JOSHUA 22 - Kemethajüh (N) (Re-editing) Bible (BSI)

Joshua na Nishuwa Mizzathu kesun pi Ajjen wi Whaneng thsüa

¹ Joshua na Reuben, Gad, nu nishuwa Manasseh mizzathu wi anyithu cighu chi.

² Ma mathu wi khi, “Nthu na Apvüwa maghawa Mosa na ahza pi nthu kecü tsüdila sadha, nu nthu hi khikechi tsüdila nie cendha.

³ Matsü hathuthu wi ha nthu na kutitanla no Israel nyithu teshi nsale. Nthu na kiden-kesha nu Apvüwa nthu Nyiza yenkhukechithu tsü nie ghoben.

⁴ Khili Apvüwa nthu Nyiza na ma khishiketheng ti kecca pi no Israel nyithu cüdha. Tsalina ayyi nthu jile khi keben Jordan na nishuwa Apvüwa maghawa Mosa na pi nthu cü kethen witsü whanenglo.

⁵ Mosa na pi nthu kekiza yenwa tsü nieya metsilo; Apvüwa nthu Nyiza tizenya, ma kemeshenwa tsü sa, ma yenkhukechithu nieya, ma wi jühtsentsa sa, nu nthu leben nu kahang tsüdi pi ma kekuli salo.”

^6-8 Joshua na ajüh hathu khi nu sawegü pi mathu cü, nu mathu kesun pi ajjen wi wha thsüa: “Nthu na asahangthu, rükatssü, suna, lezza, amighe, nu athsümeni, ji ntsa ben nu keban sala ajjen wi whaneng tendha. Nthu na nthu ghinyithu wi khukeya tsü pi nthu mizzathu gweghe gishüyalo.” Isanu mathu na ajjen wi whaneng. Mosa na ayyi Jordan na nishuwa tsüpi Manasseh mizza kegishü pahan cüdha, isala kegishü pahanwa ghena Joshua na Jordan niduwa ayyi pi Israel mizza kepathu gweghe cütheng.

⁹ Tsalina Reuben, Gad, nu nishuwa Manasseh mizzathu na ajjen wi whaneng. Mathu na Kanaan yyi wi Shilo wi Israel nyithu teshi nu Apvüwa na Mosa wina mathu kiza nu mathu ayyi yapi mathu ji sakeya Gilead yyi wi whaneng.

Jordan Kete wi Kekinyipen Kesa

¹⁰ Reuben, Gad, nu nishuwa Manbasse mizzathu ghola Geliloth cukeya wi mathu kewalen Jordan na nidu wiwa aghaku katen wi kekinyipen keti, ghang kemehai kesü sa.

¹¹ Nyu na hati Israel nyithu kepa kiza, “Ghangchilo! Reuben, Gad, nu nishuwa Manasseh mizzathu na Geliloth wi Jordan na ithu yyiwa kekinyipen kesü satheng le!”

¹² Israel nyithu na ha za keya wi azitenti mabenla Shilo wi saghuya nu wa nishuwa mizzathu ssi nu aghisale sa.

¹³ Israel nyithu na Eleazar tsa keqhaikediwa Fineha kesun pi Gilead yyi wi Reuben, Gad, nu nishuwa Manasseh mizzathu wi chi.

¹⁴ Niduwa mizzathu kesüsü wi atheghi jawi agei kesü wi ccülikesa kesüsü meshu tagha pi Fineha gweghe wa thsü.

¹⁵ Mathu na Gilead yyi wi Reuben, Gad, nu nishuwa Manasseh mizza nyithu wi gho,

¹⁶ nu azitenti maben ghena Apvüwa nyan wina mathu wi khi, “Nthu mangkesa na pala nkemehai hati sapi Israel Nyizawa shunten nu? Nthu na nthu ghena kekinyipen ha sapi Apvüwa matangdha. Nthu na ma n-nie ladha le!

¹⁷ Peor wi ithu na sami nu Apvüwa na adhagha pi ma nyithu metenmesha kesa tsü meshen meya kwe? Tsü ghena ithu na khili la ketizensa benle. Kesami tsü ketan lebengha meya kwe?

¹⁸ Nthu na khili la ma n-nie mvula hhaghe ben kwe? Keujüla nthu na nansü Apvüwa shun lethu, ma dhitsü wi Israel nyi tsüdi miwi aghepvü ben.

