JOSHUA 4 - Kemethajüh (N) (Re-editing) Bible (BSI)

Meshenkeben Lonthu pi Kisheng

¹ Mizzatenti mabenla Jordan pvüdhikeya seng wi Apvüwa na Joshua wi khi,

² “Mizza kesü wi meshu kesüsü sa anyi taghakeni kessiyalo,

³ nu mathu na Jordan Ghaku non wi keqhaikedithu kengan pen witsü alon taghakeni khuyalo kizalo. Mathu na alon tsüthu pvü wa nthu shita apen khiewa kemnanpen saten khe pi ciwi shengyalo kizalo.”

⁴ Joshua na ma kessikeya anyi taghakeni tsü cichi

⁵ nu mathu wi khi, “Apvüwa nthu Nyiza Cenkethenjüh Khitson tuwi wa nu Jordan Ghaku non wi duya. Nu nthu meshu kesü Israel mizza kesüsü ghena alon kesüsü pi ma depfü wi chi pie shhugholo.

⁶ Alon hathu ha na anyithu wi Apvüwa na mangwa sachi khe meshenya thsüaben. Ashiseng wi nthu tsangathu na nthu wi alon hathu ha jjügi na mangwa nu nthu wi keü lethu,

⁷ nthu na mathu wi Apvüwa Cenkethenjüh Khitson pie nu Jordan Ghaku kepvüdhi wi atssü na nganwale khiben. Alon hathu ha na keshüthangla Israel nyithu wi hewi mangwa sa khe meshenya thsüaben le.”

⁸ Anyithu na Joshua ahza khukechi tsü nie. Apvüwa na Joshua kekiza ti anyithu na wa Jordan Ghaku non wi Israel mizza kesüsü ghena alon taghakeni khuya, nu mathu na tsüthu pvü wa mathu kemnanpen wi shengya.

⁹ Joshua na alon taghakeni pi keqhaikedithu na Cenkethenjüh Khitson pie nu Jordan Ghaku non wi kengan pen witsü la sheng. (Alon hathu ha na khili la ciwi ben.)

¹⁰ Apvüwa na ahza pi Joshua cü nu anyithu ya salo kekiza tsüdila npi kesakhi chu keqhaikedithu na Jordan Ghaku non witsü ngan. Hawa ha Mosa na salo khitheng. Anyithu na kaghajila aghaku tsü pvüdhi.

¹¹ Anyithu tsüdila aghaku khhakawa benkeya wi keqhaikedithu na Apvüwa Cenkethenjüh Khitson tsü pie nu anyithu tuwi wa.

¹² Reuben nu Gad mizzathu nu Manasseh mizza kegishü pahan wi anyithu na Mosa mathu salo kekiza ti anyi kepathu tuwi wa aghi ghena kidenya.

¹³ Apvüwa tuwi na anyi hazar jügha-u aghi ghena kidenya nu pvüdhi sen Jerikho kete deshentijü witsü du.

¹⁴ Tsü ghanan Apvüwa na sa kechi tsüna Israel nyi sapi tsüdi tuwi Joshua meshen pi di ntsa sachi. Mathu na Mosa kinyikü kesa ti Joshua kahang chu mathu na ma kinyikü.

¹⁵ Tsaseng wi Apvüwa na Joshua kizala,

¹⁶ keqhaikedithu ya Cenkethenjüh Khitson tsü pie nu Jordan wina shhugholo khi thsü.

¹⁷ Joshua na tsüti sa,

¹⁸ nu khathansha wi keqhaikedithu na shhugho aghaku ghüsa cuya khe aghaku tssü na kheneng lle dugho kishi pen wi ma ghüsa tsüdi pongya.

¹⁹ Anyithu na asha atuwa wi tagha ghanan wi Jordan pvüdhiya nu wa Gilgal wi kemnanpen sa, tsüna Jerikho na nishuwa.

²⁰ Ciwi Joshua na Jordan wi khukeya alon taghakeni tsü pi sheng.

²¹ Nu ma Israel nyithu wi khi, “Ashiseng wi nthu tsangathu na nthu wi alon hathu ha jjügi mangwa nu nthu wi keü lethu,

²² nthu na mathu wi Israel nyithu na ayyi keqha miwi na Jordan pvüdhikeya cüki khiben.

²³ Apvüwa nthu Nyiza na ithu ghena Kenmie Tssükedone sapi keqha thsü kesa ti nthu na Jordan npi pvüdhikeya chu ma atssü sapi keqha thsüle kesa mathu kizalo.

²⁴ Ha ghena ayyi wi anyi tsüdila Apvüwa kekhang tsüna khatila di khe chüaben, nu nthu na anuphanla Apvüwa nthu Nyiza tsü kinyiküben.”