KEKULI 19 - Kemethajüh (N) (Re-editing) Bible (BSI)

Paul na Efesa wi Keben

¹ Apollo na Korinth wi keben wi Paul na aghawa na sa sen nu Efesa wi gho. Ciwi ma sansikeyathu pahan muya.

² Isanu ma mathu wi, “Nthu na kenondi nyi sa keya wi Kemetha Ghamu muyala nu?” Mathu luneng, “Ikhang ciwi Kemetha Ghamu ben le kesa la za meya!”

³ Paul na mathu wi keü, “Isathu, nthu na mangwa baptism saya nu?” Mathu luneng, “Johan baptism le!”

⁴ Paul na mathu wi khi, “Johan baptism tsüna mathu kesami wina leben khapeghe yalo; nu ma Israel nyi meshu kesü ma seng wi gho ketenwa Jisu tsü nondi yalo kesa pi kizalo kesa ghena.”

⁵ Mathu na tsü zaya nu Apvüwa Jisu nyan wina baptaiz saya.

⁶ Isanu Paul na ma kwen chang pi mathu miwi chi, nu Kemetha Ghamu na mathu miwi gho; mathu na ajüh ketheü khi, nu Anyiza ketsijüh la khi.

⁷ Mathu na meshu taghakeni.

⁸ Paul na Sinagog wi wa nu asha kecheng-u kempvüza ntsa sa nu Anyiza Kadiyyi cüki khi pi anyithu zanyale kesalina mathu ssinu ajüh keccücanli.

⁹ Isala mathu pahan na leben-dhu nu n-nondila anyi tsüdi tuwi Apvüwa Lenwa tsü khisa. Tsalina Paul na mathu teshi nu sansikeyathu ssi wa Turannu kesansipen wina atsathangla mathu sansi nu ajüh keccünengli.

¹⁰ Amapi keni-u tsüti sa wa kesalina Asia yyi wi kahang Judah nyithu nu Grik nyithu la tsüdi Apvüwa jüh zaya.

Skeva Tsathu

¹¹ Anyiza na Paul wina kheni mu nketen azensuthu saya thsüben.

¹² Anyithu na ma kwen kenyenthsü nu asun kekijithsü lela sen wa kesakinaathu, khuma-khujü kepvüthu sa pi mehai nu nkemehai ghamuthu la jügüshiya.

¹³ Judah nyi pahan kijünyi wa ketenthu na Apvüwa Jisu nyan sen nu nkemehai ghamu na anyithu miwi kebenthu wi hati khi nu jügü, “Hi Paul na pi nyu sansi ketenwa Jisu nyan wina ahza pi no cüben.”

¹⁴ Judah nyi Keqhaikedi ntsawa Skeva tsathu cünyunyi tagü na hati saben.

¹⁵ Isala nkemehai ghamuthu na mathu wi khi, “Hi Jisu chüben, Paul cüki la chüben, isala nthu na thowa nu?”

¹⁶ Anyi nkemehai ghamu na ma miwi kebenwa tsüna shagha khang ntsa sa nu mathu miwi khangya. Mathu tsüdila mesa-mena ntsa sa, nu ma jjen ciwi na mathu thsümeni la mezüqhe theng nu bvüa.

¹⁷ Efesa wi Judah nyithu nu Judah nyi nkenyethu la tsü cüki zaya nu mathu tsüdi messi ntsa sa nu Apvüwa Jisu nyan tsü kinyikü ntsa sa.

¹⁸ Kenondithu kejonla ghola mathu kekuli nkemehai nu kesami khishi.

¹⁹ Kedemathu kejonla mathu lesüshenthu saghu sengho anyi tsüdi tuwi na mecang. Mathu lesüshenthu tsü men si wa nan rükatssü hazar deni-u sabenla.

²⁰ Tsüti nu Apvüwa jüh na khang pfüpfü nu vvü zighe bvüa.

Efesa wi Kekivvü

²¹ Pala tsüthu kuli cenkeya seng wi Paul na ma leben wi ma Macedonia nu Akhaya yyi pvüdhi sen nu Jerusalem wi wale meshenya nu khi, “Hi ciwi kewa seng wi wala Rom wi nwathu yishüben.”