¹⁹ Tsalina nthu yyiwa ha nmetha lethu, Apvüwa yyi ma Nithsüjjenwa keben witsü ghalo. Ithu jawi ayyi pahan pi gishüyalo. Isala Apvüwa nmatangla nyelela kekinyijjen kepa wi sapi Apvüwa ithu Nyiza kekinyipenwa tsü wwa neng pi ithu nmatang lalo.

²⁰ Zerah tsawa Akhan na keyisha tsanqaithu tsü ghena ayenkhukechi nkinala. Akhan ketan ma kesami ghena nshü isala Israel nyi zitenti mabenla tsü ghena khatila ketizensa khe meshenchilo.”

²¹ Reuben, Gad, nu nishuwa Manasseh nyithu na niduwa mizzathu theghi wi ccülikesathu luneng,

²² “Kekhang ntsawa tsüna Anyiza! Ma Apvüwa le! Kekhang ntsawa tsüna Anyiza! Ithu na mangkesa na ha satheng khe ma chüben, nu ithu na nthu la tsü chüya thsü mvuben! Keujüla ithu na Apvüwa matang lethu, ithu ya nhang thsü lalo!

²³ Keujüla ithu na Apvüwa jüh nkina nu ithu ghena ketan kekinyipen sa nu mecang pi kinyi, asu pi kinyi, nyelela kecca ghena kekinyi wi senle sa lethu, Apvüwa ya kemeten pi ithu cü thsülo.

²⁴ Isala tsüti nye! Haseng wi nthu shicübvüghathu na ithu shicübvüghathu wi hati khi keben kemessi ghena ithu na hati sale, ‘Nthu na Apvüwa Israel Nyizawa ssinu mangwa kesau ben nu?

²⁵ Ma Jordan pi no Reuben nu Gad nyithu nu ithu ggü sa thsüdha. Nthu na Apvüwa ssinu mangla kesau nmi.’ Isanu nthu shicübvüghathu na ithu shicübvüghathu pi Apvüwa nkinyi thsü mvula khen shaben.

²⁶ Tsalina ithu na mecang pi kekinyi nyelela kekinyithu sale kesa ghena kekinyipen kesü ha nsale,

²⁷ isala ithu seng wi abvüyethu, nthu nu ithu nyithu ghena, ithu la ntsakhiwa ahhanshathu nu kecca ghena kekinyi pi Apvüwa Nithsüjjen kemetha tuwi mecang pi kinyiten le kesa azensu kesü sale kesa ghena. Hawa ha nthu shicübvüghathu ya ithu shicübvüghathu wi nthu na Apvüwa ssinu mangla kesau nmile kesa nkhi thsüle kesalina.

²⁸ Ithu kemeshen na keujüla tsüti sa lethu ithu shicübvüghathu ya: ‘Ghangchilo, ithu bamyithu na Apvüwa kekinyipen ti kesa kesü satheng. Tsüna mecang pi kekinyi nyelela ahhansha kesa ghena nye, isala nthu nu ithu nyithu jüwi azensu kesüle,’ khiya mehai.

²⁹ Ithu na khiela Apvüwa matang nben nyelela mecang pi kinyi, asu pi kinyi, nyelela ahhanshathu sale kekinyipen kesü sa nu khiela Apvüwa teshia nben. Ithu na Apvüwa ithu Nyiza kekinyipen ma ketenpen Nithsüjjen tuwi kebenwa tsü nkenye kekinyipen kepa wi sa ntheng le.”

³⁰ Keqhaikediwa Fineha nu niduwa mizzathu theghi wi ccülikesathu meshu tagha ma gweghe ketenthu na Reuben, Gad, nu nishuwa Manasseh mizza nyithu na kekhi tsü kina pi mathu leben ghashu saya.

³¹ Keqhaikediwa Eleazar tsa Fineha na mathu wi khi, “Khili Apvüwa na ithu ssitenle kesa ithu na chüyadha. Nthu na ma matang nben, tsalina nthu na Apvüwa kemeten wi Israel nyithu hangsha cüdha.”

³² Tsaseng wi Fineha nu ccülikesathu na Gilead yyi wi Reuben, Gad nyithu teshi theng nu tsü cüki khi pi Israel nyithu kizale Kanaan wi wa neng.

³³ Israel nyithu na leben ghashu nu Anyiza seng. Mathu na wa Reuben nu Gad nyithu ssinu aghisa nu mathu hangkeben yyiwa tsü yasale nkhi neng la.

³⁴ Reuben nu Gad nyithu na khi, “Kekinyipen hawa ha ithu tsüdi ghena Apvüwa tsüna Anyiza le kesa chüza kesü.” Tsalina mathu na tsü nyan pi “Chüza” cia.