KEMETSAJÜH 20 - Kemethajüh (N) (Re-editing) Bible (BSI)

¹ Kisengtssü ji mtsü kejjü tsüna no sapi meghangmeghe nu kejüphon sa thsüden. Adikina tsüna kejüphon.

² No ssensitemi ghamo kebenwa messi kesa ti aghepvü keben kadimiwa tsü messi yalo; ma sapi leben minu thsü keten tsü no ketanla no pathiben.

³ Kejüphon kesüle kesü lela kiccücanlijüh khishuya mehai; isala kenyuwa qothu na mathu ghü bvüden.

⁴ Allikeca thowa na ma llithu chhükepon kesa tsü wi nontssü khe ma mangla wwiya nben.

⁵ Anyi kemeshenthu tsüna atssükhang kedhu wi atssü ti kesa, isala anyi kesü palakechü kebenwa na tsüthu tsü khushi yaden.

⁶ Anyi tsüdila ma khatila ajühya nu aleben tsentsa saten khe tsü cüki khiden, isala anyi thowa na ntsakhiwa meshon khe tsüwa tsü bha nanlo!

⁷ Keujüla atsangathu na ketsatan nu kemeshon kuli keten ba kesü ben lethu mathu na acenpvü kemehai ntsa.

⁸ Kadimiwa na ajühkekaghatenpen wi donki nu nkemehai muya lethu ma tsü chü yaden.

⁹ Anyi kesüla ma ntsakhiwa kemeshen metha nu kesami wina shhuyadha kesa khiya mehai kwe?

¹⁰ Apvüwa na atsentsa nkenye wi kewhu nu kidegü sen keten tsü nanmeghü den.

¹¹ Ghanyi kesü lela ma kekuli wina ma mangwa khe tsüpi ccücaden; keujüla ma atsentsa nu mehai lethu no khiya mehai.

¹² Apvüwa na muya kemehai anyon keni nu zaya kemehai akhuna keni pi ithu cüdha.

¹³ Keujüla no ntsü dedi pi jen benten lethu no ketha-u saden. Dhamangki bentenlo isathu no kedsakejjü kejon ben yaden.

¹⁴ Pala shei keten nyi na keshüthangla ma men ji mtsü le kesa aleben nkaghajüh khiden, isala ma kheneng bvü nu ma khishakeya tsü khipi kapvü den.

¹⁵ Keujüla no mangwa khiben khe no tsü chüben lethu no suna nu alon menkedhu miwi pala menkedhu pahan bendha.

¹⁶ Anyi kesü na jüphon pi nkechü nyiwa na nyu menkepvü tsü ma pvüya mehai le khishi kechiwa na ma tsanqai la pi dhile kesa khishi nchithu yishü.

¹⁷ No nketsatan wina mangwa muya khe tsüpi atsse kemehai ntsawa ti n-nonkwenya mehai, isala mitule minu lela tsüna ahachan na apang pongti keben ti saden.

¹⁸ Kesansi kemehai yaya isathu no mehai yaden; acho mangla nmila aghi tsü keka nwala.

¹⁹ Ajühjügha kekhi nyi na kekuthi jüh pi thengya nten. Ajüh ji mtsü khi ketenthu ghü yalo.

²⁰ Keujüla no nba njja kishencü lethu no kahang tsüna kejang wi ahulanni na nyen wa keten kesü ti saden.

²¹ Khati yazishu no keben-keyeng muya khe tsüti tsüna nghena kemehai zeng den.

²² No ketanla nkemehai tsüpi cü nengle nsala. Apvüwa nondiya isathu ma tsü satemeshon cüden.

²³ Apvüwa na atsentsa nkenye kewhuchan nu kewhu nkemetsa senketen nyithu tsü nanmeghü den.

²⁴ Apvüwa na ithu len tsü meshenyadha; isathu khatinu anyi kesü ma ketanla ma kahang khiewa waten khe meshenshiya mehai nu?

²⁵ No kekinyi kesü pi Anyiza cüle npi kekhishi wina meshen kaketsü sachilo. No asakhen wi nseng meshen nengla nchü.

²⁶ Kadimi kemetsa kesü na thowa na kuli zziben khe bhashi yaben, nu nanketizen nmila ma meten-meshaden.

²⁷ Apvüwa na aleben nu kemeshen pi ithu cüdha; ithu ketanla ithu wina kuthiya nben.

²⁸ Kadimiwa na kekhang kesen wi atsentsa, ketsatan nu kemeshon sa keben chu kadisaden.

²⁹ Ithu tsüdila kepvünyithu kezü tsü nen nu keqhai wi alikepun tsü küden.

³⁰ Kuti witsü ithu lenthu tsü kemili le kesa ghena agüccü ntsa kesa tsü la ghoden.