ghang nu zhüchi.

² Ithu na Anyiza na mangwa pi kuthitheng khe tsü ghena ma kinyikü den; kadimithu na mangwa khi mechan-metsa chi khe ithu na tsü ghena mathu kinyikü den.

³ No khiela kadimiwa na mangwa meshen ben khe tsü chü meyacha; ma kemeshen tsüna ithu miwi atssan kemisi nyelela atssükedone kedhu ti kesa.

⁴ Rükatssü wi nkemethathu tsü khushilo isathu tsü kecüwa na pala tsi kemehai kesü sa chiya mehai.

⁵ Nkemehai kesansithu tsüpi kadimiwa temeja isathu ma kidhan tsüna atsentsa kesen ghena nyu chüya den.

⁶ Khathansha wi no kadimiwa tuwi ngan khe ma kenen sale no anyi nsenthu keyishüwa ghe nsala.

⁷ Apen kemisi wi benyalo kekiza tsüna nben tsü teshi pi anyi kemechanwa cülo kekiza miwi mehaiki.

⁸ No pala pahan mu ketheng tsü ghena kaghajila ajüh kekaghatenpen wi nwala. Keujüla chüza kepa kesü na no pazzi benle kesa chüshiya lethu ciwi no mangwa saten nu?

⁹ Keujüla no nu njenphonwa nshinyi kemeshen kepapa saben lethu nshinyi jüwi tsü südheya nu kekuthi tsüpi nyu nchü thsüla.

¹⁰ Nyelethu anyi tsüdila no kekuthi pi thengya nten kesa chü yaden, nu no khiela kejüghe tsü pvü nu hangya nben.

¹¹ Acho mehaitsü khishi kechi tsüna rükatssü wi suna pi ma tsisa ketheng ti.

¹² Anyi nkesananwa na kekitsan pi anyi kina mvuthi ketenwa kecü tsüna suna kwenzzakeqhan nyelela ayan, suna kemehai ntsa pi sa ketheng miwi la mehai.

¹³ Kenondi qo nyilowa tsüna ma kesun kechiwa ghena mazü ghani kisa wi atssü kekicü kizükeya ti kesa.

¹⁴ Anyithu thowa na mathu jüh khishi chi nu khiela pi cü nten khe tsüna akulukeshü nu ameghü na atsankegho sengho nketen ti kesa.

¹⁵ Nlebentisie nu kekhi tsüna kekaghanineng kezü ntsawa pacha nu kekhang kesenthu la juya mehai.

¹⁶ Khiela no anikholi nsenthu keyishü tsü miwi ndsala; ji mtsü tsüna no sapi tuwe thsüaben.

¹⁷ Njenphonwa jjen wi wa ju nsala; ma no ghang ccükwenshü nu no nanmeghü wala nchü.

¹⁸ Milikemesa kemetsikemeni tsüna pathiya kemehai njünnu, achanghon nyelela alakusü ketsu ti kesa.

¹⁹ Sakeyishü tsü wi anyi nkenondi qowa kemaghaki tsüna ayha kekulu pvü nu pala nce keben ti nyelela accü nkemehai lenketsen ti kesa.

²⁰ Ma ccükwenshü kebenwa wi akhwi sa kechi tsüna kese tsüwi ma thsü khu kesa ti nyelela amcü pi kinaa yisü nyen keben ti kesa.

²¹ Keujüla nghinyiwa na ghama lethu ma ghanja cülo; keujüla ma digheben lethu ma ya jjüya thsülo.

²² No ma sapi kejüghe ghena ma mecang thsüden, nu Apvüwa na nkutimen sa cüden.

²³ Ajühjügha tsüna aghawa meghü na atsankegho sengho metsi keten ti aghekepvü sengho den.

²⁴ Awubvü jükhajügha kesa kesü ssinu ajjen wi hang kesa tsü ajjen mili wi kahangwa la mehai.

²⁵ Asakhenwa alen kelensie wina ajüh kemehaiwa zakeya tsüna no qhayi nu dighe keben wi atssü kekicü jjükeya ti kesa.

²⁶ Kemehai nyiwa na nkemehai nyiwa kekhu wi du keten tsüna no yala atssü kebvüpen pa-nkhwen nyelela aji pi kechi tssükhang tsü meshen neng yathsü den.

²⁷ Anikholi ji mtsü kesa tsüna nghena nmehai, nu keseng ji mtsü yaya le kesa tsü la tsüti kesa.

²⁸ Keujüla no nlebenketsu tsü kekheneng meya lethu no kekiqa khweti nkemi anyunutiwa nyu no ssi kesaliya kemehai keben ti kesa.