KEKULI 27 - Kemethajüh (N) (Re-editing) Bible (BSI)

Paul na Rom wi Kewa

¹ Ikhang na Itali wi wale südhekeya wi mathu na Paul pi atssüzü kepathu gweghe pi Rom süpahizi “Kadimiwa Süpahizi” miwi kedi kesü Julia kwen wi chia.

² Ikhang na Adramuttium wina ahunjjen kesü na Asia yyi atssükedone wi tsü wale keben pang wala ciwi duya nu wa. Macedonia nyi kesü Thessalonika wina keghowa Aristarka la ikhang gweghe wa.

³ Dhitsüwa wi ikhang na wa Sidon cuya. Julia na Paul tizen, nu ma yala ma pvüshangthu hhainan wa thsü nu ma nsenthu keyishü muya thsüden.

⁴ Ikhang na ciwi na wa, isala ameghü sho ntsa kesalina ikhang na Cipra yimangkehi keshenten wina wa.

⁵ Ikhang na Silisia nu Pamfilia tssükedone tsü pvüdhi sen nu Lusia yyi Mura wi ghoya.

⁶ Ciwi kediwa na ahunjjen kesü Alexandria wina Itali wi wa keten muya nu ma ikhang pila ciwi duya thsüa.

⁷ Ikhang na ghanan keni kecheng tsü ashina wa nu agüccü ntsa wala Cnida nyuti tsü cuya. Ameghü na sho ntsa kesalina ikhang na alen ciwi wa meyala, tsalina Kreta yyi keshenten wina wala Salmone tsü pvüdhi wa.

⁸ Ikhang na agüccü ntsa nu ayyi tetsaki wa keten wi apen kesü Ahunjjen Penkemehai wi tsü ghoya, tsüna Lasea nyuti kete wi.

⁹ Ikhang ciwi matsü kesie ben wa kesalina khilitsü ahunjjen wi kewa kemessi bendha, kepaghenanye khili Ahhansha kesa Kho tsathangwa tsü la wadha. Tsalina Paul na ajüh ha pi mathu kiza,

¹⁰ “Ipvüshangthu, khili nten na ikhang atssü wi kewa kemessi bendha le, ciwi atsanqaithu nu ahunjjen la yasa ben, nu anyi la kahangli dediaben kesa hi chüben.”

¹¹ Isala kediwa na Paul jüh kekhi miwi la ahunjjen wi kediwa nu ahunjjen pvüwa manyi jüh kina wa.

¹² Apen tsüna pathsü wi ahunjjen kemnanpen ghena nmehai, tsalina anyi kejiwa na atssükedone ciwi na saya mehaithu wa Foenix cuya nu pathsü ciwi benle kesa tsü nen wa. Foenix tsüna Kreta yyi acüla niduwa nu agha niduwa kepeghe wiwa ahunjjen kemnanpen kesü.”

Atssükedone wi Caghamo kesa

¹³ Acülawa ameghü sho shagha nu anyithu na mathu meshen keben tsü saya nbendha le sa, tsalina mathu ahunjjen dajen tsü piekiya nu Kreta yyi katen tsü tetsaki sen nu wa.

¹⁴ Isala “Agha nishu meghü” tsüna khang ntsa ayyi wina sho dugho.

¹⁵ Tsüna gho ahunjjen mo kuliya nu ikhang na wa meyala kesalina ameghü na ikhang mo pie nu bvüa.

¹⁶ Ikhang wala ayyi-mangkehi kizzakeu Kauda cukeya wi agüccü ntsa nu ahunjjen wi ahun tsü khushiya.

¹⁷ Mathu na tsüthu zanshi pi ayyi wi chi nu ali pi ahunjjen bhen kevüliya. Mathu na Libia yyi wi ahachan miwi tsü wathu kemessi ghena ashina sa nu ameghü yala ahunjjen tsü mo pie nu wa thsü.

¹⁸ Caghamo sa ntsa kesalina dhitsüwa wi ahunjjen wi atsanqaithu pahan khushi pi khala,

¹⁹ nu pitsüwa wila mathu na ahunjjen wi atsanqai pahan khushia.

²⁰ Ghanan kejonla ikhang na aghani nu ghotsithu mangla nmula caghamo na ikhang mo pie wa kesalina asakhen witsü ikhang na hangya benle kesa n-nondila.

