KEMETSAJÜH 1 - Kemethajüh (N) (Re-editing) Bible (BSI)

Ma men keben Jühbvüthu

¹ David tsa Solomon, Israel Kadimiwa kemetsajüh.

² Hawi kemetsajühthu na no kiqa pi kemetsa nu kesansi kemehai chüya, khikechi jühthu jjügi kedhu meshenshiya kemehai ben.

³ Tsüthu tsüna no sansi pi meghe-metsa nu atsentsa, tsantan, nu hang meshon yathsü mehai.

⁴ Tsüthu tsüna nkesananthu sapi metsa yathsü nu kepvünyithu sapi pala kulishi yathsü mehai.

⁵ Kemetsajüh hathu hana palakechü pi kemetsathu wwacü nu lenketsütson pi lesükechüthu la chüya mehai,

⁶ isanu mathu kemetsajüh jjügi kuthi ketheng nu kemetsa nyithu chükivvü nu keü ketenthu tsü chüshiya mehai.

Kepvünyithu Kesansijüh

⁷ Palakechü benya le kesalina no atuwa sa Apvüwa kenyuwakü nbenthu yishü. Kejüphon nyithu na kemetsawa tsü kü nu palachüya mvu nten.

⁸ Itsa, nba nu njja na mangwa pi no kiza khe tsü nie kaketsü sayalo.

⁹ Alikejithsü nyelela ayan kemehai kesü na ntsi sapi mehaikayi cü keten tsüti manyi kesansijüh tsüna n-yencüki sapfü cüden.

¹⁰ Itsa, kesamithu na no mechu lela nkinala.

¹¹ Keujüla mathu na no wi khi, “Ghalo; ithu nyu bha nu pathina! Anongheya le kesalina, ithu kesazzi nkemithu pahan ponnan nalo!

¹² Ithu na mathu mukeya wi mathu mehaitsü hang benla ben, isala ithu na mathu miwi kuli cenya lethu mathu na shüaben!

¹³ Ithu keben kepapa kesa tsü muya nu nyu ji khukeya tsüpi ithu jjen pongya na.

¹⁴ Ghala ithu gweghe yalo, nu ithu mangwa ghanfüya khe pi ithu tsüdi gishüya na.”

¹⁵ Isala anyi tsüti kesathu tsü gweghe nwala, itsa. Mathu ghüyalo.

¹⁶ Mathu na pala nkemehai kekuli nhiecha ben den. Mathu na keshüthang nyu pathile kiden ben den.

¹⁷ No ghanya le keben awa tsüna no mu keben wi keghanthsü pi lla kesa tsüna kekiyi mangla nmi,

¹⁸ isala anyi tsüti kesathu tsüna mathu ketanla aca pi mathu die ben, mathu na aca ciwi shüaben.

¹⁹ Teng kedsa tsüna keshüthangla teng kedsawa kahangli yaden—— anyi thowa na yasayala wi hang ten khe hati saden.

Kemetsa Keci

²⁰ Kinalo! Kemetsawa na alentonti nu asenkesapen wina no ciben,

²¹ anyunuti khweti jenka nu khiewa anyithu na saghuben khe ciwi misikhhali ciben:

²² “Anyi kejüphonthu! Nthu khathu jenben mvu ben nu? Nthu khathu palakechü nankeqhe le ben nu? Nthu khiela chüya nten kwe?

²³ Hi no kha kechi wi kina yalo; hi kesansi kemehai pi no cü nu palakechü pi no ssinu gishüya den.

²⁴ Hi no ciki ben, gholo no ci, isala no nkina. No ijüh kina kaketsü nsa.

²⁵ No hi kesansijüh tsüdila nkhichi nu hi ya no satemeshon kesa tsü nsa thsü mvu.

²⁶ Tsalina no agükeccü wi du keya wi hi no nankeqhe den. Kemessi kegho wi hi no nankeqhe den——

²⁷ khathansha wi tsüna caghamo ti no wi gho, agükeccü meghü nkemehai sengho nu no kinaa nu ketizenkesa wi ben khe.

²⁸ Tsüsengwi no kemetsa tsü ciiden, isala hi luneng nben. No apen tsüdi wi hi bhaaden, isala no hi muya nben.

²⁹ No khiela palakechü sen nu nkuli nu keshüthangla Apvüwa jüh n-nie mvu.

³⁰ No khiela hi kesansijüh tsü meya mvu nyelela hi no satekemeshon wi tsü nleben nchitha.

³¹ Tsalina no mangwa kemu-u khe muya tendha, nu no kekuli ketanla no sapi nlidhamang thsüaden .

³² Nkesananthu na shüden kepaghenanye mathu na kemetsa tsü meya mvu. Kejüphonthu na mathu kemeshen kezeng ghena yasaden.

³³ Isala ijühkina ketenwa apvü-nsadha. Ma apvüsa nben, kemessi-u mangla nmi.”