JOSHUA 5 - Kemethajüh (N) (Re-editing) Bible (BSI)

¹ Jordan na niduwa Amor nyi kadimithu nu Mediterranean Tssükedone kete wi Kanaan nyi kadimithu tsüdila Israel nyithu na Jordan npi pvüthikeya chu Apvüwa na tsü sapi keqha thsüle kesa zaya. Mathu na messi nu mathu kempvüza nmila.

Gilgal wi Ahyukahan

² Tsaseng wi Apvüwa na Joshua kiza, “Awegüsalon pi annuzathu saya nu pi Israel nyithu hyuhan nenglo.”

³ Tsalina Joshua na Apvüwa kekhi ti sa, nu ma apen kesü pi “Ahyukahan Yikha” le khiketen witsü Israel nyithu hyuhan.

^4-6 Israel nyithu na Ejipt keteshi wi npvüzathu tsüdila ahyuhandha. Isaliela anyithu na amapi jügha ayyikeshü wi keten jüwi mukeya ghanyithu kesüla ahyu npi han. Tsü tsüwi aghikesa qo nyi npvüzathu mathu na Apvüwa jüh nkenie ghena tsüdila shü. Apvüwa na mathu ya ma ayyi kemehai nu kinyan pi mathu bamyithu cüle khishiketheng tsü muya thsü ntenle kishen ketheng ti sa.

⁷ Anyi hathu tsathu na ahyu npi han, nu abvüye ketheü ha Joshua na mathu hyuhan.

⁸ Ahyuhan cenkeya seng wi ayisü npi kema chu mizzatenti mabenla kemnanpen wi ben wa.

⁹ Apvüwa na Joshua wi khi, “Nansü hi nthu wi Ejipt wi nssümagha kesa nyankekinyen tsü khupidha.” Tsalina apen tsü nyan pi Gilgal cia, nu anyan tsüna khili la ben.

¹⁰ Israel nyithu na Gilgal deshentijü wi Jerikho kete wi kemnanpen sa keben wi mathu na asha tsüwa taghamejü ghaja Shhukeya Kho tsü sa.

¹¹ Dhitsüwa tsüna mathu Kanaan wi shigü keshagha tsse asu kennun nu azimi pi nkechi mesa kedsa tegüwa.

¹² Tsü tsüwi manna na nqanca ladha, nu Israel nyithu na mangla nmiladha. Tsü tsü nten na mathu na Kanaan wi shigü keshagha tsse dsa wa.

Joshua nu Anyi Kesü Njünnu Senketenwa

¹³ Joshua na Jerikho kete wi keben wi anyi kesü na njünnu sen nu ngan keben mu. Joshua na anyi tsüwa wi wa nu keü, “No ithu süpahi kesüla aghinyi nu?”

¹⁴ Anyi tsüwa na khineng, “Keni qho nyele, isala hi Apvüwa süpahizi benchüwa sala hewi ben.” Joshua na ayyi wi qancadu kinyi nu khi, “Kediwa, hi nmaghawa le. No hi ya mangwa sa thsü mvu ben nu?”

¹⁵ Apvüwa süpahizi benchüwa na ma kiza, “Nccüguwen khushi lo, kepaghenanye no kemetha pen wi nganben.” Nu Joshua na ma salo kekiza tsüti sa.