KEKULI 18 - Kemethajüh (N) (Re-editing) Bible (BSI)

Korinth wi Keben

¹ Tsaseng wi Paul na Athen wina Korinth wi ghoya.

² Ciwi ma Judah nyi kesü ma nyan Aquila kesa Pontu wi kahang nyi muya, Klaudia Kadimiwa na Judah nyi tsüdila Rom wina bvülo kesa ahza khuchi kesalina anyi tsüwa na ma wubvü Priskilla ssinu tsütu wi Itali wina gho keben Paul na ma wubanyi jjen wi wa,

³ mathu gweghe ben nu kekuli sa, kepaghenanye Paul la manyi ti anithsüjjen kesa ghena anmen mellidsa keten nyi kesü.

⁴ Ciwi ma Sabbath tsathang kaghapenla Sinagog wi wa Judah nyi nu Grik nyi la zanyale kesalina mathu ssinu ajüh keccücanli sa.

⁵ Sila nu Timothi manyi na Macedonia wina gho kecu seng wi Paul na apitsü ntsa sa nu matsü tsüdi wila Judah nyithu wi Jisu tsüna Messiya le kesa pi sansi.

⁶ Mathu na ma shun nu ma nkemehai kekhi wi Paul na ma thsümeni ketheng nu mathu wi khi, “Keujüla nthu na dedi lethu, nthu ketanla nthu meshensa lo! Ikuti mangla nmidha, hi khili nten na Judah nyi nkenyethu wi wa tendha!”

⁷ Isanu ma mathu jawi na Judah nyi nkenye Anyiza kinyi ketenwa Tita Justa kesa jjen wi bvüa, ma jjen na Sinagog kete.

⁸ Sinagog wi alikesa nyi kesü Krispa na ma theghi tsüdi ssinu Anyiza nondiya; nu Korinth wi anyi kepa wi kejonla Paul na ketsijüh kekhi tsü zaya nu nondiya, nu baptaiz saya.

⁹ Ghaja kesü wi Paul na kemanthi kesü mu nu ciwi Apvüwa na ma wi kiza, “No nmessi lalo, nteshila nu ketsijüh khi benlo,

¹⁰ kepaghenanye hi no ssiden. thola no patenaya nben, kepaghenanye anyunuti ha wi inyithu kejonla ben.”

¹¹ Tsalina Paul na amapi kesü nu asha tugho ciwi ben nu Anyiza jüh khi pi anyithu sansi.

¹² Isala Gallio na Akhaya yyi wi Rom ahng saya meyi Judah nyithu na saghu wa Paul ghanya nu ma ssinu ajüh kekaghatenpen wi wa.

¹³ Mathu na khi, “Anyi hawa ha ithu yen nkenye wina anyithu sansi pi Anyiza kinyi thsüle saden.”

¹⁴ Paul na ajüh khile keben wi Gallio na Judah nyithu wi kiza, “Keujüla nkemehai kesazzi nyelela anyi kepathi jjügi lethu, hi lebensie nu no Judah nyithu jüh kina kesa le!

¹⁵ Isala ajüh, anyan, nu nthu yenwa ghena keccücanli ghena nthu ketanla nthu jawi südhe yalo. Hi hathu ha kaghakhi nben le!”

¹⁶ Isanu ma ajüh kekaghatenpen wina mathu jügüshia.

¹⁷ Mathu na tsüdila wala Sinagog wi kediwa Sosthenge ghanya nu ajüh kekaghatenpen tuwi na ma kiccü. Isala Gallio na tsü ghena mangla nkhi.

Antiok wi Kegho neng

¹⁸ Paul na ghanan kejonla Korinth wi kenondithu gweghe ben nu kheneng ciwi Priskilla nu Aquila manyi ssinu atssü wina Siriya wi wha neng. Nu ma kishen ketheng ghena Kenkrea wi ma li ca.

¹⁹ Mathu na Efesa wi ghoya meyi Paul na manyi teshi theng nu Sinagog wi dula Judah nyithu ssinu ajüh keccünengli.

²⁰ Ciwi Paul na mathu gweghe matsü kesie-u benlo khie, isala ma tsüti nsa mvula.

²¹ Isala Paul na mathu teshi keten wi hati khi, “Anyiza kemeshen lethu, hi kheneng nthu wi ghoben.” Isanu ahunjjen wi duya nu Efesa wina bvüa.

²² Paul na wa Kaesarea cuya, ma Jerusalem wi wala shalom pi kemehu cü, nu tsaseng wi Antiok wi wa.

²³ Ma ghanan keu ciwi ben theng nu tsaseng wi Galatia nu Frugia yyi pvüdhi wala kenondithu tsüdi satezü.

Apollo na Efesa nu Korinth wi Keben

²⁴ Judah nyi kesü Alexandria wi kahang meshu kesü ma nyan Apollo kesa na Efesa wi gho. Ma ajühkhi kemehai nyi kesü nu Ntsawajüh tsü mehaitsü chüben.

²⁵ Apvüwa Len wiwa na mehaitsü ma sansi theng. Nu ma apitsü ntsa sa nu Jisu cüki khiti pi nyu sansiden. Isala ma Johan baptism ketan chüben.

²⁶ Ma Sinagog wi kempvüza ntsa sa nu nyu sansiden, isala Priskilla nu Aquila manyi na ma jüh zaya nu ma ssi wa Anyiza jüh khiti pi ma kiza.

²⁷ Apollo na Akhaya yyi wi wa mvu kesalina Efesa wi kenondithu na ma kechü-kenong nu Akhaya wi sansikeyathu na ma ssiyalo kesa lesüzhü pi cüchi.

²⁸ Kepaghenanye Jisu tsüna Messiya le kesa Ntsawajüh wina ma jüh khang ntsawa sa nu khiti pi nyu jawi Judah nyithu jüh chaya.