JOSHUA 24 - Kemethajüh (N) (Re-editing) Bible (BSI)

Joshua na Shekhem wi Anyithu Keccüneng

¹ Joshua na Israel mizza nyithu tsüdi cighu pi Shekhem wi chi. Ma baghangthu, ccülikesathu, pendhethu, nu Israel nyi kedithu cichi nu mathu na Anyiza tuwi gho,

² Joshua na anyi tsüdi wi khi, “Apvüwa Israel Nyizawa na ha khiben: ‘Kheni nthu bamyithu na Eufrat Ghaku khhaka kawa hang nu acenpvü kepathu kinyile. Mathu meshu kesü Tera, tsüna Abraham nu Nahor manyi ba.

³ Nu hi Eufrat wina nthu baqhai Abraham ciya nu ma ssisen Kanaan yyi maben pvüdhi wa. Hi ashicübvügha kejon pi ma cü. Hi Isak pi ma cü,

⁴ nu Jakob nu Esau manyi pi Isak cü. Hi yyishiphon diyyiwa Edom pi Esau yala ma ji saya thsü, isala nthu baqhai Jakob nu ma shicübvüghathu na Ejipt wi cüa.

⁵ Tsaseng wi Mosa nu Aaron manyi kesunchi, nu hi ketizenkesa kedi sen nu Ejipt nyi miwi gho. Isala hi nthu ssishhua.

⁶ Hi Ejipt wina nthu bamyithu ssinu shhu, nu Ejipt nyithu na gorugari nu goruthu ssinu mathu jügü. Isala nthu bamyithu na wa Kenmie Tssükedone cu keya wi

⁷ mathu na magha nu hi wi kekiqa khie, nu hi kejang pi mathu nu Ejipt nyithu jüwi chi cüa. Hi atssükedone yala Ejipt nyithu miwi gho thsü nu mathu meyanthi thsüa. Hi Ejipt nyi miwi mangwa sachi khe nthu na chüben. “‘Nthu na ayyikeshü wi matsü kesiela hang.

⁸ Tsaseng wi hi nthu ssinu Amor nyithu Jordan na nishuwa hang keben yyi wi shhugho. Mathu na nthu ssinu aghisa, isala hi mathu miwi khangkeya pi nthu cüa. Nthu na atujügü kewa wi hi mathu yasa, nu nthu na mathu yyi yaya.

⁹ Tsaseng wi Moab kadimi Zippor tsawa Bala na nthu ssinu aghisa. Ma Beor tsawa Balaam cichi nu ma kishencü pi nthu miwi chilo khie.

¹⁰ Isala hi Balaam jüh nkina mvula, tsalina ma sawegü pi nthu cü, nu hi hatinu Balak wina nthu khushiya.

¹¹ Nthu na Jordan pvüdhi sen Jerikho wi ghoya. Amor, Periz, Kanaan, Hitti, Girgash, Hivi, nu Jebus nyithu na nthu ssinu aghikesa ti Jerikho nyithu na nthu ssinu aghisa. Isala hi mathu tsüdi miwi khangkeya pi nthu cüa.

¹² Nthu na atujügü kewa wi hi Amor kadimi keni jügüshia le kesalina mathu pi agükeccü wi chicüa. Nthu njünnu nu alamugho ghena nye.

¹³ Hi nthu na kuli nkegho yyi nu nkesa anyunutithu pi nthu cüa. Nthu na khili ciwi hang nu nthu na pi sheng nketheng kemeshentsse tonthu wi kemeshentsse bi, nu oliv tonthu wi oliv bi la dsayaben.’

¹⁴ “Tsalina khili Apvüwa kinyikü nu aleben ntsa nu ajühtsentsa sala ma kekuli salo. Nthu bamyithu na Mesopotamia nu Ejipt wi kinyi kegho cenpvüthu tsü teshi nu Apvüwa kekuli ketan salo.

¹⁵ Keujüla nthu na ma kekuli nsamvu lethu, nthu bamyithu na Mesopotamia wi kinyi kegho cenpvüthu tsüla, nyelela Amor nyi nthu na khili mathu yyi wi hang keben cenpvüthu tsü khe nthu na thowa kekuli saten khe nansü südhe yalo. Hi nu itheghi ghena tsü ithu na Apvüwa kekuli ketan saden.”

