KEKULI 26 - Kemethajüh (N) (Re-editing) Bible (BSI)

Paul na Ma Ketanla Agrippa Tuwi Ma Sheikepi

¹ Agrippa na Paul kiza, “No ketanla no ghena khiya kemehai khuchidha.” Paul na ma kwen zanki nu hati ma ketanla ma ghena khi:

² “Kadimiwa Agrippa! Hi kemeshen hi nansü icenpvü mehai ntsawa nu ghola ntuwi Judah nyithu na hi keshun jüh tsüna atsentsa nye le kesa hi ketanla isheikhi le ghoben.

³ Kepaghenanye no Judah nyithu yen tsüdila chü keben ghena no kethankehi sen nu ijüh kina cülo khie ben.

⁴ “Judah nyi tsüdila hi kepvüza tsü wi kahang cüki tsü chüben. Mathu na hi aghatsan na inyithu jawi nu Jerusalem wi hang ghole kesa chüben.

⁵ Hi keccüna sen pi khang ntsa kesa khang jawi Farisi kesü sa hang ghole kesa la mathu aghatsan na chüben, nu mathu na khi mvu lethu khiya mehai.

⁶ Nu hi khili Anyiza na ajühkhuchi pi ithu bamyithu kecü tsü kenondi ghena he wi ngan nu ijüh kaghakhi ben,

⁷ ajüh khukechiwa tsüna ithu nyi amizza tagha keni tsüdila muya ben le nondi nu mathu aghanan le aghaja lela Anyiza kinyile. Njenkebenwa, Kadimi! Hi ha kenondi ghena Judah nyithu na hi kimenni ben le!

⁸ Mangkesa na nthu Judah nyithu Anyiza na keshü sa pi hangnengya thsüa benle kesa nondi meyala ben nu?

⁹ “Hi kheni hi kekuli tsüdila Nazareth nyiwa Jisu nyan keshunwa tsü sale meshen.

¹⁰ Hi Jerusalem wi tsüti sale. Hi keqhaikedi ntsathu wi kekhang khieya nu wa Anyiza nyi kejon pi atssüzü kesa thsü ketan nyela mathu pi shü thsüa le kesa wi lela hi la hi kenen le isa khichi.

¹¹ Matsü kejon wila hi wa Sinagogthu tsüdi wi mathu meten- mesha nu mathu kenondiwa tsü nkhi thsüle sa. Hi leben minu ntsanu mathu keshun ghena wa anyunuti kepa wi lela mathu meten-mesha.

Paul na Ma Kahang Kemilikesa Cüki Kekhi

¹² “Ha jjügi ghena hi keqhaikedi ntsathu wi kekhang khieya nu Damaska wi wa.

¹³ Njenkebenwa, Kadimi! Alenca wi wa keten ghanan lapvü wi hi tang wi kewegü kesü aghani mi wila wegüki kesa mu, tsüna gho hi gweghe wa ketenthu wegü kevüliya.

¹⁴ Ciwi ikhang tsüdila ayyi wi khulidua, nu hi ahhai kesü Ibri jüh wina hati kekhi zaya, ‘Saul, Saul, no mangkesa na hi meten-mesha ten nu? Amesü süpon na ma pvüwa khhatssü tekaki keya ti no akusü tekaki nu no ketanla no mesa-mena ben.’

¹⁵ Hi keü, ‘Apvüwa, no thowa nu?’ Apvüwa na hi kiza, ‘Hi Jisu, no ma meten-mesha ketenwa tsü le!

¹⁶ Isala no shagha nu ngan yalo. No imaghawa saya thsüle kesalina hi no wi gho. Nu no nansü he wi mangwa muya nu hi ashiseng wi mangwa pi no ccücaten khe no tsü khi pi nyu kepa wi kizaden.

¹⁷ Hi Israel nyithu nu Judah nyi nkenyethu kwen wina no hangsha yaden, nu no kesun pi mathu wi chiden.

¹⁸ No mathu nyon sha chiden nu mathu kejang wina kewegü wi ghoya, nu satan kekhang kekhu wina Anyiza wi gho yaden, isanu mathu na kesami keteshi tsü muya nu Anyiza na kessikeyathu jawi mathu pen muya den.’

Paul na Ma Kekuli Cüki Kekhi

¹⁹ “Tsalina Kadimiwa Agrippa, hi tang wi kemanthi kemu tsü nkinala nsale.

²⁰ Isala hi atuwa sa Damaska nu Jerusalem nu Israel diyyi maben nu Judah nyi nkenyethu jawi wa, nu mathu kesami wina leben khapegheya nu Anyiza wi gho, nu mathu leben khapeghe keya kekuli pi nyu ccücalo kesa pi sansi.

²¹ Ha jjügi ghena Judah nyithu na Kekinyijjen wi hi ghanya nu hi pathiale sa.

²² Isala nansü kecu Anyiza na hi kiqa nu hi he wi ngan nu kizzawa le kediwa tuwi lela tsüdi wi atsentsawa pi khiben. Hi khi kebenwa ha atusenjüh-kechüthu nu Mosa na khi ketheng tsü makesü,

²³ tsüna Khrista na ketizen nsathu yishü nu ma keshü wina hangneng-keshagha atuwa sa nu hangshakeya kewegüwa pi Judah nyithu nu Judah nyi nkenyethu tsüdi wi kiza.”

²⁴ Paul na hati nu ma ketanla ma sheipi keben wi Festa na jisha nu ma wi khi, “Paul, no deja ben! No palakechü tsüna no sa pi deja thsüdha le!”

²⁵ Paul na luneng, “Njenkebenwa Festa, hi deja nben le, isala hi metsashhu nu atsentsa jüh khiben le!

²⁶ Kadimi Agrippa, no hathu ha chü keben ghena hi kempvüza sa nu no wi ajüh ha khiben. No tsüthu tsüdila mudha le kesa hi chütiben, kepaghenanye tsüna kekuthi nu ccügwen-ccüna wi nsale.

²⁷ Kadimi Agrippa, no atusenjüh- chüthu jüh tsü nondi ben ma? No tsü nondi ben kesa hi chüben.

²⁸ Agrippa na Paul wi kiza, “No matsü keujü wina hi ya Khristanyi sa thsüale meshen ben kwe?”

²⁹ Paul na luneng, “Matsü kesie kemelu lela hi Anyiza wi kekhiewa na no ketan nyela nansü he wi ijüh kina kebenthu tsüdila hi ti saya thsülo, isala nthu yala hi ti atssüzü nsa thsü mvu le.”

³⁰ Tsaseng wi Kadimi, ahng, Bernis, nu kepathu tsüdila ngan shagha,

³¹ nu keteshili seng wi mathu na khokho wi khi, “Anyi hawa ha pi keshüthsü-u nyelela pi atssüzü kesa thsü-u mangla kuli ntheng.”

³² Nu Agrippa na Festa wi kiza, “Anyi hawa ha ma Rom Kadimiwa tuwi wale nkhi lethu, ma teshi cüa kesa le.”