²¹ Anyithu na ghanan kejonla ndsajjüla kesa wi Paul na shagha hati khi, “Ipvüshangthu nthu na ijüh kina nu Kreta wi ben wa lethu, pala hathu ha yasa nu dedi nkesa le!

²² Isala khili nthu leben züyalo nthu kizaben! Ahunjjen ketan yasa keben khe nthu thola shü nbenle!

²³ Kepaghenanye khija iPvüwa nu hi ma kinyi ketenwa Anyiza nyilo kesü hi wi gho,

²⁴ nu khi, ‘Paul, nmessi lalo! No wala Rom Kadimiwa tuwi n-nganthu yishü, nu Anyiza na ma kemehai wina no gweghe wa ketenthu tsüdi kahangli hangsha cüben.’

²⁵ Tsalina ipvüshangthu, leben züyalo! Kepaghenanye hi kekiza tsüti kuliben kesa hi Anyiza wi kenondi ben.

²⁶ Isala ikhang pvü wa ayyi-mangkehi pahan wi chiaben.”

²⁷ Tsüna caghamo na ikhang mo pie nu Mediterranean wi keten ghaja tagha mejü sadha. Aghaja non wi ahunjjen keculathu na ikhang ayyi tetsaki wa tendha le meshen.

²⁸ Tsalina mathu na pala kesü pi atssü kedhu kedegü nan tsüna meter jügha-u sabenla, nu keu wha nu kedegü nan meter changha-u sabenla.

²⁹ Tsalina ikhang hunjjen na alon miwi wa nashe kesa kemessi ghena ahunjjen dajen kemisü lisha pi du thsüa nu wan atsathang walo kheshülan sa.

³⁰ Tsaseng wi ahunjjen keculathu na bvüale kiden; mathu na ahun khushi pi atssü wi chiya nu wala atuwa ahunjjen dajen lisha pi du thsü keten ghe sa.

³¹ Isala Paul na süpahizi kediwa nu süpahithu wi khi, “Keculathu na ahunjjen wi nbenla lethu, nthu hangya nben le!”

³² Tsalina süpahithu na ali pi ahun hu ketheng tsü padhi pi atssü wi chia.

³³ Atsathang wa keten pang wi Paul na mathu tsüdila pala pahan dsayalo kiza: “Ikhang nansü ha ghanan tagha mejü hie wadha, nu tsüthu mangla npi dsajjü.

³⁴ Tsalina nthu züyale kesalina dsajjü yalo. Nthu lissen kesüla dedi nben le.”

³⁵ Paul na ha kekhi seng wi mathu tsüdi tuwi na amesa khu pi pakhhi nu Anyiza seng, nu dsa wa.

³⁶ Mathu tsüdila leben ccaya nu dsajjüya.

³⁷ Ciwi ikhang tsüdi saghula anyi meza keni nu achentagü nu tugho na ahunjjen wi tsü ben.

³⁸ Tsüdila dsajjü pi anonkwenkeya seng wi mathu na ahunjjen sate mbhi thsüle kesalina awhengsu tsü tsüdi pi atssü wi khala chia.

Ahunjjen Keyasa

³⁹ Atsathang keshagha seng wi keculathu na ayyi nmu, isala mathu aghüsa wi kenganpen kesü muya nu ahunjjen sen wa ciwi ngan thsüale sa.

⁴⁰ Tsalina mathu ahunjjen dajen tsü lisha pi atssü non wi du thsüa, tsü gweghe ali pi ahunjjen dajen bhen ketheng tsü la lisha chia. Tsaseng wi mathu atu wi athsü tsü zankichi nu ameghü yala mo pie wa aghüsa wi ngan thsüale sa.

⁴¹ Isala ahunjjen na wala atssü non wi ahachan pvükha sa keben witsü shonten wa, ahunjjen atuwa shonten nu kuli meyala, nu asengwa na atssü kekhang na gho yasa.

⁴² Süpahithu na atssüzüthu tsüdila pathi nu thola atssüghe sa sen nu nshhu thsüle kesa kiden.

⁴³ Isala süpahi kediwa na Paul hangshaya mvu kesalina ma mathu ya tsüti nsa thsüla. Ma anyi thothu na atssüghe saya mehai khe penca wa atssüghe sa sen nu shhulo,

⁴⁴ nu kepathu na ahunjjen kepakhhithu tsü ghansen nu mathu nie shhulo kesa ahza khu chia. Hati nu ikhang tsüdila aghüsa wi shhuya.