KEMETSAJÜH 10 - Kemethajüh (N) (Re-editing) Bible (BSI)

Solomon Jühbvüthu

¹ Hathu hana Solomon jühbvüthu: Atsa kemetsawa na ma ba na ma ghena kapvü yathsü den; kejüphon kesüwa na aleben kinaa sengho ma jja cüden.

² Atsentsa nkenye wi keben-keyeng mukeya tsüna nghena kemehai mangla saya nben, isala atsentsawa tsüna no kahang hangsha cüden.

³ Apvüwa na anyi kemehaithu ya ghama thsü nben, isala gheshighenathu tuwi mathu yamvu ketenwa tsüpi kuthi cüden.

⁴ Kenontssü tsüna no sapi ketha-u sa cüden, isala apinonketsü tsü no sapi benya thsüden.

⁵ Mejumejü nyiwa na yangdsaketenthu na nyün keben wi wwi yaden; allikewwi tsü wi jen keten nyi tsüna anyankekinyen kesü.

⁶ Anyi kemehaiwa na kesawegüthu muyaden. gheshighenawa jüh tsüna yasayala yencüki tsüpi kuthi den.

⁷ Kemehai nyi pi kesawegü kesü ti meshen ben den, isala gheshighenathu tsü wan maliaden.

⁸ Mejumejü keten nyithu na kesansijüh kemehai tsü yayaden. Anyi thothu na kejüphon jühkhiten khe dediaben.

⁹ Kemeshonthu na apvü-nsa nu ccen ben den, isala nkemeshonthu tsü ghan yaben.

¹⁰ Atsentsa pi nkhila ketenwa kekivvü pfüsi chiden, isala ghangtan nu kha kechiwa na kecca ghena kuliden.

¹¹ Anyi kemehaiwa jüh tsüna kahang tssü kebvüpenwa, isala gheshighena nyiwa jühthu tsü yasayala yencüki pi kuthiden.

¹² Nankemeghü tsüna kekivvü pfüsi chiden, isala kaghali tsü kesazzi tsüdi pabhon den.

¹³ Anyi meghe-metsathu ma jjügi keben khiden, isala kejüphon nyithu tsü meten ncüthu yishü.

¹⁴ Kemetsathu na palakechü muya kemehai tsüdila muyaden, isala kejüphonthu na khathansha wi ajühkhi khe agükeccü na tetsakidha.

¹⁵ Keben-keyeng tsüna kebanthu khwe yaden; kahhatu tsüna ketha-uthu yasaden.

¹⁶ Kemehai kuli keten kutimen tsüna kahang, isala kesami tsü anyi ssi wa sami kayi thsüden.

¹⁷ Anyi ma satemeshon keten jüh kina ketenthu na hang yaden, isala sazzidha le kesa nkechüthu na kemessi wi bendha.

¹⁸ Nyu nankemeghü pi kuthi ketenwa na milikemesa nyi. Ajühjügha khi ketenwa na kejüphon.

¹⁹ No ajüh kejon khithu, no sami kayi metsi. Keujüla no metsa lethu no ccen ben den.

²⁰ Anyi kemehaiwa jüh na rükatssü kemetha ti; gheshighenawa chothu tsüna ma men nmi.

²¹ Anyi kemehaiwa jüh tsüna anyi kejon kekiyi sa cüden, isala kejüphon ghena no ketanla no pathiya mehai.

²² No sapi keban sacü keten tsüna Apvüwa kesawegü. Apinonketsü sa kekuli tsüna no sapi ben kayi yathsü nben.

²³ Kesazzi kekuli wi anonkwen keten tsüna kejüphon. Meghemetsa keten nyi na kemetsa wi anonyeng den.

²⁴ Ketsatanthu na mangwa yamvu khe muyaden, isala gheshighenathu na mathu messi ntsa ketenwa tsü muyaden.

²⁵ Caghamo gho nu gheshighenathu mo pi bvüden, isala atsentsa nyithu tsü keshüthangla apvü-nsala ben den.

²⁶ Khiela kenontssü nyi pi no ketsi nkina thsüla; ma kesse tssü pi n-yha wi kechi nyelela annikekhu na kijü ti nlisaghang thsüden.

²⁷ Apvüwa jüh nielo, isathu no kesie hang yaden. gheshighenathu na mathu tsü npi kecu wi shü waden.

²⁸ Kemehai nyithu kaghang tsüna ssi wa anonkeghe muya thsüden, isala gheshighena nyithu tsü ma atuwi ghangya kemehai mangla nmi.

²⁹ Apvüwa na atsentsa nyithu khwe, isala thowa na sazzi ten khe yasa cüden.

³⁰ Ketsatan nyi na keshüthangla apvü-nkesa muyaden, isala gheshighenathu ayyiwa wi hangya nben.

³¹ Ketsatanthu na kemetsawa khiden, isala nkemehai khi keten miliwa tsü khen cüden.

³² Ketsatan nyithu na keccaketssü jüh khichüden, isala gheshighenathu na keshüthangla nyu paketena jühkhi ben den.