KEMETSAJÜH 19 - Kemethajüh (N) (Re-editing) Bible (BSI)

¹ Milikemesa kejüphon kesü sa kesa tsü ketha-u sa lela atsentsa kesawa mehai kayi.

² Kechü nmila lebenkechi tsüna nmehai; leben kesie nkemi tsüna no ssi wa agükeccü wi chi cüden.

³ Anyi pahan na mathu kejüphon kekuli wina mathu ketanla mathu yasa isala pi Apvüwa kaden.

⁴ Keban na keshüthangla apvüshang ketheü muya ben den, isala ketha-uthu tsü keu keben tsü la pi thengya nten.

⁵ Keujüla no ajühkekaghatenpen wi milimesa lethu no meten-mesha yaden, ciwi shhukeya nmi.

⁶ Anyi tsüdila anyi kemechanthu tsü kenen pvüya le kiden ben den; anyi tsüdila nyu kenen kesa khuchi ketenthu tsü pvüshang le khiden.

⁷ Ketha-uwa na ma cünyuthu tuwi lela ma men nmi; ma ma pvüshang nkemi tsüna amankesa nye. Ma ma ghechhen sa lela kesütanla juya nben.

⁸ No ketanla no kenen sa nu no chüya kemehai tsüdi chü yalo; isanu no mangwa chüya khe tsü meshenya, isathu no mehai kayi yaden.

⁹ Ajühkekaghatenpen wi milikemesa nyi kesütanla kemeten- kemesha witsü shhu meya cha; ma dediden.

¹⁰ Kejüphonthu na anonkekwen wi hang yishü, nu nssümaghathu na kedithu miwi kekhang sen yishü.

¹¹ Keujüla no mejumejü ben lethu no nleben ketsu kekheneng yaden. Khathansha wi anyi kesü ntuwi sazzi khe tsüpi makesasa sakea tsüna kemehai keti kesü.

¹² Kadimiwa leben ketsu tsüna ssensitemi kesü kaghamo ti, isala ma kenen tsüna aghang miwi akejan ti kesa.

¹³ Atsa kejüphonwa na ma ba ssi wa kededi wi chi cüden. Awubvü jükhajügha kesawa tsüna atssü jüca ben keten ti kesa.

¹⁴ Anyi kesü ma bajja jjen nu apisa ghongya mehai, isala Apvüwa ketan mejumejü keten wubvü tsüpi ma cüya mehai.

¹⁵ Nontssü benlo keujüla no isamvu lethu; jen benlo isathu no ghama ben den.

¹⁶ Anyiza yenthu nie yalo isathu no kesie hang yaden; keujüla no tsüthu nkechü ghe sa lethu no shüden.

¹⁷ Khathansha wi no pala pi ketha-uthu cü khe tsüna pi Apvüwa nna thsü keben ti kesa, nu Apvüwa na pi no cü neng den.

¹⁸ Ntsangathu chüya kemehai tsü wina sansikha chilo. Keujüla no tsüti nsa lethu no mathu kiqa pi mathu ketanla mathu yasa thsü ben.

¹⁹ Keujüla anyi kesü na leben ketsu nmehai lethu ma tsü kutimen tsü muya thsülo. Keujüla no agükeccü wi kuti ma khushi cü lethu no tsü nsa nengthu yishü.

²⁰ Keujüla no kesansijüh kina nu chüya mvu ben lethu ghanan kesü no metsa yaden.

²¹ Anyithu na alen kepapa kesa tsüdi kiden benya mehai, isala Apvüwa na ma kemeshenwa tsü sa chiden.

²² Apvükemene tsüna nyankekinyen; ketha-uthu na milikemesathu miwi mehaiki.

²³ Apvüwa jüh nielo isathu no leben ghashu nu keyasa wi apvü-nsala kesie hang yaden.

²⁴ Anyi pahan na kedsakejjü pi ma pang wi chile kesa la nontssü ntsa saden.

²⁵ Kekapvüwa tsü meten-mesha ncüthu yishü, isanu anyi thowa na kemehai mangla chü nten khe chü meya thsüthu yishü. Keujüla no metsa lethu no satemeshon kechi wi no chüyaben.

²⁶ Nkemejüghe, nyankekinyen nyi ketan na ma ba nkhichi nyelela ma jja jügüshi pi ma jjen wina bvü thsü den.

²⁷ Itsa, khathansha wi no pala nchü mvula ngan wa khe no chükeyawa tsü la wan pi ghameme saden.

²⁸ Chüza kesü na nyu patena cüle keben wi tsü atsentsawa nmiladen. Gheshighena nyi na nkemehai pampi kinan tsü nenden.

²⁹ Kedithang kejüphonwa tsüna kekihhe muya metsi.