KEMETSAJÜH 23 - Kemethajüh (N) (Re-editing) Bible (BSI)

- 6 -

¹ Khathansha wi no anyi kemechanwa gweghe dsajjü le donkiya khe ma thowa khe meshen yalo.

² Keujüla no apangnyan ntsa ten lethu no ketanla no kekhenengya.

³ Ma atsse kemehai khukechi wi tsü ahhesha nsala. Ma no mechu benla nchü.

- 7 -

⁴ Keben muya le kesa ghena no shonthi ntsa kesa tsü nsale kesalina metsa yalo.

⁵ Npisa tsüna cwen kechi kesü wi bvüya mehai, tsüna ma gisha shigüya nu amumu kesü pighe bvü kesa ti saden.

- 8 -

⁶ Anyi kecügüwa miz wi tsü ndsajjüla nyelela ma kedsakejjü kemehai khukechi wi tsü ahhesha nsala.

⁷ “Gholo nu jikayi dsa yalo,” ma isakhiden, isala ma tsü ntsakhiwa khi nben. Ma mangwa meshen khe ntsakhiwa ma tsüwa tsü.

⁸ No mangwa dsaya khe tsüdila tuweshiaben, nu njüh kenyan yasaden.

- 9 -

⁹ Kejüphonwa wi ma men keben jüh tsü nkhi lalo; ma tsüna mehai le sa nben.

- 10 -

¹⁰ Khiela aggü kemechan kaghawen tsü npaphighela nyelela magha-maghangthu lli tsü nkaya nsala.

¹¹ Apvüwa na mathu sheikepi kekhangwa, nu ma mathu sheipi nu no matang den.

- 11 -

¹² No kesansiwa miwi nleben chi nu no chüya kemehai tsüdi chü yalo.

- 12 -

¹³ Ghanyi sansikha kesa tsü nkisütula. Mehaitsü ma kekihhe tsüna ma pathi nben.

¹⁴ Ntsakhiwa tsüna ma kahang hangsha yala nchü.

- 13 -

¹⁵ Itsa, keujüla no metsa shagha lethu hi inonghe ntsa saden.

¹⁶ Hi khathansha wi no kemetsa jühthu khi keben zaya khe hi kapvü ntsa saden.

- 14 -

¹⁷ Kesami nyithu miwi anyon nsala; Apvüwa nyuwakekü tsü ya no kahang wi meshen ketenwa tsü sa yalo.

¹⁸ Keujüla tsüti sa lethu ghaketen wi ntukemeza na ben.

- 15 -

¹⁹ Kinalo, itsa, metsa nu kemeshen kedhu pi no kahang lenwa sayalo.

²⁰ Anyi kisengtssü ji mtsü jjü ketenthu tsü nyelela ahhekesha tsü ngweghela.

²¹ Adikina nu ahhekeshathu tsüna ketha-u saden. Keujüla no kedsa nu kejen ketan saden lethu no wan athsüqae mphi waben.

- 16 -

²² Nba jüh kinalo; ma nyelethu no hang nkesa. Khathansha wi njja na qhai wa khe n-nonkeghe pi ma ccücalo.

²³ Atsentsa, kemetsa, kechü, nu kemeshen kemehai—hathu hana ma men pi cü qo, isala pi jeü le kesa nghena dhu mtsü.

²⁴ Ketsatan nyi bawa ma nonghe keben tsüna ajjügi kemehai ben. No atsa kemetsawa miwi kapvüya mehai.

²⁵ Nba nu njja ya nghena ashhüsa thsülo; anonkeghe tsüpi njja cülo.

- 17 -

²⁶ Itsa, nleben chiya, nu hi kahang yala no tsütsonca sayalo.

²⁷ Keqheza menkedsa nu ketsatan nkemi nzathu tsüna shüya kemehai ca kesü le.

²⁸ Mathu na teng kedsathu ti no hie nu anyi kejon sapila ntsatan thsüladen.

- 18 -

^29-30 Anyi kesü na kisengtssü ji mtsü jjü nu kheneng ketheü la jjü le kiden ketenwa pi hi ccücalo, isathu hi anyi kesü ketizensa nu ma ketanla ma ghena ahathana, keshüthangla kekivvü pfüsi nu ma leben nkaghajüh khi ketenwa pi no ccüca na. Ma nyon na ajjü kenmie ti, nu ma pvüketen yisüthu tsüna ghüya kesa.

³¹ Kisengtssü ya no mechu thsü nsala, tsüwa tsüna nmieni nu ahyi nonwi cwencwe., nu mehaitsü du ten lela.

³² Ghanenwa wi no amaghang ji nkemehai ntsa no mcü ketheng ti saaden.

³³ N-nyon tuwi chüshi nkeya ghoden, nu no meshenshi nyelela methasi ajüh khishiya nben.

³⁴ No atssükedone wi keten ti, ahunjjen na khulukhulu wa keten lina kaghaji keben ti saden.

³⁵ No khiden, “Hi kihhe theng changla, hi kiccü thengla metsi, isala hi tsü meshen meya. Mangkesa na hi shagha meya nu? Hi pala njjüthu yishüdha.”