KEKULI 20 - Kemethajüh (N) (Re-editing) Bible (BSI)

Macedonia nu Akhaya wi Kewa

¹ Kekivvü tsü kecen seng wi Paul na kenondithu cighu nu saketezü jüh khi pi kiza nu mathu kemehai sa benlo kiza nu Macedonia wi wa.

² Ma ayyi tsüthu pvüdhi wa ketsijüh khi pi anyithu satezü, nu ma Akhaya wi ghoya.

³ Ma asha kecheng ciwi ben. Nu ma Siriya wi wale kiden keben wi Judah nyithu na ma miwi acho sa keben chüya nu ma Macedonia yyi pvüdhi sen nu wha nengle südheya.

⁴ Berea wina kegho Sopater tsa Purhu, Thessalonika wina kegho Aristarka nu Sekunda manyi, Derbe wina kegho Gaya, Asia yyi wina kegho Tukhika nu Trofima manyi, nu Timothi hathu na ma ssi wa.

⁵ Mathu na atu wina wala Troa wi ikhang hie ben.

⁶ Azimi nkechi Mesa pi Kemishu Kho seng wi ikhang na Filippi wina ahunjjen wi wa ghanan manga seng wi Troa wi mathu cuya nu ikhang na ciwi ghanan tagü ben.

Paul na Asakhenwa Troa Kehhainan

⁷ Tugho ghanan aghaja wi ikhang na gweghe dsajjü le saghuya. Paul na ma dhitsüwa wi bvüa keten ghena ma ajüh khi pi anyithu kiza wala ghaja cancüla wi cu.

⁸ Ikhang na keccünengli keben pen ajjenshha tangwa wi ahula kejon na qheben.

⁹ Ciwi kepvünyi kesü ma nyan Eutuka kesa na ajjenkubhi kete wi donkiben, Paul na ajüh kesie khi wa kesalina ma jen mvu pfüpfü wa nu jenchi ntsa keben wi ajjenshha kechengwa wina ayyi wi qanca dua. Mathu na wa ma pieki wa nan shü benla.

¹⁰ Isala Paul na cüla ma khün pieya nu khi, “Nthu hatha n-nala, ma khilila hangben.”

¹¹ Tsaseng wi ma ajjenshha tangwa wi kila amesa pakhhi dsaya, nu mathu wi ajüh khineng wala ghanenwa aghani keshhugho cu, nu bvüa.

¹² Mathu na pvüzawa tsü kahang ssi whala ajjen wi leben cca ben wa.

Troa wina Mileta wi kewa

¹³ Ikhang na atuwa sala wa Asso wi Paul ssinu ahunjjen wina wale sa. Ma ikhang na tsüti salo kiza, kepaghenanye ma ayyi wi alentsen sen nu ciwi waden.

¹⁴ Ma Asso wi ikhang metuya nu ikhang ma ssinu ahunjjen wina Mitulen wi wa.

¹⁵ Ciwi na dhitsüwa ikhang ahunjjen wina Khio wi ghoya. Dhitsüwa wi Samo cuya, nu kecheng ghanan wi ikhang wala Mileta cuya.

¹⁶ Paul na Efesa pvüdhi wale südheya kesalina Asia wi matsü ndedi mvula sa, kepaghenanye ma saya kemehai chu Pentekost tsathang wi Jerusalem wi benle kesalina kaghaji ntsa saben.

Paul na Efesa Keshenpfüthu wi Ajüh Sakhen Kekhi

¹⁷ Paul na Mileta wina Efesa wi keshenpfüthu na ghola ma metulo kesa ketsijüh kesunchi.

¹⁸ Mathu na gho cukeya wi Paul na mathu kiza, “Hi ghola Asia yyi cuya tegü wina gho nansü kecu khati nu nthu ssiben khe nthu na chüben.

¹⁹ Judah nyithu cho ghena matsü nkemehai hi wi kegho wi lela hi Apvüwa magha nyi sala kimenni nu ihacücala hi kekuli sale!

²⁰ Hi nthu ghena kemehaiwa tsü mangla nkekhenengla pi anyithu jawi nu ajjen wi la nthu sansi.

²¹ Hi leben khapegheya nu Anyiza wi ghola Jisu Khrista nondiyalo kesa pi Judah nyithu nu Grik nyithu la kizadha.

²² Hi khili Kemetha Ghamu jühkina nu Jerusalem wi wale bendha, isala hi ciwi khati saben khe nchü.

²³ Anyunuti tsüdi wi lela Kemetha Ghamu na atssüzü kesa nu ketizen kesa na hi hie benle kesa kitsan chiden.

²⁴ Isala hi Anyiza nanketizen wina Jühtheü Kemehaiwa ha pi khilo nu Apvüwa kekuli salo pi hi kecü tsü sacenle kesalina hi hi kahang ha pi mangla nkenye saden.

²⁵ “Ae, hi nthu tsüdi jawi wa nu Anyiza Kadiyyi cüki pi nthu sansi cüdha. Nu khili nten na nthu hi nmu nengdha kesa chüben.

²⁶ Tsalina hi nansü ha pi nthu kiza ntsa chiben: keujüla nthu pahan na bhatagha lela ikuti nmidha.

²⁷ Kepaghenanye hi mangla nkekhenengla Anyiza kemeshen tsüdi pi nthu kiza chidha.

²⁸ Tsalina nthu ketanla nthu ghena nu Kemetha Ghamu na nthu pi hie thsü ketheng nenithu tsü nonccayalo. Anyiza kemehu, ma ma Tsawa pi ahhansha kesa wina sa kethengwa tsü hie kemehai saya.

²⁹ Kepaghenanye hi kebvü seng wi adenni ma yen nkemehai ntsa na nthu jawi gho nu akhang hawa ha yasa cüben kesa hi chüben.

³⁰ Nu nthu jawi anyi pahan shagha milikemesa khi pi kenondithu mechu sen nu mathu nie wa thsüaben kesa hi chüben.

³¹ Tsalina hi amapi kecheng ghaja ghanan n-nganla ihacüca nu nthu sansi kesa tsü meshenyalo.

³² “Nu hi khili nthu pila Anyiza kwen wi nu ma nanketizen wi tsü chidha, tsüna nthu sa pi züya thsü mehai nu kemihhi pi ma nyithu ghena ketheng tsü pi nthu cüben.

³³ Hi tho ji la rükatssü, suna, athsümeni tsüthu ntepagha.

³⁴ Nthu na chüben, hi ikwen pi kuli nu pi hi keniethu nu hi la nsenthu keyishü tsüdila saya.

³⁵ Hi nthu ya kekuli tsüdi wi apiketsü sa nu mangla nkenyethu kiqaya thsüle nu Apvüwa Jisu na kekhi jüh, ‘Nyu wi mukeyawa nyela pi nyu kecüwa na kemihhi ntsa,’ kesa ha meshenyalo kesalina ha pi nthu ccücaben.”

³⁶ Paul na ajüh tsü khidhi meyi mathu ssinu akhhutsüdu mathu tsüdi ghena kekhie sa.

³⁷ Isanu mathu tsüdi wa ma khüntagüya nu ma kimang nu qai.

³⁸ Mathu tsüdila ma mathu wi ma nmu nendha le kekhi ghena ahathana ntsa sa. Isanu mathu na Paul ssisen wala ahunjjen wi du thsüa.