KEKULI 11 - Kemethajüh (N) (Re-editing) Bible (BSI)

Pitor na Jerusalem Kemehu wi tsü Cüki Kekhi

¹ Judea wi apostelthu nu kenondithu tsüdila Judah nyi nkenyethu la Anyiza jüh yayadha le kesa zaya.

² Pitor na Jerusalem wi kewa wi Judah nyi nkenyethu na ahyuhanlo khi ketenthu na ma ssinu kicennali.

³ Mathu kekhi na, “No ahyu nkahan Judah nyi nkenyethu jjen wi kijünyi wa nu mathu gweghe la dsajjü le khiben man!”

⁴ Tsalina khati sa khe Pitor na aghatsan na mehaitsü maben khi pi mathu kiza:

⁵ “Hi Joppa nyunutiwa wi kekhie sa keben wi kemanthi kesü mu. Hi tang wi na palakhang ti kesa keti kesü accügwen mejü keben pi ayyi wi dugho thsü, nu tsüna gho ikete wi ben wa.

⁶ Hi wala tsü tetsaki nu ma non wi ghangchi nan asahangthu nu aghangsathu, ayyi wi ghapvü ketenthu, nu awathu tsüdi keben muya.

⁷ Tsaseng wi ahhai kesü hati hi kiza, ‘Pitor, shagha hathu ha pathi nu dsalo!’

⁸ Isala hi khi, ‘Nmale, Apvüwa! Hi atsse kenenkagha nu nkemetha tsü pi ipang wi npi chi.’

⁹ Tsaseng wi tang wi na ahhai tsüna hi luneng, ‘Katsüha lela Anyiza na satemetha kesa tsü nmetha le nmeshen lalo.’

¹⁰ Hana kecheng tughu hati sa, nu asakhen wi tsüna tang wi zanki nengya.

¹¹ Tsü tsüwi Kaesarea wina kesun kechi meshu kecheng na gho hi keben jjen tsü cuya.

¹² Aghamu na hi mathu gweghe wa nkesütu lalo hi kiza. Joppa wi kenondithu ma tugho ha la hi gweghe Kaesarea wi wa, nu ikhang tsüdila Kornelia jjen wi wa.

¹³ Ciwi ma tangnyilo kesü na gho ma jjen wi ngan nu hati ma kizale kesa khi pi ikhang wi kiza: ‘Anyi pahan kesun pi Joppa wi meshu kesü ma nyan Simon Pitor kesa tsü ci wa thsülo.

¹⁴ Ma ajühkhi pi no nu ntheghithu kizathu, ciwi nthu na hangsha yaben.’

¹⁵ Isanu hi ajühkhi keshagha wi Kemetha Ghamu na kheni ithu miwi kegho ti mathu miwi la gho le.

¹⁶ Tsaseng wi hi Apvüwa na hati khi ketheng tsü meshenya: ‘Johan na atssü pi nyu baptaiz sa, isala Kemetha Ghamu pi nthu baptaiz sa cüben.’

¹⁷ Hawa ha Anyiza na ithu Apvüwa Jisu Khrista nondi keya wi Kemetha Ghamu pi ithu kecü ti pi Judah nyi nkenyethu la cüdha kesa muti yadha; hi thowa le nu Anyiza khenle saya mehai nu!”

¹⁸ Mathu na ha zakeya seng wi kicennali nsala nu Anyiza seng nu khi, “Anyiza na Judah nyi nkenyethu la leben khapeghe nu hangya thsüle kesalina matsü kemehai pi cüdha.”

Antiok wi Kemehu

¹⁹ Kemeten-kemesha wi Stefan kepathi tsü ghena kenondithu pahan na bvü zighe sen wa Fonisia, Cipra, nu Antiok kecu wi ketsijüh pi Judah nyithu ketan kiza.

²⁰ Isala kenondithu pahan na Cipra nu Ciren wina gho Antiok wi wa ketsijüh pi Judah nyi nkenyethu kiza nu Apvüwa Jisu cüki Jühtheü Kemehaiwa la pi mathu sansi.

²¹ Apvüwa kekhang na mathu ssiden, nu anyi kejonla nondiya nu Apvüwa wi kheneng gho.

²² Mathu cüki na wala Jerusalem wi kemehu cua, tsalina mathu na Barnaba kesun pi Antiok wi chi.

²³ Ma wa cukeya wi Anyiza na khatila sawegü pi anyithu cü khe muya, ma anonghe ntsa sa nu mathu leben tsüdi pi Apvüwa wi bentenlo kesa mathu kechü-kenong chicü.

²⁴ Barnaba na anyi kemehai kesü, Kemetha Ghamu nu kenondi pi ma pong pvüden, nu anyi kejon ssinu Apvüwa wi ghoya.

²⁵ Tsaseng wi Barnaba na Tarsa wi Saul bha wa.

²⁶ Ma wa Saul metuya nu ma ssi sen Antiok wi gho. Amapi kesü chuli manyi gweghe kemehu nyithu metu nu anyi kejonla sansi. Hana Antiok wi sansikeyathu pi atuwa sa Khristanyi le ciya.

²⁷ Tsü tsüwi Jerusalem wi atusenjüh-kechüthu pahan na Antiok wi wa.

²⁸ Mathu jawi meshu kesü ma nyan Agaba kesa na shagha Aghamu kekhang wina azeng nkemehai na ayyi maben wi gho tenle khi. (Hana Klaudia na kadimi sa keben tsü wi gho.)

²⁹ Sansikeyathu na mathu meshu kesüsü saya kemehai chu kekiqa kesun pi Judea wi mathu pvüshang kenondithu cü tenle kesa südheya.

³⁰ Mathu na hati sa nu apisa kesun pi Barnaba nu Saul manyi wina kemehu keshenpfüthu cü.