²² Tsalina ma ma kiqa keten meshu keni Timothi nu Erasta manyi kesun pi Macedonia wi chi nu ma ghanan keu Asia yyi wi ben wa.

²³ Tsü tsüwi Apvüwa Lenwa ghena Efesa wi kivvü ntsa sa shagha .

²⁴ Anyi kesü ma nyan Demetria kesa rükatssü kicü nyi tsüna acenpvü nzawa Artemi kekinyijjen sa nu ma kekuli kesathu kejonla kiyi ntsa sayaden.

²⁵ Ma ma pvüshangthu nu kepa wila mathu kekuli ti sa keten nyi cighu chi nu khi, “Ae, anyithu, nthu la chüben, ikhang kekuli ha ghena benyaden.

²⁶ Nu nthu la chü nu muben, Efesa wi ketan nyela Asia yyi tsüdi wi Paul na anyi kwen pi kezhü cenpvüthu hana acenpvü nyele kesa khi pi anyi kejon ssi deja sen nu bvüdha.

²⁷ Nyu yala ikhang kwen pi kezhüthu ha khisa thsüle kesa ketan nyela Asia nu ayyi tsüdi wi kinyi keten cenpvü nzawa Artemi kediwa nyan bhatagha thsü nu ma kekinyijjen la pi mangla nkenye sa thsüya kemehai kemessi na bendha le!”

²⁸ Anyithu na ajüh tsü zaya meyi mathu lebentsu ntsa sa nu jisha, “Efesa wi Artemi ha kediwa le!”

²⁹ Anyunutiwa maben la kivvü ntsa sa shagha, nu anyithu na wala Macedonia nyi meshu keni na Paul nie keten Gaya nu Aristarka manyi zan sen nu ajjen wi wa.

³⁰ Paul ma la anyithu jawi wa mvu, isala kenondithu na ma khen.

³¹ Asia wi kedithu ma pvüshangthu na anyi pahan kesun pi ma wi chi nu ma ciwi nwa lalo kiza thsü.

³² Anyithu na ciwi nponna ntsa sa nu pahan na ajüh kesü khi, nu kepathu na kepa wi khi nu jishaben, anyi kejiwa na mathu mangwa jjügi ghena ciwi saghu ben khe nchü.

³³ Anyi pahan na Alexander na akhhi ha pvü benle khi, kepaghenanye Judah nyithu na ma pi anyithu tuwi shagha thsü. Alexander na shagha ma kwen kejen pi mathu ccen benlo khi, nu ma asheikepi jüh khile sa.

³⁴ Isala mathu na ma la Judah nyi le kesa chükeya wi mathu tsüdila jisha nu amighe kekihhe kecheng-u tsü, “Efesa wi Artemi hana kediwa le!” isa khi.

³⁵ Asakhen wi anyunutiwa wi kedi nyi kesü hati khi nu anyithu tsü khashaya, “Ae, Efesa nyithu, anyi thowa na Efesa nyunutiwa hana Artemi kediwa kekinyijjen, nu alon kemetha tang wi na kedughowa tsü kenonccawa le kesa nkechü nyi ben nu?

³⁶ Thola hathu ha nyele khiya nben. Tsalina nthu thola kethukehi nsala nu ccen benlo.

³⁷ Ha manyi na ikhang kekinyijjen tsü npasa nyelela ikhang cenpvü tsü nkhisa lela nthu na manyi ssigho theng.

³⁸ Tsalina keujüla Demetria nu ma kekuli kesathu na anyi pahan miwi kekivvü ben lethu, ithu na ajüh kekaghakhipen nu ajüh kekaghakhithu la ben, mathu yala ciwi kaghakhiya thsülo.

³⁹ Isala keujüla nthu na pala pahan khi mvuben lethu, tsüna anyunuti ha wi kahangthu keccünengli wina cenya ben.

⁴⁰ Kepaghenanye ikhang hati kekivvü hana kemessi benle, nu ikhang na ha ghena khi kemehai mangla khikeya nmi.”

⁴¹ Ma ajüh tsü kekhi seng wi anyithu yala bvü thsüa.