KEMETSAJÜH 22 - Kemethajüh (N) (Re-editing) Bible (BSI)

¹ Keujüla no anyankemehai nyelela keben-keyeng manyi kesü kessiten lethu anyankemehaiwa kessiyalo.

² Keban le ketha-u lela hawa ha ben: Apvüwa na manyi qho sachi.

³ Mejumejü nyi na agükeccü gho keten tsü mu nu ghü yaden, isala meshennan nketenwa na meshonqhe wa nu nkhe wi ma seng meshen neng den.

⁴ Apvüwa jüh nie, satemeniya, isathu no keben, kenyuwakü, nu kesie kahang muya den.

⁵ Keujüla no kahang tizen lethu gheshighenathu ghanya keten alen wi acathu tsü ghü yalo.

⁶ Ghanyi kesü na khati nhangthu yishü khe pi ma sansi cülo, isathu ma kahang chu wi tsü meshen ben den.

⁷ Ketha-u nyithu na kebanthu nssümaghathu. Apisa nna yalo isathu no ma ji nna keyawa tsü nssümagha sadha.

⁸ No nketsatan macü vvüchi lethu kededi shigü shagha den, nu no nyu kepasha tsüna asakhen saaden.

⁹ Mohho nu no kedsakejjü pi ketha-uthu gweghe gishülo. Tsüghena no kesawegü pvü yaden.

¹⁰ Anyi kedithangwa tsü ghü yalo, isathu kiccücanli, kekitagha nyelela kethenli kesa tsüna nmiladen.

¹¹ Keujüla no aleben kemetha nu ajüh kecca kekhi nen lethu kadimiwa na npvüshangwa sadha.

¹² Apvüwa na milikemesathu jüh tsü meyala atsentsawa pi mehaitsü ketheng tsü ghangden.

¹³ Anyi kenontssüwa na ma jjen wi ben den; ma keujüla akhemi wi shhu lethu ssensitemi na ma ghan ben, isakhiden.

¹⁴ Keqheza tsüna aca, Apvüwa mathu miwi aghepvü kebenthu na wa ciwi yayaden.

¹⁵ Ghanyithu na mathu yenwa ghena nkiden-keshala, nkejikagha kekulithu tsü saden, isala mehaitsü ma kihhe kechi tsüna ma ya khati nsathu yishü khe chüya thsüden.

¹⁶ Keujüla no aju pila kebanthu cü nyelela benyale kesa ghena ketha-uthu pasha lethu no ketanla ketha-u saaden.

Kemetsajüh kekhi Changha

¹⁷ Kinalo, isathu hi kemetsa nyithu na mangwa khi khe pi no sansi cü na. Mathu kesansijüh tsü ccügwencüka si,

¹⁸ nu keujüla no tsüthu meshenya nu khiya mehai lethu no n-nonghe yaden.

¹⁹ Hi no ya no kenondi pi Apvüwa miwi chi thsü mvuben; tsalina hi khili tsüthu tsüpi no kizaden.

²⁰ Hi no ghena kekhi jüh changha zhütheng. Ciwi tsü palakechü nu kesansijüh kemehaithu na ben,

²¹ nu atsentsa tsü mangwa khe pi no sansi cüden. Isanu khathansha wi no tsü bha yalo nu no kesun chi khe no keluneng kemeshonwa tsü sengho den.

- 1 -

²² No saya benle nu ketha-uthu miwi nghena kemehaiwa tsü nbhala; ma kekiqa nmila ajühkekaghatenpen wi ngan kebenthu miwi nghena kekiyi nbhala.

²³ Apvüwa na mathu ghena khi nu mathu patemessi ketenthu kahang patemessiden.

- 2 -

²⁴ Anyi ma lebentsu keten nu nkemehaithu tsü ssinu apvüshang nsala.

²⁵ No mathu yencüki tsü chüya nu kemili meyala la nchü.

- 3 -

²⁶ Anyi kesü nyu menkepvü tsü no pvüya mehai le nkhishi chila.

²⁷ Keujüla no pi cü meyala lethu mathu nwe lela khusen bvüaden .

- 4 -

²⁸ Khiela aggü kemechan kaghawen nbamyithu na pi sheng ketheng tsü npaphighela.

- 5 -

²⁹ Anyi kesü kemehai kekuli sa keten pi hi ccücalo, isathu hi anyi kesü kadimiwa kegweghe qo nu tsüdi miwi mehai kayi kesa pi no ccüca na. -