JOSHUA 6 - Kemethajüh (N) (Re-editing) Bible (BSI)

Jerikho Khweti Keqanca

¹ Jerikho khweti jenka khen nu Israel nyithu na ndugho thsüle hieben. Anyi kesütanla anyunutiwa wi dushhu meya.

² Apvüwa na Joshua wi khi, “Hi Jerikho, ma kadimiwa, nu ma süpahi kekhangthu tsüdi pi nkwen wi chiaden.

³ No nu nsüpahithu na ghanan kesü wi kuti lentsen sen nu anyunutiwa tsü vü ben, nthu na ghanan tugho tsüti saben.

⁴ Keqhaikedithu meshu tagü, kesüsü na tutuwa kesüsü pie nu Cenkethenjüh Khitson tuwi waben. Tugho ghanan wi keqhaikedithu na tutuwa khou nu no nu nsüpahithu na lentsen sen nu tagü tughu anyunutiwa tsü vülo.

⁵ Tsaseng wi mathu na tutuwa tsü kesie khou chithu, nthu na tsü zaya meyi anyi tsüdila misikhhali jishalo, isalethu, anyunuti khwetithu tsüna bvücaben. Tsaseng wi süpahizi mabenla anyunutiwa non witsü bvü dulo.”

⁶ Joshua na keqhaikedithu cichi nu mathu wi kiza, “Cenkethenjüh Khitson tsü pieya, nu no tagü na tutuwa pie nu tsü tuwi walo.”

⁷ Tsaseng wi ma ahza pi ma nyithu cü nu akhang kesü na Apvüwa Cenkethenjüh Khitson tuwi wa tsü ghihie nu anyithu na lentsen sen nu anyunutiwa tsü vüwa.

^8-9 Tsalina Joshua kekhi ti aghikehie akhang kesü na keqhaikedithu tutuwa khou ketenthu tuwi wa; tsü seng wi keqhaikedithu Cenkethenjüh Khitson pie ketenthu, nu asengwa aghikehie akhang kesü na tsü nie. Matsü tsüdi wi tutuwathu khou isa.

¹⁰ Isala Joshua na ma nyithu ya njisha thsü, nu ma ahza npi khukechi chu thola ajüh kesüla nkhi thsü.

¹¹ Tsalina ma anyi khang ha ya Apvüwa Cenkethenjüh Khitson tsü pie nu kuti anyunutiwa tsü vü thsü. Tsaseng wi mathu kemnanpen wi kheneng gho tsü ghaja ciwi ben wa.

^12-13 Dhitsüwa wi Joshua na ghanen mitu shagha, nu keni tughuwa ghena keqhaikedithu nu süpahithu na ghanie kesa ti kesenniela lentsen sen nu anyunutiwa tsü vü wa thsü; atuwa, aghikehie khang; tsü shiwa, keqhaikedi tagü na tutuwa tagü kekhou; tsaseng wi keqhaikedi Apvüwa Cenkethenjüh Khitson pie ketenthu; nu asakhenwa, aghikehie asengwa khang. Matsü tsüdi wi tutuwathu khou isa.

¹⁴ Keni ghanan wi la mathu na lentsen sen nu anyunutiwa tsü kuti vü nu kheneng kemnanpen wi ghoa. Mathu na ghanan tugho hati sa.

¹⁵ Tagü ghanan wi mathu na atsathang meyi shagha hatuwi ti lentsen sen nu tagü tughu anyunutiwa tsü vü — ha ghanan ketan mathu na lentsen sen nu tagü tughu tsü vü.

¹⁶ Tagü tughuwa vü kewa wi keqhaikedithu na tutuwa khou chile keben wi Joshua na ma nyithu na jishalo ahza khuchi, nu ma khi, “Apvüwa na anyunutiwa ha pi nthu cüdha le!

¹⁷ Anyunuti ciwi keben pala tsüdi yasatha sapi Apvüwa kekinyi sa nsathu yishü. Keqheza menkedsa nza Rahab nu ma jjen wi ma gweghe kebenthu ketan heilo, kepaghenanye ma ithu wahhaithu tsü pi kuthi cüle.

¹⁸ Isala nthu na yasalo kesathu mangla khu meyala nu tsüdi yasa khilo; Keujüla nthu na pala pahan khuya lethu, nthu na agükeccü nu kededi sengho Israel nyithu kemnanpen wi chiaben.

¹⁹ Pala katsüha lela rükatssü, suna, lezza, nyelela amighe pi kesathu kuthi pi Apvüwa ghena makepa salo. Tsü pi Apvüwa ghena kebenketheng pen wi chilo.”

²⁰ Tsalina keqhaikedithu na tutuwa khouchi. Anyithu na tsü zaya meyi misikhhali jishachi, nu akhwetithu na bvüca. Tsaseng wi süpahizi tsüdila ayyishiphon wi wa anyunutiwa wi dula tsü yasa.

²¹ Mathu na njünnu sen nu anyunuti wi anyi nza nu npvüzathu tsüdi, ghanyi nu keqhaithu, tsüdi süthia. Mathu na amesüsi, khaghaneni, nu gadathu la pathia.

²² Joshua na wahhai meshu keni wi khi, “Nshinyi na khishiketheng ti keqheza menkedsa nzawa jjen wi du nu ma nu ma theghi ssi shhugholo.”

²³ Tsalina manyi dula Rahab, ma ba, ma jja, ma baghathu, nu ma theghi kepathu ssi shhugho. Manyi na ma theghi nu nssümaghathu tsüdi ssinu Israel nyithu kemnanpen kete yazishu kesa pen wi wa.

²⁴ Tsaseng wi mathu na pi Apvüwa ghena kebenketheng pen wi chikesa tsanqai rükatssü, suna, lezza, nu amighe pi kesathu ketan khe anni pi anyunutiwa nu ciwi keben pala tsüdi saghu mecang.

²⁵ Isala Joshua na keqheza menkedsa nzawa Rahab nu ma theghithu tsüdila npathila, kepaghenanye ma wahhai keni kesun pi Jerikho wi kechi wi tsü manyi pi kuthi kecü ghena. (Ma shicüthu na khili kecu Israel nyithu jawi hangben.)

²⁶ Ha tsüwi Joshua na kekitsan kedhu kesü sachi: “Anyi thowa na Jerikho nyunutiwa ha sanengle sa khe Apvüwa kishen-keshi pvüyaben. Thowa na ma giketegü chi khe ma tsa tssütsewa na shüaben; Thowa na ma kaghapeng jenkathu sa chi khe ma tsa bvükhenwa na shüaben.”

²⁷ Tsalina Apvüwa na Joshua ssiden, nu ma nyankemehai na diyyi maben wi la ben.