KEMETSAJÜH 17 - Kemethajüh (N) (Re-editing) Bible (BSI)

¹ Agükeccü na pong keben jjen witsü mishu kesa tsü alebencca amesa kivü kedsawa mehai kayi.

² Amagha kemetsawa na ma pvüwa tsa ma men nkemiwa miwi kekhang senya nu ma ji la pahan ghong yaden.

³ Anni pi suna nu rükatssü mecang nanden, isala Apvüwa na anyi lebenpi nanden.

⁴ Anyi nkemehaithu na nkemehai chothu tsü kinaden, nu milikemesathu na milikemesa tsü kinaden.

⁵ Keujüla no ketha-u nyithu nankeqhe lethu no mathu sa kechiwa Anyiza nkekhichi saben. Keujüla anyi kesü ma cenpvü nkemehai ghena no n-nonyeng lethu no meten- mesha yaden.

⁶ Keqhai nyi na mathu tsawa tsangathu ghena kapvü den, pvüzanyithu na mathu bathu ghena kapvü keten tsüti.

⁷ Nyuwakü keya nyi na milimesa nten, nu kejüphonthu na ma men keben mangla khiya nten.

⁸ Anyi pahan na alaa tsüna kedema ti kuliya mehai le meshen den; mathu na tsüna pala tsüdila kuliya mehai le nondi den.

⁹ Keujüla anyithu ya no nenya thsü mvuthu, mathu ntuwi kesazzi tsü teshi pi cülo. Kesazzithu meshen keten tsüna apvüshang yasaden.

¹⁰ Kemetsa nyi kesü na kuti kekihhe wi chükeya tsü kejüphonwa na meza tughu kekihhe wi chükeya miwi jiki.

¹¹ Keshü na nyilo kedaggüwa ti keshüthangla kekivvü pfüsi chi keten gheshighenawa miwi ghoden.

¹² Kejüphon pahan kejüphon kekuli wi dhamang keben tsü metu kesa tsü aduweng bvü kesü nyu ma zza ghanfüya kesa metu keyawa mehai.

¹³ Keujüla no nkemehai pi kemehaiwa kutimen sa lethu khiela njjen wina nkemehaiwa nmila meya cha.

¹⁴ Kiccücanli kidegü keya tsüna atssü ncen ketheng pvüssi tegü ti; tsü npi lle kewa jü wina khen yalo.

¹⁵ Kesazzi nkemithu kemeshensa nyelela gheshighenathu ya makesasa sa thsü kesa tsü keni qho Apvüwa na nanmeghü den.

¹⁶ Kejüphon kesü ya lesü chüya thsüle pisa pi kededi tsüna mangla kemehai saya nben, kepaghenanye ma chüya keten leben npvü.

¹⁷ Apvüshangthu na keshüthangla ketizenli pi ccüca den. Keujüla agükeccü pvü nkiqali lethu cünyunyi kesa ma jjügi mangwa nu?

¹⁸ Anyi ma kemeshen nkemiwa ketan na anyi kepa wi kesü nyu men pvü keben tsü ma khhile khishi chiden.

¹⁹ Kesami nen keten tsüna agükeccü kulikechi tsü nenden. Keujüla no matsü tsüdi wi kapvüshüsha ajühkhi lethu no agükeccü khie bendha.

²⁰ Anyi thowa na nkemehai meshen nu khiten khe ma keyasa ketan khe kemehai mangla muya ben kesa n-ghangla mehai.

²¹ Atsawa na kejüphon kekuli kesa tsüna ma ba ghena ahathakina nu aleben gükeccü ketan.

²² Anonghethi kesa tsüna no ya hhanhashu ben thsüden. Matsü tsüdi wi ammi jangthi kesa tsüna ashina keshü.

²³ Gheshighena pendhethu na kekuthi wi alaa tsü yaden, isanu atsentsawa nsaladen.

²⁴ Meghe-metsa nyi kesü na kemetsa kekuli tsü mitsü den, isala kejüphonwa alen kejon wi kidegü shhugho den.

²⁵ Atsa kejüphonwa na ahathakina sengho ma ba cü nu aseng kemeshen neng kedi sengho ma jja cüden.

²⁶ Anyi kesazzi nkemiwa miwi kedhikejü keya tsü nmeshon; khathansha wi anyi kemehaithu meten-mesha khe atsentsawa tsü pi kemilidha.

²⁷ Anyi kesü ma ketanla ma chüti kebenwa na matsü tsüdi wi ajüh khiben nten. Anyi thowa na ccen benten khe atsentsa palakechü ben.

²⁸ Kejüphonwa lela ma ccen nu ma pang kemabhonya lethu ma metsa nu meghe-metsa le meshenya mehai.