KEMETSAJÜH 2 - Kemethajüh (N) (Re-editing) Bible (BSI)

Kemetsa Kutimen

¹ Itsa, hi no kesansijüh chüyalo nu hi mangwa salo no kiza khe mali nsala.

² Mangwa na metsa khe tsü kinaya nu tsü chüshiya le kesa kiden yalo.

³ Anle, palakechü ghena keshükenelo; chüya kemehai khielo.

⁴ No npiketsü sala rükatssü nyelela kuthiketheng keben bha kesa ti tsü bha tenlo.

⁵ Keujüla no tsüti sa lethu Apvüwa kemessi tsüna majjügi khati khe chüya nu no Anyiza cüki chükayi yaden.

⁶ Kemetsa khuchi ketenwa tsüna Apvüwa le; palakechü nu chüshikeya tsüna ma wina ghoden.

⁷ Ma atsentsa nu ketsatanthu ghena kekiqa nu kekhwe khuchi den.

⁸ Ma kemeshon wina nyu nanketenthu tsü khweden, nu ma wi lebenchi ketenthu ghihie den.

⁹ Keujüla no ijüh kina lethu ketsatan, atsentsa nu kemeshon tsüna mangwa khe chüyaben. No mangwa kesau khe chüyaden.

¹⁰ No metsa shhughoya den nu palakechü tsüna anonkeyeng pi no cüden.

¹¹ No kechü nu chüshikeya tsüna no khweya den,

¹² nu kepazzi kekuli wina no kekheneng cüden. Mathu jüh kekhi wina agükeccü pfüsichi ketenthu wi no khupi temeja cüden—

¹³ tsüthu tsüna kesami kejang wi hang le nu ketsatan kahang teshi kesathu,

¹⁴ kepazzi kekuli wi mathu nonyeng nu ajjügi nkemi nkemehai wi mathu nonghe ketenthu,

¹⁵ nyu ma nondiya nkeben nyithu.

¹⁶ Nza nketsatanwa na ma jüh kenyan pi no mechu kegho wi no nganya mehai,

¹⁷ ma wuba wi lebentsentsa nkesenwa nu kemetha kekishen tsü mali ketenwa tsü.

¹⁸ Keujüla no ma jjen wi wa lethu no keshü len wi wa tendha. Ciwi kewa tsüna keshü yyi tetsaki wa tendha.

¹⁹ Ma hhainan wa ketenthu thola kheneng gho nten. Ma khiela kahang len wi kheneng gho nten.

²⁰ Tsalina no anyi kemehaiwa tsütsonca tsü nie nu ketsatan kahang wi nhangthu yishü.

²¹ Ketsatan nyithu na ithu yyi hawa wi hang yaden.

²² Isala Anyiza na ayyiwa wina anyi gheshighenathu khushi nu ayyiwa wina aghangthu ti kesamithu pfüshiaben .