KEKULI 10 - Kemethajüh (N) (Re-editing) Bible (BSI)

Pitor nu Kornelia Manyi

¹ Kaesarea wi anyi kesü ma nyan Kornelia kesa “Itali Süpahi” le khi keten Rom süpahi meza miwi kedi nyi na ben.

² Ma nu ma theghi tsüdila Anyiza messi nu kinyi den. Ma Judah nyi ketha-uthu kejonla kiqa nu Anyiza wi khieki benden.

³ Minulen wi amighe kecheng kekihhe-u wi tsü ma kemanthi kesü mu, ciwi Anyiza nyilo kesü ma wi gho nu ma cichi, “Kornelia!”

⁴ Ma messi ntsa tangnyilowa ghang nu khi, “Kediwa, ha mangwa jjügi saben nu?” Tangnyilowa na ma wi kiza, “Anyiza na no kekhie nu nyu nanketizen kekuli tsü muyadha, nu ma no kekhie luneng cüle ben.

⁵ Khili anyi pahan kesun pi Joppa wi anyi kesü ma nyan Simon Pitor tsü ci wa thsülo.

⁶ Ma asayhu kedegüwa ma nyan Simon kesa atssükedone katen wi hang ketenwa jjen wi ben na.”

⁷ Tangnyilowa na kebvü seng wi Kornelia na ma magha meshu keni nu süpahi ketsatan nyi kesü ma ketsikina ketenwa tsü cichi.

⁸ Nu tsü cüki mehaitsü khi pi mathu kiza nu kesun pi Joppa wi wa thsüa.

⁹ Dhitsüwa wi ghanan lapvü wi mathu na Joppa tetsaki wa keten tsü wi Pitor na ajjenshha tangwa wi kekhie sale ki.

¹⁰ Ma ghama nu dsajjü mvu wa, nu mathu na kedsakejjü kiden tu keben wi ma kemanthi kesü mu.

¹¹ Tang wi sha chi nu pala khang ti kesa kesü ma ccügwen mejü keben na ayyi wi kedugho mu.

¹² Tsü non wi aghangsathu, ayyi wi ghapvüketenthu, nu awathu tsüdila ben.

¹³ Ahhai kesü ma wi khi, “Pitor, shagha hathu ha pathi nu dsalo.”

¹⁴ Isala Pitor na khi, “Nmale, nmale! Apvüwa, hi khiela kenenkagha nu nkemetha tsü npi dsa.”

¹⁵ Ahhaiwa tsüna ma wi khineng, “Katsüha lela Anyiza na satemetha kesa tsü pi nmetha le nmeshen lalo.”

¹⁶ Hana kecheng tughu sa, nu tsaseng wi tang wi tsü khuki nengya.

¹⁷ Pitor na ma kemanthi kemu jjügi ha meshen pi amansa keben wi Kornelia wina kesun kechi nyilothu tsüna Simon jjen chüya nu gho khweti jenka wi ngan ben.

¹⁸ Mathu na nyu cichi nu keü, “He wi kijünyi kesü ma nyan Simon Pitor kesa na ben kwe?”

¹⁹ Pitor na khili kecu kemanthi jjügi tsü chüyale keben wi Aghamu na ma wi kiza, “Kinalo! Meshu kecheng na no bhaden.

²⁰ Tsalina no shagha kidenya nu ayyi wi cülo, nu mathu gweghe wa nkesütu lalo, kepaghenanye hi mathu kesun chi.”

²¹ Tsalina Pitor na cü nu mathu wi kiza, “Nthu na anyi bha ketenwa tsü hi le! Nthu na mangwa sa gho ben nu?”

²² Mathu na luneng, “Kornelia, süpahi meza miwi kediwa na ikhang kesun chi le! Ma kemehai nyi kesü, Anyiza kinyi nu Judah nyithu tsüdila ma kinyiküden. Anyiza nyilo kesü na ma ya no ci pi ma jjen wi chilo kiza, isanu ma mangwa khi khe kina yalo khi.”

²³ Pitor na mathu ci pi ciwi ben thsü. Dhitsüwa wi ma kidenya nu mathu gweghe wa, nu Joppa wi keben kenondithu la pahan ma gweghe wa.

²⁴ Ma pitsüwa wi wala Kaesarea cuya, ciwi Kornelia, ciwi ma kechi theghithu nu apvüshangthu gweghe nu hie ben.

²⁵ Pitor na ciwi du keten wi Kornelia na gho ma metu nu ma tuwi kukedu ma kinyi.

²⁶ Isala Pitor na ma zanki nu ma wi kiza, “Shagha lo, hi lela anyi le!”

