KEMETSAJÜH 13 - Kemethajüh (N) (Re-editing) Bible (BSI)

¹ Atsa kemetsawa na ma ba na ma satekemeshon tsü kina kaketsü saden, isala kekapvüwa na khiela ma sazzile sa nten.

² Kemehai nyi na mathu mangwa khi khe mathu kutimen muyaben, isala thowa na nyu mechu ten khe yasayala ghena ghama ben den.

³ No mangwa khi khe kiden-kesha nu no kahang khweya. Nkiden-keshala khi ketenwa na ma ketanla ma yasa yaden.

⁴ Anyi kenontssüwa na ma nmvu ntsa ben lela ma khiela tsü muya nben. Aghechen sa ketenwa na ma kenmvu tsüdila muyaden.

⁵ Atsentsa nyi na milikemesa nanmeghü den, isala gheshighena nyi jüh tsüna kejüghe keya nu anyankekinyen.

⁶ Ketsatanwa tsüna kepazzi nkemithu khweden; kesami nyi na qanca ketenwa tsüna gheshighena ghena.

⁷ Anyi pahan na mangla nmi lela keban ghe saden, isala pahan na ben lela ketha-u ghe saden.

⁸ Kebanwa na ma pisa pi ma kahangli hangsha yaden, isala thola ketha-u nyi pateqhe nten.

⁹ Ketsatanthu na anni wegüchang keben ti; gheshighenathu na ahulanni na nyen wa keten ti.

¹⁰ Meshen pi kekapvü tsü mangla nye isala agükeccü ketan. Sansi cülo kekhie tsüwa mehai kayi le.

¹¹ Khati lekete nu keben-keyeng muya khe tsüti wan bhatagha ben. Khati agüccü nu benya khe tsüti ben yaden.

¹² Khathansha wi kaghang pacha khe aleben la pacha den, isala no kenmvu tsü mu cenkeya tsüna anonkeghe pi no pong cüden.

¹³ Keujüla no kesansi kemehai tsü hhaghe lethu no kekivvü khie bendha; tsü nie yalo isathu no hang yaden.

¹⁴ Kemetsawa kesansijühthu tsüna kahang tssükebvüpen; tsüthu tsüna kemessi wi no kiqa pi shhuya thsüden.

¹⁵ Kemeghe-kemetsa tsüna kekü muyaden, isala nkenondi qothu tsü keyasa len wi ben.

¹⁶ Mejumejü ketenthu na keshüthangla mathu npi kekuli wi meshen nan den, isala kejüphonthu na mathu nkechü tsüpi nyu ccücaden.

¹⁷ Nkenondi qo nyithu na kekivvü bha chiden, isala kenondi qo nyi tsü kecca sengho den.

¹⁸ Anyi thowa na chüya mvu nten khe ma ketha-u sa nu anyankekinyen saya ben. Anyi thowa na satemeshon kechi tsü kina ten khe kekü muya den.

¹⁹ No kenmvu mukeya tsüna khatila mehai nu! Kejüphonthu na nkemehai wi kheneng kesa tsü hhaghe den.

²⁰ Kemetsathu gweghe tenlo isathu no la metsa yaden. Keujüla no kejüphonthu tsü ssinu apvüshang sa lethu no dedi yaden.

²¹ Agükeccü na kahe wi lela kesami nyi nieden, isala ketsatanthu tsü kemehai pi mathu kutimen sa cüden.

²² Anyi kemehaiwa na ma tsawa tsangathu theng cüya kemehai keben-keyeng na ben, isala kesamithu keben-keyengwa tsüna ketsatan nyithu wi waaden.

²³ Alli npi keca tsüna ketha-uthu ghena kedsakejjü kejon muya kemehai na ben, isala nkemeshon nyi na mathu ya tsü nca thsü mvu saden.

²⁴ Keujüla no kemeten pi ntsa cü nten lethu no ma ghali nten. No ma ghali ten lethu ma satemeshon chiben.

²⁵ Ketsatanwa na dsa pi nonkekwen sakeya na ben, isala gheshighenathu na keshüthangla ghamathi ben den.