JOSHUA 7 - Kemethajüh (N) (Re-editing) Bible (BSI)

Akhan Kesami

¹ Apvüwa na Israel nyithu wi mathu na Jerikho wi mangla khu meyala pi yasalo kekhi tsü n-niela. Anyi kesü ma nyan Akhan kesa na ahza tsü n-niela, tsalina Apvüwa na Israel nyithu miwi aghepvü ntsa sa. (Akhan na Judah mizza wi Zerah gei wi Zabdi tsawa Karmi tsa.)

² Joshua na Jerikho wina anyi pahan kesun pi wa Bethaven kete wi Bethel na nishuwa anyunuti kesü Ai wi ayyi hhainan walo ahza khuchi. Mathu na wa tsüti kesa seng wi,

³ mathu na kheneng gho Joshua wi kiza, “Anyi maben na wala Ai nssisala mehai. Anyi hazar keni nyelela kecheng-u ketan kesun chilo. Süpahizi maben kesun pi ciwi nkesali thsü lalo; tsüna anyunuti keti nyele.”

⁴ Tsalina Israel nyi hazar kecheng-u ketan kesun pi wa kesali thsü, isala mathu na nyu nchala asenkheneng ghoa.

⁵ Ai wi anyithu na khweti-jenka wina mathu jügü sen nu Shebarim kecu yyishiphon kencüggü wi mathu changha nu tugho cen pathia. Tsaseng wi Israel nyithu na mathu kempvüza nmila messi wa.

⁶ Joshua nu Israel nyi ccülikesathu na ahathakina wina mathu thsümeni mezüqhe, mathu na Apvüwa Cenkethenjüh Khitson tuwi qancadu mathu hathakina pi ccücale kesalina ayyinikhu pi mathu li miwi chipvü nu shitawa kecu ciwi ben.

⁷ Nu Joshua na khi, “Kekhang ntsawa Apvüwa! No mangkesa ithu ssinu Jordan khhaka kegho ithu pi Amor nyithu kwen wi du thsü nu ithu yasa thsüale saben nu? Ithu na Jordan khhaka kawa ceen hang nkeben kwe?

⁸ O Apvüwa, Israel na aghinyithu tuwi khenengdha, hi khili mangwa le khiya tendha nu?

⁹ Kanaan nyithu nu diyyiwa wi anyi kepathu tsüdila tsü cüki zayaben. Mathu na ithu vüya nu ithu tsüdi pathiaben. Isalethu, no n-nyankethang ghena khati saten nu?”

¹⁰ Apvüwa na Joshua wi khi, “Shaghalo! No mangkesa na ayyi wi hati qancaduben nu?

¹¹ Israel na samidha! Hi mathu ya nieyalo kekiza mathu ssinu cenkethenjüh tsü mathu na pakhhidha. Mathu na atsanqaithu yasalo kesa tsü pahan khuyadha. Mathu na milimesa nu tsüthu ghanfü pi mathu ji saghu yadha.

¹² Ha ghena Israel nyithu na mathu ghinyithu nchala le. Mathu na aghinyithu tuwi asenkheneng, kepaghenanye mathu meshensa pi keyasa sa thsüdha. Nthu jawi atsanqaithu khu meya lalo kesa khuya kesathu tsü npi keyasa chu hi nthu ssiben ntendha le!

¹³ Shaghalo! Wa anyithu sametha nu mathu ya ituwi ghole kidenya thsülo. Mathu dhitsü wi kidenyalo kizalo, kepaghenanye hi Apvüwa Israel Nyizawa na ha khiben: ‘Israel, nthu jawi hi yasa pilo kekhi tsanqaithu tsüna bendha. Nthu na tsüthu tsü khupi nkesa tsü nthu na nthu ghinyithu tuwi nganya nbenle!’

¹⁴ Tsalina ghanen wi mathu amizza mizza sala ssinu atuwi shhugho benle kizalo. Hi amizza khushikeyawa witsü agei gei sala ssi shhughoben. Hi agei khushikeyawa witsü atheghi theghi sala ssi shhughoben. Hi atheghi khushikeyawa witsü anyi kesüsü sala ssi shhughoben.

¹⁵ Yasa pilo kesa tsanqai senketen anyi tsüwa khushi keyawa ma theghi nu ma keben tsüdi gweghe pi anni wi mecang sh aben, kepaghenanye ma hi cenkethenjüh tsü pakhhi nu nkemehai kejüghekeya sengho Israel miwi chidha.”

¹⁶ Dhitsü ghanenwa mitu wi Joshua na Israel nyithu pi amizza mizza sala ssi shhugho, nu Judah mizza khushiya.

¹⁷ Ma Judah mizza wi agei gei ssi shhugho, nu Zerah gei khushiya. Tsaseng wi ma Zerah gei wi atheghi theghi ssi shhugho, nu Zabdi theghi khushiya.

¹⁸ Ma tsaseng wi Zabdi theghi wi anyi kesüsü ssi shhugho, nu Zabdi tsawa Karmi tsa Akhan khushiya.

¹⁹ Joshua na ma wi khi, “Itsawa, no Apvüwa Israel Nyiza tuwi ajüh tsentsa khishilo. No khili mangwa satheng khe hi kizalo. Tsü pi hi nkuthila.”

²⁰ Akhan na khineng, “Ntsakhiwa le, hi Apvüwa Israel Nyiza tuwi samidha, nu hi hati ha sadha.

²¹ Ithu na atsanqai shukeya jawi tsü hi Babylon nyi thsü tsikemehai kesü, rükatssü kilogram keni-u, nu suna kekiyan kilogram kesü kegishü pahan-u muya. Hi tsüthu tsü khuya mvuthi nu khuyale. No hi tsüthu pi inithsüjjen non ayyi wi rükatssü pi acakhuwa sala chhüvhü ketheng muyaben. ”

²² Tsalina Joshua na nyilo pahan kesun chi, mathu na bvü wala nithsüjjen wi ntsakhiwa kemeshensa tsanqaithu rükatssü tsü pi acakhuwa sala chhüvhü ketheng tsü muya.

²³ Mathu na nithsüjjen wi tsüthu khu sen wa Joshua nu Israel tsüdi cüa, nu tsüthu pi Apvüwa tuwi chia.

²⁴ Joshua nu Israel nyi tsüdi gweghe Akhan, rükatssü, athsü, suna, Akhan tsa nu ma ngathu, ma mesüsi, gadathu, nu khaghaneni, ma nithsüjjen, nu ma keben tsüdi saghuya, nu mathu na tsüthu sen nu Ketizenkesa Yyiketijü wi wa.

²⁵ Nu Joshua na khi, “No mangkesa na ketizenkesa hati sengho ithu miwi chi nu? Apvüwa na khili ketizenkesa sengho nmiwi chitendha!” Anyi tsüdi ngan nu alon pi Akhan nu ma theghi kecenthi nu ma keben la pi mecang.

²⁶ Mathu na alon kejon pi ma miwi kaghapvü kesa tsüna nansü kecu ciwi ben. Tsalina apen tsüpi khili la Ketizenkesa Yyiketijü le khiden. Tsaseng wi Apvüwa na ma leben nminula.