¹⁶ Anyithu na khineng, “Ithu na khiela Apvüwa teshi nu kepa wi cenpvüthu kekuli sa wa nben le!

¹⁷ Apvüwa ithu Nyiza na Ejipt wi nssümagha wina ithu bathu nu ithu ssi shhugho, nu ithu na ma amankesa kekulithu muyadha. Ma ithu ya kahe wi mizzatentithu tsüdi jawi pvüdhi wa lela yazishu waya thsü.

¹⁸ Ithu na atujügü sen ayyi hewi kegho wi Apvüwa na Amor nyi hewi kebenthu tsüdi jügüshia. Tsalina ithu la Apvüwa kekuli saden; ma ithu Nyizawa.”

¹⁹ Joshua na anyithu wi khi, “Nthu na Apvüwa kekuli saya nben, kepaghenanye ma kemetha Nyiza kesü; ma anonkemeyen Nyiza kesü; nu ma nthu kesami teshicü nben.

²⁰ Keujüla nthu na ma teshi nu asang cenpvüthu kekuli sa wa lethu, ma kheneng nthu shun nu kemeten pi nthu cüaben. Ma hatuwi nthu ghena mehaiten lela nthu yasa cüben.”

²¹ Anyithu na Joshua wi khi, “Nyele! Ithu na Apvüwa kekuli ketan satenle.”

²² Joshua na mathu kiza, “Nthu na Apvüwa kekuli ketan satenle kessiya kesa ha na nthu ketanla nthu ghena chüza saben.” Anyithu na khi, “Anle, ithu ketanla ithu ghena chüza saben.”

²³ Ma khi, “Isalethu nthu na asang cenpvüthu tsü pi khalalo, nu nthu jühkeya pi Apvüwa Israel Nyizawa tuwi khichilo.”

²⁴ Tsaseng wi anyithu na Joshua wi khi, “Ithu na Apvüwa ithu Nyiza kekuli ketan saden. Ithu na ma yenkhukechithu tsü nieden.”

²⁵ Tsalina Joshua na tsü ghanan anyithu ghena cenkethenjüh kesü sa, nu ma Shekhem wi mathu na nie yalo kesa ghena ayen nu ahzathu pi cü.

²⁶ Joshua na ayenkhukechi hathu pi Anyiza Yenwa lesüshen wi zhüya. Tsaseng wi ma alon kedi kesü khuya nu pi ayangton cakhu wi Apvüwa kekinyipen wi sheng.

²⁷ Ma anyi tsüdi wi khi, “Alon ha ithu ghena chüza saden. Hawa ha Apvüwa na ajühkhi pi ithu kekiza tsüdila zayadha. Tsalina nthu ya Anyiza nmatang thsüle kesalina ha nthu ghena chüza kesü saben.”

²⁸ Tsaseng wi Joshua na anyithu kesun pi bvü thsüa, nu mathu tsüdila papa yyi wi wha neng shan.

Joshua nu Eleazar Keshü

²⁹ Tsaseng wi Nun tsa Joshua Apvüwa maghawa na ma kahang mapi meza nu tagha sa keben wi shü.

³⁰ Mathu na ma pi Gaash Yikha aghawa Efraim yyishiphon diyyiwa wi ma yyi Timnah Sera wi chhü vhüa.

³¹ Joshua na hang keben chu Israel nyithu na Apvüwa kekuli sa, nu ma keshü seng wi lela ccülikesathu mathu nyon pi Apvüwa na Israel ghena sakechi tsüdila kemuthu na hang keben chu anyithu na tsüti sa.

³² Israel nyithu na Ejipt wina Josef kamang pvü nu keshhugho tsü pi Shekhem wi ayyi kesü Jakob na rükatssü meza pi Shekhem bawa Hamor tsathu wi shü ketheng witsü vhüa. Ayyi hawa ha Josef shicübvüghathu na ghongkeya.

³³ Aaron tsawa Eleazar na shü nu pi Efraim yyishiphon diyyiwa wi anyuti kesü pi ma tsawa Fineha kecü Gibea witsü vhüa.