²⁷ Pitor nu Kornelia manyi keccünengli sen nu ajjen wi du ciwi anyi kejonla saghu keben mu.

²⁸ Ma mathu wi khi, “Nthu na chüben, Judah nyi kesü na Judah nyi nkenye jjen wi wa, nyelela gweghe nten. Isala Anyiza na hi anyi kesütanla pi nmetha nyelela kenenkagha le nsa lalo kesa pi hi ccüca chidha.

²⁹ Tsalina nthu na hi ci sen gholo kesun kechi wi hi nhhaghela ghodha. Hi nthu keüben, nthu mangkesa na hi ci sen gholo kesa kesunchi nu?”

³⁰ Kornelia na khi, “Ghanan kecheng wadha, ha tsü wi ha hi minulen wi amighe kecheng kekihhe wi kekhie saben. Zuli anyi athsümeni kemiki mphi nu gho wan ituwi nganya,

³¹ nu khi, ‘Kornelia! Anyiza na no kekhie za yadhale, nu no nyu nantizen kechi kekuli tsü la chüben.

³² Anyi pahan kesun pi Joppa wi meshu kesü ma nyan Simon Pitor kesa tsü ci wa thsülo. Ma asahyu kedegüwa Simon, atssükedone katen wi hang kebenwa jjen wi kijünyi saben na.’

³³ Tsalina hi no cichilo kesun chile, nu no nantizen nu ghodha. Ikhang na khili tsüdila Anyiza tuwi ben nu Apvüwa na no mangwa khilo kiza khe tsü kinale hie ben.”

Pitor Jühkekhi

³⁴ Pitor na mathu wi hati khi shagha, “Anyiza na anyi tsüdila ketizen makesü le kesa hi khili tsü ntsakhiwa chüti yadha.

³⁵ Amizza katsüha wi anyi kesü le kesü lela thowa na Anyiza messi nu kemeshonwa tsü saten khe ma tsü ssiyaben.

³⁶ Ma tsüdi miwi Apvüwa, Jisu Khrista wina kecca Jühtheü Kemehaiwa kesun pi Israel nyithu kecü tsü nthu na chüben.

³⁷ Johan Baptizwa na ma ketsijüh pi kekhi seng wi Galilee yyi wina wa Israel yyi maben wi mangwa khati sachi khe nthu na chüben.

³⁸ Anyiza na khati Kemetha Ghamu nu kekhang pi Nazareth nyiwa Jisu miwi chicü khe nthu na chüben. Anyiza na ma ssi keten ghena ayyi tsüdi wila wa nu kekuli kemehai sa nu nkemehai ghamu kekhang kekhu wi kebenthu tsüdila sa pi mehai cü.

³⁹ Ikhang na ma Judea yyi nu Jerusalem wi kuli kechithu chüzathu. Mathu na ma pi kross miwi jeng nu shü thsüa.

⁴⁰ Anyiza na kecheng ghanan wi ma sa pi hangneng cü nu ikhang ya ma muya thsü.

⁴¹ Anyi tsüdi ma nmu, isala Anyiza na ajüh ha khilo nu kessikeyathu ikhang ketan na ma mu. Anyiza na keshü wina ma sa pi hangneng kecü seng wi ikhang na ma gweghe dsajjü.

⁴² Ma ikhang yala Jühtheü Kemehaiwa nu Anyiza na ma kessi pi kahang nu keshü pendhewa sa thsüdha le kesa pi anyithu kizalo kesa ahza pi ikhang cü.

⁴³ Atusenjüh-kechüthu tsüdila ma cüki khi, anyithu kesü le kesü lela ma nondiyathu ma nyan kekhang wina kesami keteshi mu yaben kesa khichi.”

Judah Nyi Nkenyethu Na Kemetha Ghamu Mukeya

⁴⁴ Pitor na ajüh khitu keben wi Kemetha Ghamu na ajüh kina kebenthu tsüdi miwi ghoa.

⁴⁵ Joppa wina Pitor nie kegho Judah nyi kenondithu na Anyiza na Kemetha Ghamu meyisha pi Judah nyi nkenyethu miwi la chi kecü ghena mathu amansa.

⁴⁶ Kepaghenanye mathu na anyithu na ajüh ketheü khi nu Anyiza kedi seng keben zaya. Pitor na ajühkhi shagha :

⁴⁷ “Anyi hathu hana ikhang Kemetha Ghamu mukeya ti mathu la muyadha. Isathu, anyi pahan na mathu pi atssü wi baptaiz sale kesa khenya mehai kwe?”

⁴⁸ Tsalina ma mathu yala Jisu Khrista nyan wina baptaiz sayalo nu ahza khuchia. Tsaseng wi mathu na Pitor wi ghanan keu mathu gweghe benlo khie.